«استانا وپەرانىڭ» سەگىزىنشى ماۋسىمى وزگەشە فورماتتا – قازاقستان رەسپۋبليكاسى باس مەملەكەتتىك سانيتارلىق دارىگەرىنىڭ قاۋلىسىنا سايكەس 50 ادام كەلۋ مۇمكىندىگىمەن باستالدى. وسىعان جانە ەلىمىزدەگى وزگە دە جاعدايلارعا بايلانىستى باسشىلىق اۋديتوريا اۋقىمىن كەڭەيتۋ ءارى جاقسارتۋ ماقساتىمەن تەاتردىڭ يميدجدىك ساياساتىن جاڭعىرتۋدى جۇزەگە اسىرۋ تۋرالى شەشىم قابىلدادى.
وسى باعىتتاعى العاشقى قادام تەاتردىڭ جاڭا سايتىن, ءموبيلدى قوسىمشا مەن تەاتر بويىنشا ۆيرتۋالدى تۋردى ىسكە قوسۋدان باستالدى. بۇل جونىندە تەاتر ديرەكتورى, قازاقستاننىڭ ەڭبەك سىڭىرگەن قايراتكەرى عالىم احمەدياروۆ:
– زاماناۋي تەحنولوگيالار قارقىندى دامۋ ۇستىندە. ونىڭ ماڭىزىن, اسىرەسە ەلىمىزدەگى كارانتين ءتارتىبى ءتىپتى ارتتىرىپ جىبەردى. وسىعان وراي ءبىز دە كورەرمەندەرىمىزدىڭ قالاۋىن ەسكەرىپ, ونلاين-رەجىمدە بيلەت ساتىپ الۋ ەرەكشەلىگىن پىسىقتادىق. سايتىمىزدىڭ ديزاينىن جەڭىل ءارى پايدالانۋعا ىڭعايلى ەتىپ جاساۋعا تىرىستىق. الدىمىزدا ەلدەگى عانا ەمەس, شەتەلدە دە باعىت-باعدار بەرەتىن جوعارى دەڭگەيدەگى تەاتردى كورسەتۋ, سونداي-اق كورەرمەندەرمەن قاتىناستى جەڭىلدەتۋ مىندەتتەرى تۇردى. سونىمەن قاتار مەملەكەت باسشىسى قاسىم-جومارت توقاەۆتىڭ حالىق الدىنا ماڭىزدى مىندەت قويعانىن اتاپ وتكەن ءجون – ول تسيفرلاندىرۋ سالاسىنداعى جۇمىستى جالعاستىرۋ. پرەزيدەنتتىڭ ايتۋىنشا, تسيفرلاندىرۋ – سانگە اينالعان ۇردىسكە ىلەسۋ ەمەس, ۇلتتىڭ باسەكەگە قابىلەتتىلىگىن ارتتىرۋدىڭ نەگىزگى قۇرالى. «استانا وپەرا» بۇل باعىتتا بەلسەندى جۇمىس جۇرگىزۋدە, – دەپ اتالعان جوبانىڭ ماڭىزىن اتاپ ءوتتى.
جاڭا ماۋسىمدا, سونداي-اق تەاتردىڭ ءموبيلدى قوسىمشاسى ىسكە قوسىلعانىن ايتا كەتكەن ءجون. ەندى كورەرمەندەردىڭ اتالعان قوسىمشانى جۇكتەپ الىپ, سپەكتاكلدەرگە بيلەتتى جىلدام تاڭداۋى مەن ساتىپ الۋىنا, ەكسكليۋزيۆتى كونتەنتكە قول جەتكىزۋىنە جانە پرەمەرالار مەن سۇيىكتى ارتىستەرىنىڭ ونەر كورسەتۋلەرى تۋرالى ءبىرىنشى بولىپ بىلۋلەرىنە مۇمكىندىكتەرى بار.
تەحنولوگيانىڭ باستى سەرپىلىسى – City360.kz جوباسى ارقىلى Astana Business Campus باعدارلاماسى اياسىندا نازارباەۆ ۋنيۆەرسيتەتىنىڭ قولداۋىمەن جۇزەگە اسىرىلعان VR-تۋر ۆيرتۋالدى ءومىردىڭ جاڭا سايتىن ەنگىزۋ بولدى. ەندى «استانا وپەرانىڭ» كورەرمەندەرى الەم تەاترلارىنىڭ ىشىندە العاشقىلاردىڭ ءبىرى بولىپ سايتقا كىرۋگە, بيلەت ساتىپ العانعا دەيىن كورەرمەن زالىنان ورىن تاڭداۋعا جانە ناقتى سول ورىننان ساحناداعى قويىلىمدى كورۋ قالاي بولاتىندىعىن بىلە الادى. بۇل – قالاۋى بار كەز كەلگەن ادامعا تەاتر ىشىندە «سەرۋەندەۋىنە», تەاتردىڭ ادەمى ينتەرەرىنەن ءلاززات الىپ, مۋزەيدەگى ەكسپوناتتاردى زەردەلەۋىنە, سونىمەن قاتار تەاتردىڭ فوتو جانە بەينەماتەريالدارىن تاماشالاۋىنا مۇمكىندىك بەرەدى.