قىتايدىڭ وڭتۇستىگىندەگى گۋاندۋن پروۆينتسياسىندا «ۋساگي» تايفۋنى 21 ادامنىڭ ءومىرىن قيدى. بۇل تۋرالى يتار-تاسس حابارلادى.
مەتەورولوگتاردىڭ ايتۋىنشا, جەلدىڭ جىلدامدىعى ساعاتىنا 180 شاقىرىمعا جەتكەن.
شانتوۋ قالاسىندا اعاش قۇلاپ ءتۇسىپ, ەكى ادامدى باسىپ قالعان. ال «سينحۋا» اگەنتتىگى تاراتقان اقپاردا حۋەيلاي ۋەزىندەگى قاتتى جەلدەن سىنعان تەرەزە اينەكتەرىنىڭ ءبىرى تۇرعىننىڭ ۇستىنە ءتۇسىپ, ونىڭ قازا بولعانىن, سونداي-اق, ءىز-ءتۇسسىز جوعالعانداردىڭ بار ەكەنى دە جازىلعان.
وڭتۇستىك قىتايدىڭ بىرنەشە اۋدانىندا ەلەكتر جەلىسى ۇزىلگەن جانە بەيجىڭ مەن وڭتۇستىك قىتايدى جالعاپ تۇرعان «گۋانچجوۋ-بەيجىڭ» تەمىرجولىنداعى قوزعالىس ۋاقىتشا توقتاتىلدى. گونكونگ اۋەجايىندا 370-تەن اسا اۋە ساپارى كەيىنگە قالدىرىلدى. جاعالاۋعا جاقىن 14 قالانىڭ مەكتەپتەرى جابىلدى.
«ۋساگي» جاپون تىلىنەن اۋدارعاندا «قويان» دەگەن ماعىنانى بىلدىرەدى ەكەن. «ۋساگي» ازيا اۋماعىندا ۇستىمىزدەگى جىلى ورىن العان ەڭ ءىرى داۋىل سانالىپ وتىر. ول قىتايعا دەيىن فيليپپين اۋماعىندا ورىن الىپ, ەكى ادامنىڭ ءومىرىن ج ۇلىپ كەتكەن. گونكونگ «ۋساگيدى» سوڭعى جارتى عاسىردىڭ ىشىندە ورىن العان ەڭ ءىرى تايفۋن رەتىندە باعالاپ وتىر.
ايدار ورىسباەۆ.