بيىل ەۋرازيا ۇلتتىق ۋنيۆەرسيتەتىنىڭ جۋرناليستيكا جانە ساياساتتانۋ فاكۋلتەتىنە 10 جىل تولادى. 2010 جىلى شىمىلدىعىن اشقان بۇل فاكۋلتەتتىڭ وقۋ ۇردىسىندە جۋرناليستيكا جانە ساياساتتانۋ عىلىمدارىنىڭ باي ءداستۇرى وتە جاقسى ساقتالعان. ونىمەن قوسا مىقتى پروفەسسورلىق قۇرام قالىپتاسىپ, زامان تالابىنا ساي وزىق تەحنولوگيا, تەلە-راديوستۋديالار مەن سوڭعى ۇلگىدەگى وقۋ-ادىستەمەلىك كەشەندەر كەڭىنەن پايدالانىلىپ كەلەدى. ءتىپتى, قازىرگى توتەنشە جاعداي كەزىندە دە ءوز ستۋدەنتتەرىنىڭ كەدەرگىسىز ءبىلىم الۋى ءۇشىن بارلىق جاعداي جاسالعان.
ءيا, ەۋرازيا ۋنيۆەرسيتەتىندەگى جۋرناليستيكا جانە ساياساتتانۋ فاكۋلتەتىنىڭ 10 جىلدىعىن اتاپ ءوتۋ كوروناۆيرۋستىق پاندەميادان تۋىنداعان ەل ىشىندەگى توتەنشە جاعدايمەن تۇسپا-تۇس كەلدى. بارلىق مەرەكەلىك شارالارعا تىيىم سالىنىپ, كەزدەسۋلەر مەن ءتۇرلى جيىندار ونلاين فورماتقا اۋىستى. بىراق پاندەميا دەپ شەكتەلىپ قالماي فاكۋلتەت ۇجىمى وسى مەرەيلى داتاعا وراي ستۋدەنتتەر ءۇشىن قاشىقتان بولسا دا وتە پايدالى ءىس-شارا ۇيىمداستىردى. دالىرەك ايتساق, تەلەراديو جانە قوعاممەن بايلانىس كافەدراسىنىڭ مەڭگەرۋشىسى دۇيسەنعازى سەرىكزات ماقسۇت ۇلىنىڭ باستاۋىمەن جانە پروفەسسور ەسەنبەكوۆا ۇلبوسىن مەيىربەكقىزى مەن باسقا دا وقىتۋشىلاردىڭ ۇيىمداستىرۋىمەن بولاشاق جۋرناليستەر ونلاين رەجيمدە ناعىز پراكتيك مامانداردىڭ ءدارىسىن تىڭدادى. الايدا بۇل تەك فاكۋلتەت تاراپىنان قولعا الىنعان باستاما ەمەس. سەبەبى مۇنداي يگى ءىستىڭ جۇزەگە اسۋىنا ەلىمىزدەگى بەلدى ارنالاردىڭ باسىن قوسقان «حابار» اگەنتتىگىنىڭ دە ۇلەسى بار. ولاي دەيتىنىمىز, بىرىنشىدەن, اتالعان ۇجىم دا بولاشاق جۋرناليستەردى تاربيەلەۋ جۇمىسىنا قاتىسۋدى پارىز دەپ ساناسا, ەكىنشىدەن, «حابار» اگەنتتىگىنە بيىل 25 جىل تولىپ وتىر. وسىنداي سەبەپتەرگە بايلانىستى ۇلتتىق ۋنيۆەرسيتەتىمىزدىڭ جۋرناليستيكا جانە ساياساتتانۋ فاكۋلتەتى مەن ەلىمىزدەگى كوپتىڭ كوڭىلىنەن شىعىپ جۇرگەن تانىمال تەلەاگەنتتىكتىڭ وكىلدەرى بىرلەسە وتىرىپ, ستۋدەنتتەر مەن ماگيسترانتتاردىڭ شەبەرلىگىن ونلاين رەجيمدە شىڭداۋدى ءجون كوردى.
قاشىقتان وتكەن جيىندا فاكۋلتەتىمىزدىڭ 700 ستۋدەنتى مەن بىلىكتى وقىتۋشىلار جانە تاجىريبەلى جۋرناليستەر باس قوستى. 10 كۇندە 10 مامان ءتۇرلى تاقىرىپتا ءدارىس وقىدى. ولار: «El arna» تەلەارناسىنىڭ ديرەكتورى, تانىمال تەلەجۋرناليست جانە تەلەجۇرگىزۋشى – سەيتمامىت ارمان بالتاباي ۇلى, «حابار» ارناسىنىڭ باس رەجيسسەرى – حودجيمەتوۆ زوحيدجون, «حابار» ارناسىنداعى سپورتتىق ترانسلياتسيا جانە باعدارلامالار ءبولىمىنىڭ جەتەكشىسى, تانىمال سپورت كوممەنتاتورى – اسحات جاقاەۆ, «حابار» ارناسىنداعى سپورتتىق ترانسلياتسيا جانە باعدارلامالار ءبولىمىنىڭ پروديۋسەرى, تانىمال سپورت كوممەنتاتورى – ەرمۇحامەد ماۋلەنوۆ, «حابار» ارناسىنداعى جۋرناليستىك زەرتتەۋ ءبولىمىنىڭ جەتەكشىسى, تانىمال تەلەجۋرناليست – اديلوۆا ايگۇل, «حابار» ارناسىنداعى جاڭالىقتار ءبولىمىنىڭ شىعارۋشى رەداكتورى – قۋاندىق وڭالتاي, «حابار» ارناسىنداعى سپورتتىق ترانسلياتسيا جانە باعدارلامالار ءبولىمىنىڭ رەداكتورى – قابىلشا ايبەك, «Kazakh TV» تەلەارناسىنىڭ ديرەكتورى, تانىمال تەلەجۋرناليست, پروديۋسەر – مايا بەكباەۆا سەكىلدى قازاقستان تەلەجۋرناليستيكاسىنىڭ الدىڭعى قاتارلى ماماندارى بولدى. بارلىعى ءوز قىزمەتتەرىنىڭ قىر-سىرى جانە جۇمىس بارىسىمەن بارىنشا تولىق تانىستىرۋعا تىرىستى.
ونلاين شەبەرلىك سىنىبىنىڭ العاشقى دارىسىندە جۋرناليستيكا جانە ساياساتتانۋ فاكۋلتەتىنىڭ دەكانى ساق قايرات ءومىرباي ۇلى دا العى ءسوز رەتىندە ستۋدەنتتەر مەن قاتىسۋشى سپيكەرلەرگە لەبىز, تىلەكتەرىن ءبىلدىردى. ءوز سوزىندە ۋنيۆەرسيتەت قابىرعاسىندا مىقتى مامانداردى دايارلاۋدىڭ ماڭىزى مەن تەوريالىق جانە پراكتيكالىق ساباقتاردى ۇشتاستىرۋدىڭ پايدالىلىعىن اتاپ ءوتتى. سول ارقىلى وسى باستامانىڭ شاكىرتتەر ءۇشىن كومەگى زور بولاتىنىنا سەنىم ءبىلدىردى.
قاشىقتان وتكەن شارا شىمىلدىعىن «حابار اگەنتتىگى توراعاسىنىڭ ورىنباسارى كەرتاەۆ رينات دۋمان ۇلى مەن «ەل ارنا» تەلەارناسىنىڭ ديرەكتورى ارمان بالتاباي ۇلى اشىپ بەردى. رينات دۋمان ۇلى ءوز سوزىندە: «قازىرگى ستۋدەنتتەر – بولاشاق ماماندار, ءبىزدىڭ ارىپتەستەرىمىز. ولاردىڭ ساپالى بولۋى وتە ماڭىزدى. سەبەبى كەيىن وسى شاكىرتتەر ءبىزدىڭ قول استىمىزدا جۇمىس ىستەپ, ءبىزدىڭ ارنانىڭ بەدەلىن كوتەرۋدە ءوز ۇلەسىن قوسۋى ابدەن مۇمكىن. سوندىقتان ولاردىڭ شىڭدالۋىنا ءبىز دە ءوز پايدامىزدى تيگىزۋدى بورىش سانايمىز» - دەپ اتاپ ءوتتى.
ودان بولەك, ستۋدەنتەر قويعان ءاربىر ساۋالعا تۇشىمدى جاۋاپ قايتارۋعا تىرىستى. ال «ەل ارنا» تەلەارناسىنىڭ باسشىسى بولاشاق ءجۋرناليستىڭ بويىندا قانداي قاسيەتتەر بولۋ كەرەكتىگىن ايتىپ, كەمشىلىكتەرگە بوي الدىرماۋدىڭ جولدارى جانە ساپالى ماتەريال جازۋدىڭ سىرىمەن ءبولىستى. مۇنداي كەڭەستەردى پراكتيك مامانداردىڭ اۋزىنان ەستۋ ستۋدەنتتەردى جۋرناليستيكانىڭ اسحاناسىنا ءبىر تابان جاقىنداتقانداي بولدى.
ءسويتىپ بولاشاق جۋرناليستەرگە شەبەرلىك ساعاتىن سىيلاعان ونلاين دەكادا ءوز مارەسىنە جەتتى. ەرتەڭ ولار دا قىزمەت بارىسىنداعى العاشقى تاپسىرمالارىن ورىنداعاندا وسى اقىل-كەڭەستەردى ەسكەرە وتىرىپ, ارەكەت ەتەتىندەرى انىق.