قازاقستاننىڭ جوعارعى وقۋ ورىندارى اراسىندا العاشقىلاردىڭ ءبىرى بولىپ قاشىقتىقتان وقىتۋ جۇيەسىن باستاعان ءال-فارابي اتىنداعى قازاق ۇلتتىق ۋنيۆەرسيتەتىندە دارىستەر, سەمينارلار مەن تاجىريبەلىك ساباقتار ونلاين رەجيمدە وتۋدە.
بىرەر كۇن بۇرىن كارانتين جاعدايىندا ءبىلىم ورداسىنىڭ قاشىقتىقتان وقىتۋ جۇيەسىمەن تانىسۋ ماقساتىندا ۋنيۆەرسيتەتكە «سانالى ۇرپاق» جوباسىنىڭ جەتەكشىسى قايىرجان توكۋشەۆ جانە سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنت باسشىسى ەلنار يگيليكوۆ ارنايى بارعان. بۇل تۋرالى وقۋ وشاعىنىڭ ءباسپاسوز قىزمەتى حابارلادى.
قوناقتار قاشىقتىقتان باسقارۋ ورتالىعىندا بولىپ, ونداعى وقۋ جۇيەسى, شارۋاشىلىق جانە باسقا دا جوو قىزمەتتەرىنىڭ باقىلانۋ جاي-كۇيىن كوردى. ساپار بارىسىندا ولار سونداي-اق, قاشىقتىقتان ءبىلىم بەرۋدى اقپاراتتىق سۇيەمەلدەۋ ورتالىعىنىڭ جۇمىسىمەن تانىستى. «سانالى ۇرپاق» جوباسىنىڭ جەتەكشىسى كارانتين ەرەجەلەرىن ساقتاۋعا جانە كىتاپ وقۋ مەن ءوز ءبىلىمىن جەتىلدىرۋگە قولايلى ۋاقىتتى پايدالانۋعا كەڭەس بەردى.
قازۇۋ 16 ناۋرىزدان باستاپ «ۋنيۆەر» (univer.kaznu.kz) جانە «MOODLE» (dl.kaznu.kz) سىندى ەكى اقپاراتتىق-ءبىلىم بەرۋ جۇيەسىندەگى قاشىقتىقتان ءبىلىم بەرۋ تەحنولوگيالارىن (قوت) ەنگىزدى. وقىتۋ بارىسىندا ZOOM, Teams, DL جانە باسقا دا قوسالقى تسيفرلىق سەرۆيستەر قولدانىلادى.
قازۇۋ-دىڭ وقۋ ءىسى جونىندەگى پرورەكتورى اسقار حيكمەتوۆ اتاپ وتكەندەي, ۋنيۆەرسيتەتتىڭ دامىعان IT-ينفراقۇرىلىمى بۇگىندە 16 فاكۋلتەتتىڭ بارلىق ستۋدەنتتەرىن قاشىقتىقتان وقىتۋدى قامتۋعا مۇمكىندىك بەرەدى. ۋنيۆەرسيتەتتىڭ ءۇش قۇرىلىمى قاشىقتىقتان وقىتۋدى جۇرگىزۋدە جەتەكشىلىك ەتەدى. ماسەلەن, «ۋنيۆەر» جۇيەسىندە وقۋ ءۇردىسىنىڭ بارلىق قىزمەتىن باقىلاۋعا بولادى. جبو قىزمەتكەرلەرى ءار وقىتۋشىنىڭ كەستەسىن باقىلايدى جانە ناقتى ۋاقىت رەجيمىندە ساباقتاردى تەكسەرە الادى.
بۇگىندە قازۇۋ ستۋدەنتتەر ۇيىندە دە ەلدەگى توتەنشە جاعداي سالدارىنان ورىن العان بۇقارالىق ءىس-شارالار مەن كەزدەسۋلەر وتكىزۋ توقتاتىلدى. بارلىق ستۋدەنتتىك جاتاقحانالاردا سوVID-19 الدىن الۋ بويىنشا اقپاراتتىق پاراقشالار مەن ستەندتەر ءىلىندى, جانە دەزينفەكتسيالاۋ قۇرالى بار دوزاتورلار ورناتىلدى.