قازاقستاننىڭ ۇلتتىق كوللەكتورلار پالاتاسى بارلىق كوللەكتورلىق اگەنتتىكتەردى توتەنشە جاعداي رەجىمىنىڭ ءىس-قيمىلدارى مەن كارانتيندىك ءىس-شارالار كەزەڭىندە بىرقاتار ۋاقىتتىق شەكتەۋلەرگە قوسىلۋدى ءارى ۇستانۋدى ۇسىندى.
بۇل جونىندە قارجى نارىعىن رەتتەۋ مەن دامىتۋ اگەنتتىگىنىڭ قارجىلىق قىزمەتتەردى تۇتىنۋشىلاردىڭ قۇقىقتارىن قورعاۋ دەپارتامەنتىنىڭ ديرەكتورى الەكساندر تەرەنتەۆ مالىمدەدى.
ۇلتتىق كوللەكتورلار پالاتاسى قىزمەتكەرلەردى توتەنشە جاعداي اياقتالعانعا دەيىن نۇر-سۇلتان جانە الماتى قالالارى بويىنشا قاشىقتان جۇمىس ىستەۋگە كوشىرۋدى ۇسىندى. سونداي-اق نۇر-سۇلتان جانە الماتى قالاسى بويىنشا قارىز الۋشىلارمەن جەكە كەزدەسۋلەرگە, قارىز الۋشىلارمەن بايلانىستى تولىعىمەن توقتاتۋعا, كارانتينگە جابىلعان تۇرعىن ءۇي كەشەندەرىندە, ۇيلەردە ورنالاسقان بورىشكەرلەرمەن ءوزارا ءىس-قيمىلدىڭ بارلىق تۇرلەرىن توقتاتا تۇرۋعا شاقىردى.
نۇر-سۇلتان جانە الماتى قالالارى بويىنشا ساعات 16.00-دەن كەيىن قارىز الۋشىلارعا قوڭىراۋ شالۋ توقتاتىلسىن. نەسيە بەرۋشىلەردىڭ قارىز الۋشىلارعا سوتقا تالاپ-ارىز بەرۋى ءۇشىن ماتەريالدار دايىنداۋدى توقتاتسىن, – دەيدى كوللەكتورلار پالاتاسىنىڭ قىزمەتكەرلەرى.
ءوز كەزەگىندە, قازاقستاننىڭ ۇلتتىق كوللەكتورلار پالاتاسى قاشىقتان جۇمىس ىستەۋگە كوشتى. كوللەكتورلىق اگەنتتىكتەر ءۇشىن بايلانىس اقپاراتى: +701-887-74-01; قارىز الۋشىلار شاعىمدار مەن وتىنىشتەرىن: +7 700-183-83-03 ءنومىرى بويىنشا نەمەسە info@collectors.kz سايتى بويىنشا بەرە الادى.