قازاقستانعا قايتارىلىپ الىنادى
قازىرگى كۇندەرى قازاقستاننىڭ قارجى پوليتسياسى ءابىلازوۆتىڭ ۇيىمداسقان قىلمىستىق توبىنىڭ باسشىلارى مەن بەلسەندى قاتىسۋشىلارىن ەلىمىزگە جەتكىزۋ باعىتىندا وراسان زور جۇمىستار جۇرگىزىپ جاتىر. ازىرگە توپ باستاعان سەركە ىسپەتتەس مۇحتار ءابىلازوۆتىڭ ءوزى بولماعانىمەن, ونىڭ ەلدەن ەمىن-ەركىن ۇرلاپ كەتكەن وراسان زور كوپ اقشاسىنىڭ ارقاسىندا جۇرگەن بىرقاتار جاندايشاپتارىن قازاقستانعا اكەلۋدىڭ ءبىر ۇشى كورىنىپ قالعان سىڭايلى. ايتالىق, ۇيىمداسقان قىلمىستىق توپ قۇردى جانە ونىڭ قىزمەتىنە قاتىستى, سونداي-اق, بتا بانكتىڭ اقشالاي قاراجاتىن ۇرلادى جانە زاڭسىز پايدالاندى دەگەن ايىپپەن حالىقارالىق ىزدەۋ جاريالانعان بتا بانك كورپوراتيۆتىك بيزنەسى №6 باسقارماسىنىڭ بۇرىنعى باستىعى ۆەرونيكا ەفيموۆا انە-مىنە دەگەنشە رەسپۋبليكاعا كەلتىرىلىپ قالۋى مۇمكىن.
قازاقستانعا قايتارىلىپ الىنادى
قازىرگى كۇندەرى قازاقستاننىڭ قارجى پوليتسياسى ءابىلازوۆتىڭ ۇيىمداسقان قىلمىستىق توبىنىڭ باسشىلارى مەن بەلسەندى قاتىسۋشىلارىن ەلىمىزگە جەتكىزۋ باعىتىندا وراسان زور جۇمىستار جۇرگىزىپ جاتىر. ازىرگە توپ باستاعان سەركە ىسپەتتەس مۇحتار ءابىلازوۆتىڭ ءوزى بولماعانىمەن, ونىڭ ەلدەن ەمىن-ەركىن ۇرلاپ كەتكەن وراسان زور كوپ اقشاسىنىڭ ارقاسىندا جۇرگەن بىرقاتار جاندايشاپتارىن قازاقستانعا اكەلۋدىڭ ءبىر ۇشى كورىنىپ قالعان سىڭايلى. ايتالىق, ۇيىمداسقان قىلمىستىق توپ قۇردى جانە ونىڭ قىزمەتىنە قاتىستى, سونداي-اق, بتا بانكتىڭ اقشالاي قاراجاتىن ۇرلادى جانە زاڭسىز پايدالاندى دەگەن ايىپپەن حالىقارالىق ىزدەۋ جاريالانعان بتا بانك كورپوراتيۆتىك بيزنەسى №6 باسقارماسىنىڭ بۇرىنعى باستىعى ۆەرونيكا ەفيموۆا انە-مىنە دەگەنشە رەسپۋبليكاعا كەلتىرىلىپ قالۋى مۇمكىن.
قىلمىستىق ءىس ماتەريالدارى بويىنشا ۆ.ەفيموۆا ءوزىنىڭ تىكەلەي باستىعى جانە يدەيالاس كوسەمى م.ءابىلازوۆ تىزگىنىن ۇستاعان قىلمىستىق توپتىڭ بەلسەندى مۇشەلەرىنىڭ ءبىرى بولعان. ول 2005-2009 جىلدارى ءابىلازوۆتىڭ ۇيىمداسقان قىلمىستىق توبىنىڭ باقىلاۋىنداعى كومپانيالارعا نەسيەلەردى راسىمدەۋ ارقىلى بانكتىڭ اقشالاي قاراجاتىن ۇرلاۋ ءۇشىن ايرىقشا ۋاكىلەتتىكتەر العان بتا بانكتىڭ كورپوراتيۆتىك بيزنەسى №6 باسقارماسىنا جەتەكشىلىك ەتكەن. كەيىن باسشىسىمەن بىرگە شەتەلگە قاشقان. ال 2009 جىلعى 11 ناۋرىزدا ۆ.ەفيموۆانى قاماۋعا الۋ سىرتتاي سانكتسيالانسا, 17 ناۋرىزدا وعان حالىقارالىق ىزدەۋ جاريالاندى. سول ەفيموۆا 2009 جىلعى 3 شىلدەدە ماسكەۋ قالاسىندا ۇستالدى. 2010 جىلعى 21 ساۋىردە رەسەي فەدەراتسياسىنىڭ باس پروكۋراتۋراسى ەفيموۆانى قىلمىستىق جاۋاپكەرشىلىككە تارتۋ ءۇشىن قازاقستانعا ەكستراديتسيا جاساۋ تۋرالى شەشىم قابىلدادى.
الايدا, ۆ. ەفيموۆا بۇل شەشىمگە قارسى بىرنەشە رەت شاعىم ءتۇسىردى. سونىڭ سالدارىنان ونى ەلگە اكەلۋ ءبىراز كەشەۋىلدەي بەردى. دەگەنمەن, ءىستى قاراعان ءارتۇرلى دەڭگەيدەگى سوتتار, ونىڭ ىشىندە رەسەي فەدەراتسياسىنىڭ جوعارعى سوتىنىڭ سوت القاسى كەيىن شاعىمداردى قاناعاتتاندىرۋدان باس تارتۋ تۋرالى شەشىمدەر شىعاردى. وسىدان كەيىن «سۋعا كەتكەن تال قارمايدىنىڭ» كەبىن كيگەن ۆ. ەفيموۆا ادام قۇقىقتارى جونىندەگى ەۋروپا سوتىنا دا جۇگىندى. بۇل سوت تا سوڭىنان قازاقستانعا جونەلتىلگەن جاعدايدا ەفيموۆانىڭ قۇقىقتارى بۇزىلمايتىنىن قۇپتاعان شەشىم شىعاردى. ەندى جاقىن ۋاقىتتاردا ول رەسپۋبليكاعا جەتكىزىلەتىن بولىپ وتىر.
بۇعان قوسا, قارجى پوليتسياسى اگەنتتىگى قازاقستان باس پروكۋراتۋراسى ارقىلى بتا بانكتىڭ كورپوراتيۆتىك بيزنەسى №6 باسقارما باستىعىنىڭ ورىنباسارى بولعان زاۋرە جۇنىسوۆاعا (اقپەنبەتوۆا) قاتىستى ەكستراديتسيالىق ماتەريالداردى ۆەنگرياعا جولداعان بولاتىن. بتا بانكتىڭ اقشالاي قاراجاتىن ۇرلادى جانە زاڭسىز جولمەن تابىلعان اقشالاي قاراجات پەن وزگە دە م ۇلىكتى زاڭداستىردى دەگەن ايىپپەن وعان 2009 جىلعى ساۋىردە حالىقارالىق ىزدەۋ جاريالانعان ەدى. تەرگەۋدىڭ پايىمىنشا, ول 2005-2009 جىلدارى بتا بانكتىڭ كورپوراتيۆتىك بيزنەسى №6 باسقارما باستىعىنىڭ ورىنباسارى بولىپ تۇرعانىندا, ءابىلازوۆتىڭ ۇيىمداسقان قىلمىستىق توبىنا تاۋەلدى قازاقستان رەسپۋبليكاسىنىڭ رەزيدەنتتەرى بولاتىن زاڭدى تۇلعالاردى جانە وففشورلىق كومپانيالاردى قۇرۋمەن, ولارعا باسشى, قۇرىلتايشى بولاتىن ادامداردى ىزدەۋمەن اينالىسقان.
قاشقىن ز.ءجۇنىسوۆا بيىلعى جىلعى 23 شىلدەدە ۆەنگريادا قولعا ءتۇستى. جاقىن ارادا بۇل ەلدىڭ ۋاكىلەتتى ورگاندارى ونى قازاقستانعا ەكستراديتسيالاۋ ماسەلەسىن قارايتىن بولادى.
قۇرىش نۇرىمبەت.