بۇگىندە «بيزنەستىڭ جول كارتاسى-2020» باعدارلاماسىنىڭ اياسىندا 36 مىڭنان استام كاسىپكەر مەملەكەتتىك قولداۋعا يە بولعان. 40 مىڭعا جۋىق جاڭا جۇمىس ورنى قۇرىلعان. بۇل جونىندە كەشە ۇكىمەت وتىرىسىندا ايتىلدى. كەشەگى وتىرىستا سونداي-اق, انا مەن بالا ءولىمىن ازايتۋ جايى دا تالقىلاندى.
بۇگىندە «بيزنەستىڭ جول كارتاسى-2020» باعدارلاماسىنىڭ اياسىندا 36 مىڭنان استام كاسىپكەر مەملەكەتتىك قولداۋعا يە بولعان. 40 مىڭعا جۋىق جاڭا جۇمىس ورنى قۇرىلعان. بۇل جونىندە كەشە ۇكىمەت وتىرىسىندا ايتىلدى. كەشەگى وتىرىستا سونداي-اق, انا مەن بالا ءولىمىن ازايتۋ جايى دا تالقىلاندى.
«بولىنگەن قارجىنى دۇرىس يگەرۋ كەرەك»
پرەمەر-مينيستر سەرىك احمەتوۆتىڭ توراعالىعىمەن وتكەن سەلەكتورلىق رەجىمدەگى ۇكىمەت وتىرىسىندا «بيزنەستىڭ جول كارتاسى-2020» باعدارلاماسىنىڭ جۇزەگە اسىرىلۋ جايى تالقىلانعان بولاتىن. وتىرىستى اشىپ بەرگەن س.احمەتوۆ «بيزنەستىڭ جول كارتاسى - 2020» باعدارلاماسىن قارجىلاندىرۋ, ونىڭ تەتىكتەرى مەن قۇرالدارىن ودان ءارى جەتىلدىرۋ ماسەلەلەرىنىڭ ماڭىزدىلىعىنا توقتالا كەلە, كاسىپكەرلىكتى دامىتۋعا ىقپال ەتەتىن اتالمىش باعدارلاما مەملەكەت باسشىسىنىڭ ايرىقشا نازارىندا وتىرعانىن اتاپ ءوتتى. ودان ءارى باعدارلامانىڭ ورىندالۋ بارىسى جايىندا وڭىرلىك دامۋ ءبىرىنشى ۆيتسە-ءمينيسترى قايىربەك وسكەنباەۆ باياندادى.
ق.وسكەنباەۆتىڭ ايتۋىنشا, ەكونوميكاداعى ءاربىر 5 جاڭا جۇمىس ورنى باعدارلاما شەڭبەرىندە قۇرىلعان. يندۋستريالاندىرۋ كارتاسىنىڭ ءاربىر 4 جوباسى باعدارلاما قولداۋىنا يە بولىپ, ونىڭ ۇلەسى شاعىن جانە ورتا بيزنەسكە بولىنگەن بارلىق نەسيەلەردىڭ 11,6 پايىزىن قۇراعان. سونداي-اق, 56 ملرد. تەڭگە سالىق تولەنىپ وتىر.
سوڭعى ەكى جىلدا باعدارلاماعا 3 وزگەرىستەر پاكەتى ەنگىزىلگەن, تاياۋ ارادا كەزەكتى ءتورتىنشى وزگەرىستەر پاكەتىن ەنگىزۋ جوسپارلانۋدا. ولاردىڭ اياسىندا كاسىپكەرلىكتى قولداۋ جانە ولارعا قىزمەت كورسەتۋ ورتالىقتارىن, بيزنەس-ينكۋباتورلار قۇرۋ مەن ولاردى جۇمىس ىستەتكىزۋ تەتىكتەرى, سونداي-اق يندۋستريالىق ايماقتاردى دامىتۋ بويىنشا, جاڭا باستاعاندار ءۇشىن «بيزنەس كەڭەسشى-1», جۇمىس ىستەپ جۇرگەن كاسىپكەرلەر ءۇشىن «بيزنەس كەڭەسشى-2» باعدارلامالارىن قۇرۋدىڭ نەگىزگى ادىستەرى مەن شارالارى انىقتالادى.
ق.وسكەنباەۆ مەملەكەت باسشىسىنىڭ تاپسىرماسىنا سايكەس وزگەرىستەردىڭ ءتورتىنشى پاكەتىندە «بيزنەستىڭ جول كارتاسى-2020» باعدارلاماسى تەتىكتەرى ارقىلى اگروونەركاسىپ كەشەنى جوبالارىن قولداۋ بويىنشا شارالاردىڭ قاراستىرىلاتىنىن ايتتى.
«ۇستىمىزدەگى جىلدىڭ قازانىندا ۇكىمەتكە ەنگىزىلمەكشى ۇسىنىلىپ وتىرعان وزگەرىستەر قازاقستاندىق كاسىپكەرلەرگە مەملەكەتتىك قولداۋ شارالارىن كورسەتۋ ءۇشىن جاعداي تۋعىزادى», دەگەن سەنىم ءبىلدىردى ق.وسكەنباەۆ.
تالقىلانعان ماسەلە بويىنشا سونداي-اق «دامۋ» قورى باسقارماسىنىڭ ءتورايىمى ل.يبراگيموۆا, قوستاناي وبلىسىنىڭ اكىمى ن.سادۋاقاسوۆ, ماڭعىستاۋ وبلىسىنىڭ اكىمى ا.ايدارباەۆ, جامبىل وبلىسىنىڭ اكىمى ق.بوزىمباەۆ ءسوز سويلەدى.
قارالعان ماسەلەنى قورىتىندىلاي كەلە, ۇكىمەت باسشىسى «بيزنەستىڭ جول كارتاسى-2020» باعدارلاماسىن جۇزەگە اسىرۋدا بەلگىلى دارەجەدەگى ناتيجەلەردىڭ بار ەكەنىن ايتا كەلىپ, ونى ورىنداۋدا ساپانى ارتتىرۋدىڭ قاجەتتىگىن, بۇل ءۇشىن باعدارلامانىڭ بارلىق الەۋەتىن قولدانۋ كەرەكتىگىن اتاپ كورسەتتى. وسىعان وراي, س.احمەتوۆ وڭىرلىك دامۋ مينيسترلىگىنە وبلىستارمەن ءوزارا ءىس قيمىلدى ۇيلەستىرۋگە ايرىقشا كوڭىل ءبولۋدى, ال وڭىرلەرگە جوبالاردى ساپالى ىرىكتەۋ مەن بولىنگەن قارجىنى دۇرىس يگەرۋدى تاپسىردى.
«انا مەن بالا ءولىمى توتەنشە جاعداي
دارەجەسىندە قارالۋى ءتيىس»
كەشەگى ۇكىمەت وتىرىسىندا قارالعان ەكىنشى ماسەلە بۇگىندە قوعام ءۇشىن اسا ماڭىزدى ماسەلەلەردىڭ ءبىرى – انا مەن بالا ءولىمىن ازايتۋ ءىس-شارالارىنا ارنالدى. انا مەن بالا ءولىمىن ازايتۋ بويىنشا ءىس-شارالار جوسپارىن جۇزەگە اسىرۋ بارىسى تۋرالى دەنساۋلىق ساقتاۋ ءمينيسترى ساليدات قايىربەكوۆا باياندادى. ءمينيستردىڭ ايتۋىنشا, شارالار قاتارىنا حالىقارالىق ءتيىمدى تەحنولوگيالاردى ەنگىزۋ, انا قاۋىپسىزدىگى باعدارلاماسىن جۇزەگە اسىرۋ, بالالار سىرقاتتارىن كەشەندى ەمدەۋ سياقتى جۇيەلى شارالار قابىلداۋدىڭ ارقاسىندا انا مەن بالا ءولىمى كورسەتكىشىن تۇسىرۋگە قول جەتكىزىلگەن.
سوڭعى 3 جىلدا ءتيىمدى تەحنولوگيالاردى ەنگىزۋدى ۇيلەستىرۋ رەسپۋبليكالىق ورتالىعى جۇمىس ىستەيدى. ءار ايماقتا پەريناتالدى ورتالىقتار مەن بالالار اۋرۋحانالارى بازاسىندا جۇكتى, بوسانعان انالار مەن سابيلەرگە, بالالارعا مەديتسينالىق كومەك كورسەتەتىن مەديتسينا قىزمەتكەرلەرىن ۇزدىكسىز كاسىبي جەتىلدىرۋ بويىنشا وقۋ ورتالىقتارى جۇمىس ىستەپ كەلەدى. پەرزەنتحانالار مەن بالالار ۇيىمدارى مەديتسينا قىزمەتكەرلەرىنىڭ 80 پايىزدان استامى حا لىقارالىق ستاندارتتار بويىنشا ءبىلىم الىپ, ناتيجەسىندە انا مەن بالاعا شۇعىل كومەك كورسەتۋ ەلەۋلى تۇردە جاقساردى. ولاردىڭ ءبىلىمى مەن تاجىريبەلىك ماشىقتارىن باعالاۋ ءۇشىن استانا مەن الماتى قالالارىندا رەسپۋبليكالىق ورتالىقتار اشىلىپ, جۇمىس ىستەۋدە.
انا مەن بالا ءولىمىن ازايتۋ جونىندە سونداي-اق بۇۇ-نىڭ بالالار قورى يۋنيسەف-ءتىڭ قازاقستانداعى وكىلى دجۋن كۋكيتا ءسوز سويلەدى.
ۇكىمەت باسشىسىنىڭ ايتۋىنشا, دەنساۋلىق ساقتاۋ سالاسىندا سوڭعى جىلدارى اتقارىلعان جۇمىستار از ەمەس. كارديوحيرۋرگيا, ترانسپلانتولوگيا, كولىك مەديتسيناسى دامىپ, ۇلتتىق سكرينينگتىك باعدارلاماسى ەنگىزىلدى, كەپىلدى تەگىن, ونىڭ ىشىندە بالالارعا ارنالعان مەديتسينالىق كومەكتەر تىزبەسى كەڭەيۋدە. سونىمەن قاتار, س.احمەتوۆ مينيسترلىككە اقپاراتتىق جۇمىستاردى كۇشەيتىپ, باق ارقىلى سالاعا ەنگىزىلىپ جاتقان جاڭاشىلدىقتار, تۇتاستاي العاندا, وتاندىق مەديتسينانىڭ جەتىستىكتەرى تۋرالى حابارلاپ وتىرۋ قاجەتتىگىن اتاپ كورسەتتى.
پرەمەر-مينيستر انا مەن بالا ءولىمى توتەنشە جاعداي دارەجەسىندە قارالۋى ءتيىس, ال دەنساۋلىق ساقتاۋ مينيسترلىگى وڭىرلەرمەن بىرلەسىپ بۇل سالادا ساپالى تالداۋ جۇرگىزۋى كەرەك, دەپ تۇيىندەدى.
دينارا بىتىكوۆا,
«ەگەمەن قازاقستان».