قازىرگى ۋاقىتتا تۇركىستان وبلىسى تۇرعىندارىنىڭ 96,9 %-ى ءمامس قاتىسۋشىلارى. ونىڭ ىشىندە جارنالاردى مەملەكەت جۇزەگە اسىراتىن 1 ملن 300 مىڭ ادام, ياعني 15 جەڭىلدىگى بار ساناتتاعى ازاماتتار بار. وبلىس بويىنشا 73 مەديتسينالىق مەكەمەمەن كەلىسىم شارتقا وتىرۋ جوسپارلانعان. ونىڭ 40-ى مەملەكەتتىك, ال 33-ءى جەكە كلينيكا. كەلىسىمگە كەلگەن مەكەمەلەردە مەديتسينالىق ساقتاندىرىلعان ازاماتتار اقىسىز تۇردە ەم قابىلداي الادى.
تۇركىستان وبلىسىنا ارنايى ىسساپارمەن كەلگەن «مىندەتتى الەۋمەتتىك ساقتاندىرۋ قورى» اق باسقارما توراعاسى ايباتىر جۇماعۇلوۆ وسىنداي دەرەكتەردى ءمالىم ەتتى. سارىاعاش اۋدانىنداعى بىرقاتار مەديتسينالىق مەكەمەلەردى ارالاپ, ەلدى مەكەندەردەگى مىندەتتى الەۋمەتتىك ساقتاندىرۋ جۇيەسىنىڭ جۇمىسىمەن تانىسقان باسقارما توراعاسى اۋداندىق ورتالىق اۋرۋحاناسىندا ءمامس جۇيەسى ارقىلى تەگىن ەم قابىلداپ جاتقان ناۋقاستارعا جاڭا جوبانىڭ ارتىقشىلىقتارىن ءتۇسىندىردى. اۋداندىق ورتالىق اۋرۋحاناعا 188 803 تۇرعىن تىركەلگەن. بۇگىندە ساقتاندىرىلعان تۇرعىندار ەمحانادا كومپيۋتەرلىك توموگرافيا مەن ماگنيتتى رەزونانستى توموگرافيادان تەگىن وتە الادى. ءمامس اياسىندا العاشقى مەديكو-سانيتارلىق, بالالارعا, ەرەسەكتەرگە مامانداندىرىلعان مەديتسينالىق كومەكتەر كورسەتۋمەن اينالىساتىن مەديتسينالىق ۇيىمداردىڭ مۇمكىندىگى كەڭەيە تۇسكەن. جاڭا جۇيە اياسىندا اۋىل مەديتسيناسىنا ءجىتى نازار اۋدارىلۋدا.
بۇگىندە اۋدان كولەمىندە جاڭادان بىرنەشە باستاپقى مەديتسينالىق - سانيتارلىق كومەك كورسەتۋ ورتالىقتارى اشىلعان. باسقارما توراعاسى سولاردىڭ قاتارىنا كىرەتىن «كوكتوبە» مەديتسينالىق مەكەمەسىندە دە بولدى. ورتالىقتا كارديولوگ, حيرۋرگ, ستوماتولوگ بەيىندى ماماندار 20239 ناۋقاسقا قىزمەت كورسەتىپ كەلەدى. وندا 15 دارىگەر, 76 ورتا مەديتسينا قىزمەتكەرى جۇمىس ىستەيدى. ايتا كەتەرلىگى, بۇرىن اۋىل تۇرعىندارى بەيىندى مامانداردىڭ كومەگىن اۋداندىق اۋرۋحانادان الاتىن بولسا, قازىر ءوز اۋىلىندا ورنالاسقان ەمحانا كومەگىنە جۇگىنەدى.
تۇركىستان وبلىسى