قورعانىس مينيسترلىگىندەگى قارۋ-جاراقپەن قامتۋ باسقارماسىنىڭ باستىعى بولعان, گەنەرال الماس اسەنوۆ 11 جىلعا سوتتالدى. الماتىنىڭ قىلمىستىق ىستەر جونىندەگى مامانداندىرىلعان اۋدانارالىق اسكەري سوتىنىڭ شەشىمىمەن ول جازاسىن قاتاڭ رەجىمدەگى كولونيادا وتەيتىن بولدى. بۇل تۋرالى «1 ەۋرازيا» تەلەارناسى حابارلادى.
بيىلعى قاڭتار ايىندا قۇقىق قورعاۋ قىزمەتكەرلەرى ا. اسەنوۆتى 200 مىڭ دوللار پارا الىپ جاتقان جەرىنەن قولعا ءتۇسىردى. ول پارانى اسكەري تەحنيكالاردى جوندەگەنى تۋرالى «ۋكرسپەتسەكسپورت» كومپانياسى قىزمەتكەرلەرىنە جالعان قۇجات راسىمدەپ بەرگەنى ءۇشىن العان كورىنەدى. اسكەري سوتتىڭ شەشىمىمەن ا. اسەنوۆكە پارا بەرگەن ۋكراينا ازاماتتارى الەكساندر شكوليارەنكو مەن الەكساندر حرۋلەۆ كىنالى دەپ تانىلىپ, 6 جىلعا باس بوستاندىقتارىنان ايرىلدى. ەكەۋىنىڭ دە مۇلكى تاركىلەندى.
اسكەري تەحنيكانى جوندەۋ كەلىسىمىنە بايلانىستى جاسالعان قۇجاتتار تىزىمىندە بىلتىر شىمكەنت ماڭىندا اپاتقا ۇشىراعان ان-72 ۇشاعى دا بار بولىپ شىقتى.
دانيار تۇيمەباي.