تاريح ولشەمىمەن قاراعاندا قاس-قاعىمدىق ءسات بولىپ كورىنەتىن از عانا جىلدا قازاق حالقى عاسىرلارعا بەرگىسىز جولدى ءجۇرىپ ءوتتى. ءوز استاناسىن تۇڭعىش رەت ءوزى انىقتاعان جاس مەملەكەت ونى ساۋلەتتى دە ءساندى شاھارعا اينالدىردى. بۇگىندە الەمدىك قوعامداستىق ءۇشىن قازاقستان مەن استانا اتاۋلارى ەگىز ۇعىم بولىپ وتىر. بۇل ۇعىم قارىشتاپ دامۋ مەن ءورىستى وركەندەۋدىڭ ونەگەلى ۇلگىسى رەتىندە ورنىقتى.
وسىدان تۋرا 19 جىل بۇرىن, 1994 جىلدىڭ 6 شىلدەسىندە قازاقستان رەسپۋبليكاسى جوعارعى كەڭەسىنىڭ ەل استاناسىن الماتىدان اقمولاعا كوشىرۋ تۋرالى قابىلداعان قاۋلىسى شىن مانىندە تاريحي دا تاعدىرلى شەشىم بولدى. بۇل شەشىم تاۋەلسىزدىكتىڭ العاشقى جەمىستەرى عانا ەمەس, جاس مەملەكەتىمىزدىڭ تۇڭعىش جەڭىستەرىنىڭ دە ءبىرى ەدى. سارىارقا توسىنەن بوي كوتەرگەن استانا بۇگىندە ەلىمىزدىڭ ماقتانىشىنا, دالامىزدىڭ كوركىنە اينالدى.
ءبىز ەلىمىزدىڭ استاناسىن الماتىدان اقمولاعا اۋىستىردىق, ەلوردانى الاتاۋ باۋىرىنان ارقا توسىنە كوشىردىك دەپ ايتا سالۋ ازدىق ەتەدى. شىن مانىندە, ءبىز ەلىمىزدىڭ جاڭا استاناسىن سالۋعا كىرىستىك. سول ارقىلى ءىس جۇزىندە جاڭا مەملەكەت قۇرۋعا كىرىستىك. حالقىمىز جاڭا دا جاس مەملەكەتىنىڭ استاناسىن ءوزىنىڭ قالاعان جەرىنە, ءوزىنىڭ قالاۋى بويىنشا ورناتتى. ەڭ باستىسى – ءوزىنىڭ كىندىك قالاسىنىڭ قۇرىلىسىنا بىلەك سىبانىپ, بار كۇش-قايراتىن, ىنتا-جىگەرىن سالدى. ءار كوشەگە, ءار ۇيگە جۇرەك مەيىرىن, پەرزەنتتىك سۇيىسپەنشىلىگىن, جان جىلۋىن جۇمسادى. استانا وسىلايشا حالقىمىزدىڭ ايالى الاقانى, ىستىق مەيىرىمىمەن تۇرعىزىلدى. سوندىقتان دا بۇل قالا بارىمىزگە ەرەكشە قىمبات, ايرىقشا اياۋلى.
تاۋەلسىزدىكتىڭ نەگىزگى ءمانى تاريحتىڭ جاڭا بەتىن ءوز ەركىڭمەن, ءوز شەشىمىڭمەن باستاۋدا بولسا كەرەك. تاۋەلسىزدىك بىزگە جاڭا جولىمىزدى, ءوزىمىزدىڭ سونى سوقپاعىمىزدى تابۋعا زور مۇمكىندىك ۇسىندى. سول جاڭا جولىمىزدى ءبىز استانا ارقىلى تاپتىق. قازىرگى كەزدە استانا ءبىزدىڭ كەلەشەگىمىزگە قاتىستى ماڭىزدى شەشىمدەر قابىلدايتىن مەملەكەتىمىزدىڭ ساياسي ورتالىعى عانا ەمەس, ۇلتتىق رۋحىمىزدى ۇيىتىپ وتىرعان رۋحاني وردامىزعا دا اينالدى.
استانانىڭ ارقاسىندا ءبىز ەلدىڭ يەسى, جەردىڭ كيەسى كىم ەكەنىن الەمگە ايقىن تانىتتىق. بارشا قازاقستاندىقتاردى ورتاق مۇددە جولىنا بارىنشا ۇيىستىرىپ, ۇلتتار مەن ۇلىستاردى جۇمعان جۇدىرىقتاي جۇمىلدىرا بىلدىك. استانانىڭ ارقاسىندا قازاق بۇرىنعىدان دا بەكەم بىرىگە ءتۇستى. ەلدىڭ ەڭسەسى تىكتەلدى, رۋحى كوتەرىلدى. ەلباسىمىزدىڭ جولداۋىندا اتاپ كورسەتىلگەنىندەي, «ەلدىڭ دامۋدىڭ «جاسىل» جولىنا كوشۋىنە استاناداعى الدا تۇرعان ەكسپو-2017 قۋاتتى سەرپىلىس بەرۋى ءتيىس. استانادا عىلىم مەن تەحنيكانىڭ ۇزدىك الەمدىك جەتىستىكتەرى ۇسىنىلاتىن بولادى. كوپتەگەن قازاقستاندىقتار ءبىز قول سوزىپ وتىرعان «بولاشاقتىڭ ەنەرگياسىن» ءوز كوزىمەن كورە الادى» دەگەن ءسوزى استانا مەرەيىن ودان ءارى اسقاقتاتا تۇسۋدە. استانا ەلىمىزدەگى تاتۋلىق پەن كەلىسىمنىڭ ۇيىتقىسى رەتىندە كەلەشەكتە دە وزگە جۇرتقا ۇلگى-ونەگە بولا بەرەتىنى انىق.
امانعالي ايمۇرزاەۆ,
سوزاق اۋدانىنىڭ اكىمى.
وڭتۇستىك قازاقستان وبلىسى.