سەيسەنبى, 14 مامىر 2013 1:43
ادەتتە قانداي دا ءىستىڭ بارىسى باستاپقى قادامعا بايلانىستى ەكەنى ايان. «ساتتىلىككە تاتتىلىك» دەگەندەي, جۇمىستىڭ جاندانا ءجۇرۋى قالپىندا جالعاسىپ, جاڭعىرىق قاعۋى جاقسى جاعداي قالىپتاستىرادى دەسەك, سونداي جاعىمدى نىشان ءوندىرىستى ءوڭىر تىنىسىنان بىلىنەتىندىگىن اتاۋعا بولادى. مۇنى جىلدىڭ العاشقى ءۇش ايىنداعى اياق الىستىڭ الىمدى بولۋىنا ورايعى مالىمەتتەر ايعاقتايدى.
سەيسەنبى, 14 مامىر 2013 1:43
ادەتتە قانداي دا ءىستىڭ بارىسى باستاپقى قادامعا بايلانىستى ەكەنى ايان. «ساتتىلىككە تاتتىلىك» دەگەندەي, جۇمىستىڭ جاندانا ءجۇرۋى قالپىندا جالعاسىپ, جاڭعىرىق قاعۋى جاقسى جاعداي قالىپتاستىرادى دەسەك, سونداي جاعىمدى نىشان ءوندىرىستى ءوڭىر تىنىسىنان بىلىنەتىندىگىن اتاۋعا بولادى. مۇنى جىلدىڭ العاشقى ءۇش ايىنداعى اياق الىستىڭ الىمدى بولۋىنا ورايعى مالىمەتتەر ايعاقتايدى. سوعان سۇيەنسەك, ايماق ەكونوميكاسىنىڭ نەگىزگى سالاسىنىڭ باستى كورسەتكىشى – ونەركاسىپتىك ءوندىرىس كولەمى 399,6 ميلليارد تەڭگە قۇراۋى جەتىستىكتەرگە ۇمتىلۋدىڭ ءۇلكەن ۇشقىنىن كورسەتەدى. راس, الەمدىك قارجىلىق داعدارىس سالقىنى تيمەي وتپەي وتىرعان «ارسەلور ميتتال تەمىرتاۋ» اق پەن «قازاقمىس» كورپوراتسياسى جۇمىسىن بۇرىنعىسىنشا ساقتاي العاندا ءوسۋ قارقىنى بۇدان گورى جوعارىراق بولار ەدى. دەگەنمەن, وسىنداي جاعدايلارعا قاراماستان, دامۋدىڭ جاڭا بەلەستەرىنە بيىكتەۋ مۇمكىندىگى كۇش پەن قۋاتتىڭ باسقا دا قاينار كوزدەرى از ەمەستىگىن تانىتادى.
بۇل ۋاقىت ەرەكشەلىگىنە سايكەس ءبىر يكەمدىلىك بولسا, سونداي-اق ينۆەستيتسيالىق بەلسەندىلىكتىڭ ارتۋى وركەندەۋ شارالارىن تولاستاتپاۋعا قولايلى جاعدايلار جاساپ كەلەدى. وبلىس كاسىپورىندارىنا دەم بەرگەن 57 ميلليارد تەڭگە ينۆەستيتسيا ناتيجەسىندە ىسكە اسىرىلۋداعى 42 ءىرى جوبانىڭ 22-ءسى بۇگىندە تولىق كۇشىنە ەنگەن. جىل اياعىنا دەيىن تاعى 10 جاڭا ءوندىرىس اشىلىپ, 1135 جۇمىس ورنى پايدا بولماقتىعى قۇلاشتى كەڭگە جايدىرا تۇسەدى. بۇل رەتتە «سارىارقا» ەركىن ەكونوميكالىق ايماقتاعى 11 كومپانيانىڭ ءوتىمدى ونىمدەر وندىرۋگە كىرىسۋىنىڭ ىقپالى زور بولىپ وتىر.
مۇنىمەن بىرگە ەكونوميكالىق تۇراقتىلىقتى قامتاماسىز ەتۋگە شاعىن ءجانە ورتا بيزنەستىڭ ۇلەسى دە سالماقتانۋى وڭ قۇبىلىس سانالادى. ماسەلەن, اتالعان سالا بويىنشا وتكەن مەرزىمدە 117 ميلليارد تەڭگە ءونىم ءوندىرىلىپ, قىزمەت كورسەتىلۋى ءوڭىردىڭ ەكىنشى تىنىسىنا تىڭ لەپتىڭ دەر كەزىندە ەسۋىنە قۋانتادى.
وسىنداي وركەندى وزگەرىستەر وبلىس قازىناسىنىڭ مولىعۋىنا يگى سەپتىگىن تيگىزۋدە. بيۋدجەتتىڭ كىرىس بولىگىنە ءبىرىنشى توقساندا عانا جوسپاردان تىس 1,2 ميلليارد تەڭگە ءتۇسۋى جاعدايدىڭ جالپى جاي-كۇيىن انىق بايقاتار دەرەك. سونىڭ ناتيجەسىندە الەۋمەتتىك باعدارلامالاردىڭ تياناقتى ورىندالۋىنا قول ۇزارتىلۋدا. مىسال ءۇشىن بۇعان دەيىن دە تۇرعىن ءۇي قۇرىلىسى جونىنەن ەلىمىزدە الدىڭعى ورىننان كورىنىپ جۇرگەن وبلىس وسىناۋ ۇلگىلى ءۇردىستى ساقتاپ, بيىل دا كوپتەگەن تۇرعىندى قۋانىشقا بولەۋگە بەرىك. وعان ءۇش ايدا 97 مىڭ شارشى مەتر ءۇي پايدالانۋعا بەرىلۋى مىقتى نەگىز قالايدى.
ايماق باسشىسى باۋىرجان ابدىشەۆ ءبىرىنشى توقساننىڭ قورىتىندىسىنا ارنالعان جيىندا ايتىپ وتكەندەي, ءوڭىردىڭ دامۋىنا وزىندىك سەرپىن بەرۋگە ءتيىس مۇمكىندىكتەر از ەمەس, مۇقيات تالداپ, قاراۋدى قاجەت ەتەتىن ماسەلەلەر كوپ. ۇدەمەلى يندۋستريالىق-يننوۆاتسيالىق دامۋ مەملەكەتتىك باعدارلاماسىنىڭ نەگىزگى باعىتتارىن ورىنداۋدى ەرەكشە باقىلاۋعا الىپ, ساپالى مونيتورينگتى قامتاماسىز ەتۋ, شىعارىلاتىن ءونىمدى قايتا وڭدەۋ بويىنشا جوبالاردى جۇزەگە اسىرۋ, ينۆەستيتسيالار تارتۋدى ۇلعايتۋ, ءبىرتۇتاس ەكونوميكالىق كەڭىستىك ەلدەرى كاسىپورىندارىمەن بىرلەسكەن ءىس-قيمىلدى جەتىلدىرۋ قاجەتتىگى العا قويىلدى. ءىستىڭ كوزىن تاپقانعا تابىس كول-كوسىر ەكەنى ەسكە سالىنىپ, بارلىق دەڭگەيدەگى بۋىندارعا وسىنداي مىندەت جۇكتەلدى.
ايقىن نەسىپباي,
«ەگەمەن قازاقستان».