سەنبى, 23 ناۋرىز 2013 0:25
رەسەيدەن تاريحي وتانىنا ورالعان قارىنداسىمىز سپورت سالاسىندا بيىك بەلەستى باعىندىرۋدى كوزدەيدى
ءار كىمنىڭ كىندىك قانى تامعان توپىراعى ىستىق قوي, ءشىركىن. تۋعان جەر ادامدى تارتىپ-اق تۇرادى. ءبىزدىڭ كەيىپكەرىمىز گۇلنافيس ايتمۇحامبەتوۆا رەسەيدىڭ استراحان وبلىسىندا ءومىرگە كەلگەن, سول وڭىردە قاناتى قاتايعان. راس, استراحاندا قازاقتار از ەمەس. بىراق, ەلدىڭ اتى – رەسەي.
سەنبى, 23 ناۋرىز 2013 0:25
رەسەيدەن تاريحي وتانىنا ورالعان قارىنداسىمىز سپورت سالاسىندا بيىك بەلەستى باعىندىرۋدى كوزدەيدى
ءار كىمنىڭ كىندىك قانى تامعان توپىراعى ىستىق قوي, ءشىركىن. تۋعان جەر ادامدى تارتىپ-اق تۇرادى. ءبىزدىڭ كەيىپكەرىمىز گۇلنافيس ايتمۇحامبەتوۆا رەسەيدىڭ استراحان وبلىسىندا ءومىرگە كەلگەن, سول وڭىردە قاناتى قاتايعان. راس, استراحاندا قازاقتار از ەمەس. بىراق, ەلدىڭ اتى – رەسەي.
گۇلنافيس وسى ەلدە ۇلكەن سپورتقا بەت بۇردى. ءتىپتى, بيىك بەلەستەرگە جەتەلەگەن باستاپقى جەتىستىكتەرىنە قول جەتكىزىپ, رەسەيدىڭ ءۇش ءدۇركىن چەمپيونى اتاندى. ءبىراق, ۇلتىڭ قازاق بولعانمەن, دودادان توپ جارعاندار رەسەيدىڭ ءمارتەبەسىن بيىكتەتەدى. رەسەيدىڭ ابىرويىن اسىرادى. سول ەلدىڭ كوتەرىلگەن تۋىنا قاراپ, ءانۇرانىنا قوسىلىپ تۇرادى. ال, بۇل بويىندا قازاقى نامىسى بار, جۇرەگى قازاق دەپ سوعاتىن گۇلنافيستىڭ ويىن سان-ساققا جۇگىرتەتىن. وڭاشا قالعان ءساتتەرىندە «سپورتتاعى جەڭىسىمدى قازاقستانىما ارناسام, قالىڭ قازاقتىڭ نامىسى ءۇشىن جارىسقا شىقسام», دەپ كۇن-ءتۇن تولعاناتىن بولدى. جۇرەك تۇكپىرىندەگى سول تولعانىسى ارمانعا ۇلاستى.
ارينە, سپورتتىڭ قاي ءتۇرىنەن دە بيىك بەلەسكە كوتەرىلۋ استە وڭاي ەمەس. سونىڭ ىشىندە تاەكۆوندوشىلاردىڭ جەڭىسكە جەتۋى تىپتەن قيىن. ويتكەنى, تمد ەلدەرىندە بۇل سپورت بۇرىن كەڭ ەتەك جايماعان. تەك ەلىمىز تاۋەلسىزدىك العاننان كەيىن عانا مۇستافا وزتۇرىكتىڭ كەلۋىمەن دامي باستادى. رەسەيدە دە تاەكۆوندونىڭ وركەن جايۋى سول جىلداردان باستاۋ الادى. ون ەكى جاسىندا تاەكۆوندوعا مىقتاپ بەت بۇرعان قازاقتىڭ قايسار قىزىنىڭ رەسەيدەگى جەتىستىگى دە, ابىرويى دا اسپانداپ بارا جاتتى. ءتىپتى, قارسىلاستارى گۇلنافيس قاتىساتىن ەلىشىلىك, حالىقارالىق دودالارعا قايمىعىپ كەلەتىن بولدى. ۇلكەن ەلدە ونى قولدايتىن تىلەۋلەستەرمەن بىرگە, رەتى كەلسە وماقاستىرا قۇلاتۋدى كوزدەگەن اياقتان شالۋشىلار دا تابىلىپ جاتتى. ويتكەنى, گۇلنافيستىڭ سوققىلارى جويقىن ەدى. تاكتيكاسى دا بولەك. ايتپەسە, رەسەيدىڭ ءۇش دۇركىن چەمپيونى بولا الار ما ەدى؟ ونىڭ چەمپيوندىق بيىككە باستاعان سپورتتىق تاكتيكاسىنا, ەڭ باستىسى, قايسارلىعىنا قىزىعاتىندار كوبەيدى. قىزعانىش تا بولماي قالمادى. تىلەۋلەستەرىنىڭ قىزىعۋشىلىعىن, باقتالاستارىنىڭ قىزعانىشىن وياتقان گۇلنافيس ءبىر كۇندە قازاق ەلىنىڭ نامىسىن قورعاۋعا بەكىنىپ شىعا كەلدى. ءسويتىپ, 2008 جىلدىڭ جازىندا قازاقستانعا ورالدى.– بالا كۇنىمىزدەن اتا-انامىز ءبىزدى قازاقى نامىسقا ءتاربيەلەدى. سەن قازاقسىڭ, ۇلتتىق نامىسىڭدى ەشكىمگە تاپتاتپا, دەپ وتىراتىنىن جادىمىزعا تۇيدىك, – دەيدى گۇلنافيس ايتمۇحامبەتوۆا وتكەن كۇندەرىنە شولۋ جاساپ. – اكەم مەن قاتىساتىن جارىستىڭ بارىنەن قالمايتىن. جاتتىقتىرۋشىنىڭ قولداۋى بولەك قوي, ال اكەڭنىڭ نامىسىڭدى قايراعان, جىگەرىڭدى جانىعان سوزدەرى ءتىپتەن ەرەكشە اسەر ەتەدى. اسىرەسە, ەسەيگەن كەزدە مەن قازاقپىن, ەندى تەك قازاق حالقىنىڭ نامىسىن قورعاۋىم قاجەت, دەگەن ويعا بەكىندىم. ۇلتتىق نامىسىم مەنىڭ ەلگە ورالۋىما تۇرتكى بولدى.گۇلنافيستىڭ تاريحي وتانىنا ورالۋى قازاق تاەكۆوندوشىلارى اراسىندا ۇلكەن سەرپىلىس تۋدىردى. «اتىراۋعا رەسەيدەن تاەكۆوندوشى قازاق قىزى كەلىپتى» دەگەندى ەستىپ, ءبىز دە ەلەڭ ەتە تۇسكەنبىز. ودان بەرى دە ءبىراز جىل وتە شىقتى. وسى جىلداردا تاريحي وتانىنا ورالعان قازاق قىزىنىڭ سپورتتاعى جەتىستىگىن سىرتتاي باقىلاپ كەلەمىز. اراسىندا سپورتتىڭ وسى تۇرىنەن اعا جاتتىقتىرۋشى نۇرحات دۇيسەنباەۆتان سىر تارتىپ قويامىز. سونداي كەزدەسۋدىڭ بىرىندە نۇرحات باۋىرىمىزدىڭ «گۇلنافيس ايتمۇحامبەتوۆا وڭاي شاعىلاتىن وسال جاڭعاق ەمەس, قازاقتىڭ مەرەيىن تاسىتاتىن ناعىز قايسار قىز. بولاشاقتا قازاق ەلىنىڭ نامىسىن قورعايتىن ساناۋلى تاەكۆوندوشىنىڭ بىرەۋى اتانادى» دەگەنى ۇمىتىلماي ءجۇرگەندە, جاس تا بولسا, وسى سپورتتى دامىتسام دەپ, ىستىق-سۋىعىنا ءتوزىپ جۇرگەن جەتەكشى جاتتىقتىرۋشى قاتەلەسپەگەنىنە كوز جەتتى.دۇرىسىندا, تاەكۆوندوشى قارىنداسىمىز گۇلنافيس ايتمۇحامبەتوۆا قازاقستانعا ورالعان سوڭ الەمدىك دودالاردا بيىكتەن كورىنە باستادى. بابى دا, باعى دا بار ەكەنىن دالەلدەدى. 2009 جىلى الەم چەمپيوناتىنا قاتىسىپ, قارسىلاستارىن جويقىن سوققىنىڭ استىنا الدى. ءسويتىپ, جەڭىستىڭ بيىك تۇعىرىندا گۇلنافيس تۇردى. سول ءساتتە قازاقستاننىڭ ءانۇرانى شىرقالىپ, قازاق ەلىنىڭ كوكبايراعى بيىككە كوتەرىلىپ بارا جاتتى. گۇلنافيستىڭ جانارىنا مولدىرەپ جاس تۇندى. ەلدىڭ ابىرويىن اسقاقتاتقان قازاقتىڭ قايسار قىزىنىڭ قۋانىشىنىڭ جاسى. قۋانعاننان ءجۇرەگى اتتاي تۋلاپ تۇردى. سونداي جۇرەك تولقىتقان قۋانىشتى ءساتتى لوندونداعى وليمپيادا ويىندارىنا قاتىسۋعا بەرىلەتىن جولداماعا يە بولعاندا تاعى دا سەزىندى. بۇل جولعى قۋانىش تىپتەن بولەك ەدى.– ءار سايىستىڭ وزىندىك ورنى ەرەكشە, – دەپ ەسكە الادى سول ءبىر قۋانىشتى ءساتىن گۇلنافيس, – بىراق وليمپيادانىڭ ءجونى تىپتەن بولەك. وعان قاتىسۋ ەكىنىڭ بىرىنە بۇيىرا بەرمەيدى. ەلىمنىڭ باعى بار ەكەن, وليمپياداعا قاتىسۋ جولداماسى ماعان بۇيىردى. ەلىمنىڭ دەيتىن سەبەبىم, رەسەيدە جۇرگەندە جەڭىسىمدى قازاقستانعا ارناسام دەۋشى ەدىم, ەندى ەلىمە ورالعاننان كەيىن ءوزىمنىڭ سپورتتاعى جەتىستىگىمنىڭ ءبارىن ەلىمنىڭ جەڭىسى دەيتىن بولدىم. ويتكەنى, ءار قازاقتىڭ ابىرويى –قازاقستاننىڭ ابىرويى, جەتىستىگى –قازاقستاننىڭ جەتىستىگى. ەلدەن ءبولىنىپ, جەكە ابىرويعا بولەنۋ, جەكە جەتىستىككە جەتۋ مۇمكىن ەمەس. سول سەبەپتەن, تۇتاس ءبىر ەلدىڭ نامىسىن قورعاۋ ءۇشىن دوداعا تۇسكەن ەكەنمىن, جەڭىسىمدى دە ەلىمنىڭ جەڭىسى دەۋ ورىندى بولماي ما؟!سپورتتىق سايىستاردىڭ ءبارىندە جەڭىسكە جەتۋ قاجەت دەسەك, ءۇستىرت پىكىر قالىپتاستىرار ەدىك. سپورتشىلار جاقسى ءبىلەدى, ءبىر سايىستا سپورتشىنىڭ جۇلدىزى جانار, ەندى بىردە ساتسىزدىك الدىن وراپ تۇرادى. ازيا ويىندارىنىڭ قولا ءجۇلدەگەرى اتانعاندا, گۇلنافيستىڭ جىگەرى مۇقالعان جوق. كەرىسىنشە, سول سايىستان سوڭ قايراتتانا, قايسارلانا ءتۇستى, شەبەرلىگىن ۇشتاي ءتۇستى. لوندون وليمپياداسىندا توپ جارۋدى ماقسات تۇتتى. سول ماقساتقا جەتۋ ءۇشىن حالىقارالىق دودالاردان قالمادى. ءوزىن وليمپياداعا دايىنداعان جوعارى ساناتتى جاتتىقتىرۋشى, حالىقارالىق دارەجەدەگى تورەشى اسقار توقتاباەۆتىڭ كەڭەسىنە مولىنان قانىقتى. ويتكەنى, ءوزىن ۇدايى جىگەرلەندىرەتىن, قايسارلىعىنا ءتانتى بولاتىن بىلگىر جاتتىقتىرۋشى گۇلنافيستەن جاقسى ناتيجە كۇتەتىن ەدى. بىراق, نەگە ەكەنى بەلگىسىز, گۇلنافيس لوندون وليمپياداسىنا جاتتىقتىرۋشىسىز اتتاندى. بۇل ارينە, گۇلنافيستىڭ جىگەرىن قۇم قىلماسا دا, ەلدىڭ نامىسى سىنعا تۇسكەن باسەكەگە جاتتىقتىرۋشىسىز شىعۋدىڭ قيىندىعىن سەزىندىردى.– قازاقتىڭ وليمپيادا ويىندارىندا ابىرويىن قورعاپ, كوكبايراعىمىزدى بيىكتە جەلبىرەتۋدى ماقسات تۇتىپ ەدىم. ءانۇرانىمىز شىرقالسا دەۋشى ەدىم. بۇل جولى ماقساتىما جەتە المادىم. بىراق, ەرتە مە, كەش پە, قازاق ەلىنىڭ وليمپيادا ويىندارىنداعى مەرەيىن تاسىتۋ جولىنداعى ارمانىما قول جەتكىزەمىن, – دەيدى جانارىندا جاسىن ويناعان قايسار قارىنداسىمىز گۇلنافيس. – مەنىڭ جالعىز ارمانىم – قازاقستانعا وليمپيادانىڭ ءبىر مەدالىن اكەلۋ!ەلىنىڭ, ۇلتىنىڭ نامىسىن ويلاعان, قانىندا قازاقى قايسارلىعى باسىم قارىنداسىمىزدىڭ ۇلتجاندىلىعىنا قالاي ريزا بولمايسىڭ؟!جولداسبەك شوپەعۇل,«ەگەمەن قازاقستان».اتىراۋ.
سۋرەتتە: تاريحي وتانىنا ورالعان قازاقتىڭ قايسار قىزى گۇلنافيس ايتمۇحامبەتوۆا.سۋرەتتى تۇسىرگەن راحىم قويلىباەۆ.