وبلىستىق اكىمدىكپەن جاسالعان مەموراندۋمعا وراي “قازاقمىس” كورپوراتسياسى بيىلعى جىلى بىرقاتار مىندەتتى موينىنا الىپ وتىر. سوعان وراي قامقورلىق نەگىزىنەن اتالعان كورپوراتسياعا قاراستى كاسىپورىندار جايعاسقان وڭىرلەرگە جاسالماق. ايتالىق, كەن بايىتۋ كومبيناتى جۇمىس ىستەپ جاتقان جەزكەنتتە ساۋىقتىرۋ كەشەنى, ءجۇزۋ باسسەينى جانە مادەنيەت ءۇيى قايتا جوندەلىپ, قاتارعا قوسىلماق. مۇنىڭ سىرتىندا اۋدان ورتالىعى بورودۋليحا مەن كەنشىلەر قالاشىعى اراسىنداعى جول جوندەۋدەن وتكىزىلمەك. اتاعىنان ات ۇرىككەندەي ۇلكەن كاسىپورىن, سونداي-اق مۇنىڭ سىرتىندا گلۋبوكوە اۋدانىندا ەكى بالاباقشا سالىپ بەرۋگە مىندەتتەنىپ وتىر.
سەمەيدە بۇرناعى جىلى ءۇش مىڭ ورىندىق ورتالىق مەشىت قۇرىلىسى باستالىپ كەتكەن ەدى. وكىنىشكە قاراي, داعدارىس سالدارىنان ونىڭ قۇرىلىسى توقىراپ تۇرىپ قالعان. “قازاقمىس” ۇلىلار ەلىندەگى سول مەشىتتىڭ قۇرىلىسىنا دەپ 100 ميلليون تەڭگە بولگەن كورىنەدى. ول, ارينە مۇنداي ۇلكەن مەشىتتىڭ بارلىق قاجەتىن تولىقتاي جابۋعا جەتەدى دەپ ايتا المايمىز. سولاي دەي تۇرعانمەن, كوپ تۇكىرسە كول بولادى دەمەكشى, مۇنى دا داتكە قۋات دەيىك. قالاي دەسەك تە, وسىنداي الىپ كاسىپورىنداردىڭ شالعايداعى وڭىرلەرگە كوڭىل بولە باستاعانىنا قايتىپ قۋانباسسىڭ.
داۋلەت سەيسەن ۇلى, سەمەي.