بەيسەنبى, 7 ماۋسىم 2012 7:09
ءدۇبىر
وليمپياداعا 50 كۇن قالدى
تالدىقورعاندا اۋىر اتلەتيكادان قازاقستان چەمپيوناتى وتۋدە.
1 ماۋسىم كۇنى باستالعان ەل چەمپيوناتى بۇگىن اياقتالادى. بۇل باسەكەنىڭ ەرەكشەلىگى, وندا قازاقستان چەمپيونى دەگەن اتاق ءۇشىن كۇش سىناسۋدان باسقا بيىلعى وليمپيا ويىندارىنا قاتىساتىن زىلتەمىرشىلەردىڭ ەسىمدەرى انىقتالادى.
بەيسەنبى, 7 ماۋسىم 2012 7:09
ءدۇبىر
وليمپياداعا 50 كۇن قالدى
تالدىقورعاندا اۋىر اتلەتيكادان قازاقستان چەمپيوناتى وتۋدە.
1 ماۋسىم كۇنى باستالعان ەل چەمپيوناتى بۇگىن اياقتالادى. بۇل باسەكەنىڭ ەرەكشەلىگى, وندا قازاقستان چەمپيونى دەگەن اتاق ءۇشىن كۇش سىناسۋدان باسقا بيىلعى وليمپيا ويىندارىنا قاتىساتىن زىلتەمىرشىلەردىڭ ەسىمدەرى انىقتالادى.
قازاقستان ۇلتتىق قۇراماسىنىڭ باس باپكەرى الەكسەي ني وسى چەمپيوناتقا ليتسەنزيا العان قىز-جىگىتتەردەن باسقا تاعى ءبىرنەشە بولاشاعىنان ءۇمىت كۇتتىرەتىن سپورتشىلاردى قوسىپ وتىر.
– قازىرگى كەزدە لوندونعا 16 اۋىر اتلەتتىڭ بارۋعا مۇمكىندىگى بار. ولار بىرنەشە ايدان بەرى باس قوسىپ, وزدەرىنىڭ سوڭعى دايىندىقتارىن پىسىقتاۋدا. ولاردىڭ بارلىعى دا تالدىقورعاندا ونەر كورسەتۋدە. ەل چەمپيوناتى 1 ماۋسىم كۇنى باستالعانىمەن, اۋىر اتلەتيكا فەدەراتسياسى باسشىلارىنىڭ شەشىمى بويىنشا, چەمپيوناتتىڭ جۇلدەلەرى ءۇشىن تالاساتىندار ءبىر بولەك جانە وليمپيادا جولدامالارىن ساراپقا سالاتىندار ءبىر بولەك جارىساتىن بولىپ شەشىلدى.
وليمپيادا جولدامالارى ءۇشىن تالاساتىندار اراسىندا ازيا ويىندارى مەن ازيا ءبىرىنشىلىگىنىڭ جۇلدەگەرى كيريلل پاۆلوۆ (77 كگ), الەم چەمپيوناتىنىڭ قولا جۇلدەگەرى ۆلاديمير كۋزنەتسوۆ (85 كگ ), وليمپيا ويىندارىنىڭ چەمپيونى, الەمنىڭ ءۇش دۇركىن چەمپيونى يليا يلين, الەم چەمپيونى ۆلاديمير سەدوۆ, ازيا چەمپيوناتىنىڭ ەكى دۇركىن جۇلدەگەرى الماس وتەشەۆ, ارلي چونتەي, فارحاد حاركي, جاستار اراسىنداعى الەم چەمپيوناتىنىڭ جۇلدەگەرى الەكساندر زايچيكوۆ (94 كگ) جانە ازيا چەمپيونى, ازيا ويىندارىنىڭ قولا جۇلدەگەرى سەرگەي يستومين (105 كگ) بولسا, ايەلدەر اراسىندا الەمنىڭ ەكى دۇركىن چەمپيوندارى ءزۇلفيا چينشانلو (53 كگ) مەن مايا مانەزا (63 كگ), وليمپيا ويىندارىنىڭ كۇمىس جۇلدەگەرى يرينا نەكراسوۆا (69 كگ), الەمنىڭ ەكى دۇركىن چەمپيونى سۆەتلانا پودوبەدوۆا مەن جاستار اراسىنداعى الەم چەمپيوناتىنىڭ ءجۇلدەگەرى اننا نۇرمۇحامەدوۆا (75 كگ) جانە وليمپيا ويىندارىنىڭ قولا جۇلدەگەرى ماريا گرابوۆەتسكايا مەن جاسوسپىرىمدەر جانە جاستار اراسىنداعى الەم چەمپيونى نادەجدا نوگاي (+75 كگ) كۇش سىناسادى.
مىنە, وسىلاردىڭ ىشىنەن قايسىسىنىڭ لوندونعا جولداما الاتىنى وزدەرىنىڭ كورسەتكەن ناتيجەلەرىنە بايلانىستى بولادى. اۋىر اتلەتيكا فەدەراتسياسىنىڭ باس حاتشىسى مەڭدىحان ءتاپسىر ۇمىتكەرلەردىڭ ەل چەمپيوناتىنداعى ناتيجەلەرى الەمدىك رەيتينگتىڭ كوش باسىندا تۇرعان زىلتەمىرشىلەردىڭ كورسەتكىشتەرىمەن سالىستىرىلاتىنىن ءمالىمدەدى. ونىڭ ايتۋىنشا, چەمپيوناتتا كىمنىڭ ناتيجەسى جاقسى بولادى, سول وليمپيادا جولداماسىنا يەلىك ەتەدى. تالدىقورعانداعى چەمپيوناتتا ليتسەنزيا ءۇشىن تارتىستى بولاتىنىن باس باپكەر الەكسەي ءنيدىڭ سوزىنەن دە اڭعارۋعا بولادى.
ءبىز سول كەزدە ەشكىمنىڭ اتاق-داڭقىنا قاراماۋعا ءتيىسپىز. جاڭىلىسپاي, تەك مىقتىلاردىڭ مىقتىسىن عانا وليمپياداعا تاڭداپ الۋىمىز كەرەك. ويتكەنى, سپورتتىڭ بۇل تۇرىنە مەملەكەت تاراپىنان ۇلكەن قولداۋ كورسەتىلۋدە, – دەيدى ول.
قازاقستان چەمپيوناتى اياقتالعاننان كەيىن ۇلتتىق قۇراما مۇشەلەرى تالدىقورعاننىڭ ىرگەسىندەگى تەكەلى قالاسىنا جينالىپ, وقۋ-جاتتىعۋ جيىنىن جالعاستىراتىن بولادى.
بەت قاتتالىپ جاتقاندا تالدىقورعاندا ءوتىپ جاتقان ەل چەمپيوناتىندا مىنا سپورتشىلار ۇزدىك ناتيجە كورسەتىپ, وليمپيادا جولداماسىنا يە بولدى. ەرلەر اراسىندا يليا يلين, الماس وتەشەۆ, ارلي چونتەي, فارحاد حاركي, قىزدار اراسىندا مايا مانەزا, ءزۇلفيا چينشانلو, سۆەتلانا پودوبەدوۆا مەن اننا نۇرمۇحامەدوۆا ەندى ۇلتتىق قۇراما ساپىندا لوندون تورىندە ونەر كورسەتەدى.
داستان كەنجالين,
«ەگەمەن قازاقستان».
––––––––––
سۋرەتتەردە: يليا يلين, الماس وتەشەۆ, ءزۇلفيا چينشانلو.
________________________________________
قولدا – 95 جولداما!
كەشە لوندون وليمپياداسىنا جولداما العان تاعى 3 سپورتشىنىڭ ەسىمى بەلگىلى بولدى. سونىڭ ەكەۋى جەڭىل اتلەتتەر بولسا, بىرەۋى بەسسايىسشى.
جەڭىل اتلەتتەرىمىزدەن جولداماعا سىرىقپەن سەكىرۋشى (پرىجكي س شەستوم) نيكيتا فيليپپوۆ پەن 3 000 مەترگە جۇگىرۋگە قاتىساتىن ارتەم كوسينوۆ يە بولدى. الدىڭعىسى الماتى قالاسىنىڭ تۋماسى. 1991 جىلى تۋعان. سپورتتىڭ وسى تۇرىمەن اينالىسقانىنا بىرنەشە جىل بولعان. ازىرشە ول حالىقارالىق جارىستاردا ايتارلىقتاي جەتىستىكتەرگە جەتپەسە دە ەلىشىلىك جارىستاردا وزىنە سىرىقپەن سەكىرۋشى باسەكەلەستەردى شاق كەلتىرمەي ءجۇر. ال ارتەم كوسينوۆ بولسا, 1986 جىلى تالدىقورعان قالاسىندا تۋعان. وليمپياداعا جولدامانى ول رەسەي اشىق چەمپيوناتىندا 3 000 مەترگە جۇگىرۋ جارىسىندا 8 ءمينوت 31,06 سەكونت ناتيجە كورسەتىپ جەڭىپ الدى.
ءۇشىنشى جولدامانى العان سپورتشىمىزدىڭ ەسىمى – پاۆەل يلياششەنكو. قازىرگى بەسسايىستا سىنعا تۇسەتىن وتانداسىمىز بىلتىر ارگەنتينادا وتكەن جاسوسپىرىمدەر اراسىنداعى الەم چەمپيوناتىنىڭ كۇمىس جۇلدەگەرى اتانعان. يلياششەنكو – استانا قالاسىنىڭ تۋماسى. 1990 جىلى تۋعان.
ءسويتىپ, جەڭىل اتلەتتەرىمىز وسى كۇنگە دەيىن ەڭ كوپ ليتسەنزيا العان سپورتشىلارىمىز بولدى. ولار 16 جولداماعا يە. ودان كەيىن كوماندامەن 13 ليتسەنزيا العان سۋ دوبىنان ەرلەر قۇراماسى مەن 9 جولدامانى جەڭىپ العان بوكسشىلار بار. ال كەشە تالدىقورعاندا اياقتالعان اۋىر اتلەتيكادان قازاقستان چەمپيوناتىندا 8 جولدامانىڭ يەگەرلەرى انىقتالدى.
بۇعان دەيىن 92 جولدامانى قىزدار اراسىنداعى بوكستان سايدا حاسەنوۆانىڭ جەڭىپ العانى بەلگىلى. ونىڭ ليتسەنزياسى قازاق سپورت تاريحىنا جازىلاتىنى ءسوزسىز. ءويتكەنى, ول قىزدار بوكسىندا تۇڭعىش رەت جولداماعا يە بولىپ وتىر.
_________________________________________
ۇلتتىق وليمپيا كوميتەتى لوندون وليمپياداسىنىڭ الدىنداجانكۇيەرلەردىڭ اتريبۋتتار مەن جانكۇيەرلەر انۇرانىن ۇسىندى.
جوعارىدا سول كيىمدەر مەن جالاۋشالار كورسەتىلگەن. ال انۇراندىەسكەندىر مەن بىرجان حاسانعاليەۆتار جازعان.
___________________________________________
ارعى جاقتان جاڭالىق
رەسەي ۇكىمەتى لوندون وليمپياداسىنا باراتىن دەلەگاتسيانىڭ الكوگولدى ىشىمدىك تۇتىنۋىنا تىيىم سالدى.
مۇنداي شەشىمدى رەسەيدىڭ سپورت جانە تۋريزم مينيسترلىگى جازعى نە قىسقى وليمپيادادا بولسىن قالتالى دەمەۋشىلەردىڭ رەسەيلىك سپورتشىلاردى ويىن-ساۋىق كەشتەرىنە قاتىسۋعا ماجبۇرلەيتىندەرىنە بايلانىستى جاساعانىن ايتتى.
* * *
بىرىككەن اراب امىرلىكتەرىنىڭ زىلتەمىرشى قىزدارىنا لوندون وليمپياداسىندا حيدجابپەن قاتىسۋعا رۇقسات ەتىلدى.
حالىقارالىق اۋىر اتلەتيكا فەدەراتسياسى (IWF) مۇسىلمان قىزداردىڭ تالاپ-تىلەكتەرىن ەسكەرىپ وسىنداي شەشىم شىعاردى.
ءباا-ءنىڭ اۋىر اتلەتيكا فەدەراتسياسىنىڭ پرەزيدەنتى شەيح سۇلتان بين مينجيرين وسى ماسەلەگە بايلانىستى مىناداي پىكىرىن ءبىلدىردى. «بۇل يسلام ەلدەرى ءۇشىن جاقسى جاڭالىق. ءار ادامنىڭ قۇقى ەسكەرىلگەن جاعدايدا حالىقتار اراسىندا ءوزارا سىيلاستىق قالىپتاسادى. ەندى بۇدان بىلاي مۇسىلمانداردى ءدىني كوزقاراسىنا بايلانىستى الالاۋشىلىق بولمايدى دەپ سەنەمىن», دەدى ول.