سەنبى, 14 ءساۋىر 2012 7:04
استانا تورىندە وتكەن بوكستان وليمپياداعا جولداما بەرەتىن حالىقارالىق ءتۋرنيردى ەلىمىزدىڭ ۇلتتىق قۇراماسى ءۇش التىن جۇلدەمەن اياقتادى.
ەڭ جەڭىل, ياعني 49 كيلو سالماقتا ءبىرجان جاقىپ, ءىلياس ءسۇلەيمەنوۆ (52 كگ.) پەن دانيار ەلەۋسىنوۆ (64 كگ.) التىن مەدالدى جەڭىپ الدى. وسى كەزدەسۋلەردە جاقىپ پەن سۇلەيمەنوۆ قارسىلاستارىن ايقىن باسىمدىقپەن جەڭسە, ەلەۋسىنوۆكە جەڭىس تۇركىمەن بوكسشىسى سەردار حۋدويبەرديەۆتىڭ سىرقاتتانىپ, فينالعا شىقپاۋىنا بايلانىستى بەرىلدى. ال, جەڭىل سالماقتاعى ءۇمىتىمىز ءبىرجان جاقىپ ءتۋرنيردىڭ جەڭىمپازى اتانىپ قانا قويماي, وليمپيادا جولداماسىنا يە بولدى.
سەنبى, 14 ءساۋىر 2012 7:04
استانا تورىندە وتكەن بوكستان وليمپياداعا جولداما بەرەتىن حالىقارالىق ءتۋرنيردى ەلىمىزدىڭ ۇلتتىق قۇراماسى ءۇش التىن جۇلدەمەن اياقتادى.
ەڭ جەڭىل, ياعني 49 كيلو سالماقتا ءبىرجان جاقىپ, ءىلياس ءسۇلەيمەنوۆ (52 كگ.) پەن دانيار ەلەۋسىنوۆ (64 كگ.) التىن مەدالدى جەڭىپ الدى. وسى كەزدەسۋلەردە جاقىپ پەن سۇلەيمەنوۆ قارسىلاستارىن ايقىن باسىمدىقپەن جەڭسە, ەلەۋسىنوۆكە جەڭىس تۇركىمەن بوكسشىسى سەردار حۋدويبەرديەۆتىڭ سىرقاتتانىپ, فينالعا شىقپاۋىنا بايلانىستى بەرىلدى. ال, جەڭىل سالماقتاعى ءۇمىتىمىز ءبىرجان جاقىپ ءتۋرنيردىڭ جەڭىمپازى اتانىپ قانا قويماي, وليمپيادا جولداماسىنا يە بولدى.
بۇل سالماقتاعى لوندونعا جولداما باس جۇلدە يەگەرىنە عانا بەرىلەتىن بولعاندىقتان, جاقىپقا فينالدا تەك جاپون قارسىلاسى ناياوا ينونەنى جەڭۋ كەرەك بولاتىن. كەزدەسۋدە ءبىرجان وسى مۇمكىندىكتى جىبەرمەي, بارىن سالىپ ايقاستى. جاپون بوكسشىسى دا وسال ەمەس ەكەن. ول جەكپە-جەك باستالماي جاتىپ, بىرجانعا ۇمتىلىپ, ۇپاي جيناۋعا تىرىستى. بۇعان دەيىن ول ءتاجىك وكىلى اسرور ۆوحيدوۆتىڭ جولىن جارتىلاي فينالدا وراعان بولاتىن. ال تاجىك بوكسشىسىن وسىنداي وليمپياداعا ليتسەنزيا بەرەتىن اسا جاۋاپتى سىندا جەڭۋ دەگەن وڭاي شارۋا ەمەس. ونىڭ ۇستىنە, ۆوحيدوۆ – بىلتىرعى جاسوسپىرىمدەر اراسىنداعى الەم چەمپيونى, ءبىراز حالىقارالىق تۋرنيرلەردە جەڭىپ العان اتاقتارى بار. جاپون جىگىتى بولسا ونداي اتاق-داڭقتارىمەن جانكۇيەرلەرىنە ماقتانا المايتىنىن بىلەمىز. سولاي دەسەك تە ناق وسى جاپون وكىلىنە ۆوحيدوۆتان جولىن تازارتىپ, ءبىزدىڭ ءبىرجانمەن جۇدىرىقتاسۋعا جازدى. فينالدىق ايقاستا ول جاقىپتىڭ عانا ەمەس, جانكۇيەرلەردىڭ ءبىراز جۇيكەسىن جۇقارتتى. بىراق, ءبىزدىڭ تاجىريبەلى بوكسشىمىز 19 جاسار جىگىتكە ەش مۇمكىندىك بەرمەدى. كەزدەسۋدىڭ ءۇش راۋندىندا ول جاپوننىڭ شابۋىلدارىنا تويتارىس بەرىپ, ءوزىنىڭ مىقتى ەكەنىن كورسەتتى. قورىتىندى ەسەپ – 16:11.
وسى ايقاستان كەيىن ءبىرجان بۇكىل كۇشىن شەشۋشى راۋندقا ساقتاعانىن, ەڭ باستىسى لوندون وليمپياداسىنا جولدامانى جەڭىپ العانىن, ويتكەنى تۋرنيردە ونەر كورسەتۋ وعان پسيحولوگيالىق جاعىنان قيىن بولعانىن ايتتى. ونىڭ سەبەبى دە تۇسىنىكتى. ءبىرجان ءوز ەلىمىزدە, ءوز جەرىمىزدە وتكەن تۋرنيردە ليتسەنزيانى جەڭىپ الۋدى عانا ويلادى. ءبىزدىڭ قۋانىشىمىزعا وراي, تۋرنيردە ءبىرجان ناعىز ەرلىك جاسادى! ەرلەگەنى سول, ءوز سالماعىنداعى جالقى جولدامانى جەڭىپ الدى. ەندى وعان وليمپياداعا بار كۇش-جىگەرىن سالۋ كەرەك. ءويتكەنى, وليمپياداعا الەمنىڭ تۇكپىر-تۇكپىرىنەن بوكسشىلاردىڭ سەرۋەندەپ قايتۋعا كەلمەيتىنى بەلگىلى. ءبارى لوندونعا ءبىر ويمەن, ءبىر ماقساتپەن كەلەدى. ءبىرجاننىڭ ءوزى وليمپيادادا ءجۇلدەگەرلەر قاتارىنا قوسىلۋعا تىرىسامىن, بار كۇشىمدى سوعان سالامىن دەيدى. «مەن وليمپياداعا ليتسەنزيا العاندارمەن كەزدەسكەنمىن. جاقسى دايىندالساق, ءبارىن دە جەڭۋگە بولادى», – دەيدى ول. ەندەشە اۋزىڭا ماي, استىڭا تاي, ءبىرجان دەيىك!
كەلەسى سالماقتا شارشى الاڭعا شىققان ءىلياس سۇلەيمەنوۆتىڭ جارتىلاي فينالدا جولدامانى يەلەنگەنىن بىلەمىز. سولاي بولسا دا 52 كيلوداعى بوكسشىمىز جانكۇيەرلەر الدىندا نامىستى قولدان بەرمەي, تۋرنيردىڭ جەڭىمپازى اتانۋ ءۇشىن بارلىق كۇش-جىگەرىن سالىپ, موڭعول جىگىتىنەن ايلاسىن اسىرىپ كەتتى. ەسەپ – 18:12.
بۇل جەكپە-جەكتە سۇلەيمەنوۆپەن كەزدەسكەن موڭعول نيامباياردى تاجىريبەلى بوكسشىلاردىڭ قاتارىنا جاتقىزۋعا بولادى. ول دا استاناعا لوندونعا ليتسەنزيانى عانا ەمەس, باس ءجۇلدەنى جەڭىپ الۋعا كەلگەن بوكسشى. سول سەبەپتەن ول فينالدا بارىن سالىپ ايقاستى. دەگەنمەن, استاناداعى قاجىمۇقان مۇنايتپاس ۇلى اتىنداعى سپورتتا دارىندى بالالارعا ارنالعان مەكتەپ-ينتەرناتتىڭ تۇلەگى قارسىلاسىنا شيراق قيمىلداۋعا مۇمكىندىك بەرمەي, ءۇش راۋندتى دا ساۋاتتى وتكىزىپ, كەزدەسۋدى 18:11 ەسەبىمەن اياقتادى. ال 64 كيلوداعى دانيار ەلەۋسىنوۆ قىزىل باس كيىمىن كيىپ, قولعابىن ءتۇيىستىرىپ تۇرعاندا ونىڭ تۇركىمەن قارسىلاسىنىڭ رينگكە كوتەرىلمەيتىنى جاريالاندى.
وسى كۇنى باسقا ەلدەردىڭ بوكسشىلارى دا جولدامالارىن قالتاسىنا باسىپ, جەڭىمپاز اتاندى. وندا 56 كيلودا جاپون شيۆا تاپا, قىتاي كيانگ ليۋ (60 كگ.), تاعى ءبىر قىتايلىق بوكسشى كيونگ مايتيتۋەرسۋن (69 كگ.) باس جۇلدەنى يەلەندى. كەيىن قىتاي ۇلتتىق قۇراماسىنان انىقتاعانىمىزدا بۇل بوكسشىنىڭ ۇلتى ۇيعىر ەكەنىن بىلدىك. ونىڭ جەكە باپكەرىنىڭ ۇلتى دا ۇيعىر بولىپ شىقتى. كەلەسى سالماقتا وزبەك اببوس اتوەۆ (75 كگ.), ءۇندى سۋميت سانگۆان (81 كگ.), 91 كيلودا يران ءالي مازاحەري مەن اسا اۋىر سالماقتا قىتاي جانگ جيلەي تۇعىردىڭ بيىك ساتىسىنا كوتەرىلدى. وسى كەزدەسۋلەردە جانكۇيەرلەر بەيجىڭ وليمپياداسىندا ەركەبۇلان شىناليەۆتىڭ موينىن تىستەپ, دورەكىلىك جاساعان تاجىك جاھون قۇربانوۆ (81 كگ.) پەن ۆاسيلي لەۆيتتىڭ جولىن جارتىلاي فينالدا ءبوگەگەن سۋريالىق موحاممەد گوسسوۋيننىڭ قارسىلاستارىنان جەڭىلگەنىن ايىزى قانىپ تاماشالادى.
جالپى, وسى تۋرنيردە ءۇندىستان, قىتاي, يران وكىلدەرى ءۇش, جاپونيا, موڭعوليا, تاجىكستان, تۇركىمەنستان مەن وزبەكستان بوكسشىلارى ەكى-ەكىدەن, كحدر مەن سۋريا ەلى ءبىر ليتسەنزيانى يەلەندى. ال ءبىزدىڭ قۇراما تۋرنيردە ءۇش جولدامانى جەڭىپ الدى. ءسويتىپ, بىلتىر باكۋدە ءوتكەن الەم چەمپيوناتىنداعى 5 ليتسەنزيا مەن قانات ءابۋتالىپوۆتىڭ بۇكىلالەمدىك بوكس سەرياسىنىڭ جەكە چەمپيوناتىندا جەڭىپ العان جولداماسىن قوسقاندا ەلىمىز قۇراماسى 9 بوكسشىمەن وليمپياداعا باراتىن بولدى.
كەشە بوكس جانكۇيەرلەرى ءۇشىن تاعى ءبىر جاڭالىق حابارلاندى. حالىقارالىق اۋەسقوي بوكس قاۋىمداستىعى مەن قازاقستان بوكس فەدەراتسياسىنىڭ اراسىندا 2013 جىلى ەلىمىزدە ەرەسەكتەر اراسىنداعى الەم چەمپيوناتىن وتكىزۋ تۋرالى كەلىسىمگە قول قويۋ ءراسىمى ءوتتى. وعان ايبا پرەزيدەنتى چينگ كۋو-ۆۋ مەن بوكس فەدەراتسياسىنىڭ پرەزيدەنتى تيمۋر ق ۇلىباەۆ قاتىستى.
داستان كەنجالين.
سۋرەتتەردە: ءبىرجان جاقىپ; ءىلياس سۇلەيمەنوۆ.
سۋرەتتەردى تۇسىرگەن ورىنباي بالمۇرات.