جۇما, 28 قىركۇيەك 2012 6:55
وڭتۇستىك كورەيادا (رەسمي اتاۋى – كورەيا رەسپۋبليكاسى) بيىل سايلاۋ وتەدى. پرەزيدەنتتىكتەن ۇمىتكەردىڭ ءبىرى پاك كىن حە – بيلىكتەگى «سەنۋرۋ» پارتياسىنىڭ وكىلى. ونىڭ باستى ەرەكشەلىگى – ول ەلدى 1961-1978 جىلداردا بيلەگەن ديكتاتور پاك چون ءحيدىڭ قىزى.
جۇما, 28 قىركۇيەك 2012 6:55
وڭتۇستىك كورەيادا (رەسمي اتاۋى – كورەيا رەسپۋبليكاسى) بيىل سايلاۋ وتەدى. پرەزيدەنتتىكتەن ۇمىتكەردىڭ ءبىرى پاك كىن حە – بيلىكتەگى «سەنۋرۋ» پارتياسىنىڭ وكىلى. ونىڭ باستى ەرەكشەلىگى – ول ەلدى 1961-1978 جىلداردا بيلەگەن ديكتاتور پاك چون ءحيدىڭ قىزى.
بۇل ەرەكشەلىك بيلىك ءۇشىن كۇرەستە وعان كومەكتەسە مە, جوق زيانىن تيگىزە مە؟ ءبىراز ەلدە ايتۋلى قايراتكەرلەردىڭ, بيلىك ءتىزگىنىن ۇستاعان تۇلعالاردىڭ بالالارى (كوبىنە قىزدارى), ءبىر جاعى اكە بەدەلى كومەگىمەن دە, جەڭىسكە جەتىپ جاتادى. ال پاك كىن حە ءۇشىن بۇكىل الەمگە ايتۋلى ديكتاتور رەتىندە بەلگىلى بولعان اكەسىنىڭ ورنى قانداي بولماق دەگەندە, ساراپشىلاردىڭ پىكىرى ءارتۇرلى: بىرەۋلەرى كومەكتەسەدى دەسە, ەكىنشىلەرى قارسى پىكىردى قولدايدى.ءسىرا, ۇمىتكەر ونى قالاي پايدالانا بىلەدى دەگەن ءۇشىنشى پىكىردىڭ قيسىنى كوپتەۋ-اۋ. ال پاك كىن حە وسى جولعا ايرىقشا ءمان بەرىپ وتىر. ول جاقىندا عانا ارناۋلى ءباسپاسوز جيىنىن وتكىزىپ, ءوزىنىڭ اكەسىنىڭ بيلىگى جايىندا مالىمدەمە جاسادى. جانە ول حالىق اراسىندا ۇلكەن پىكىر تۋدىردى. «ۇكىمەتتىڭ زاڭعا سىيىمسىز ارەكەتتەرىنەن جاپا شەككەندەردىڭ بارلىعىنان, ولاردىڭ جاقىن تۋىستارىنان باسىمدى ءيىپ تۇرىپ كەشىرىم سۇرايمىن», دەدى ول. اكەسى قولدانعان قاتاڭ ءتارتىپ ءادىسىن ەلدىڭ ەكونوميكالىق تابىستارىمەن اقتاۋعا بولمايتىنىن ايتتى.وسى جەردە گەنەرال پاك چون حي تۋرالى ايتا كەتكەن ءجون بولار. ول 1961 جىلى مەملەكەتتىك توڭكەرىس جولىمەن بيلىككە كەلگەن. قاتاڭ بيلىك-اكىمشىلىك باسقارۋ جۇيەسىن ورنىقتىرىپ, ەلدىڭ ەكونوميكاسىن كۇرت كوتەرىپ, ءبۇكىل الەم تانىعان كورەيا رەسپۋبليكاسىنىڭ ودان ءارى دامۋىنا جول اشتى دەپ ەسەپتەلەدى. بىرەۋلەر ونىڭ وسىناۋ قاتقىل ءتارتىبى ەلدىڭ الەمدەگى ورنىن بيىككە كوتەردى دەپ باعالاسا دا, قالىپتاسقان بيلىك تارتىبىنە حالىق قارسىلىعى كۇشتى بولدى. ءتىپتى پرەزيدەنت-گەنەرالدىڭ وزىنە ءبىرنەشە رەت قاستاندىق تا جاسالدى. اقىرى سونىڭ بىرىنەن 1979 جىلى قازا تاپتى.قانداي دا بولسا, اكەنى ايىپتاۋ وڭاي ەمەس. ال ول ساياسي ۇپاي جيناۋ ءۇشىن جاسالار بولسا, ونشا جاراسىمدى دا ءىس ەمەس. پاك كىن حەنىڭ پارتيالاستارى دا, ءتىپتى بۇگىنگى كۇرەستەگى قارسىلاستارى دا ونىڭ بۇل قادامىن قۇپتاپ وتىر. ال ديكتاتوردىڭ قۇربانى بولعانداردىڭ تۋىستارى مۇنى ۇمىتكەردىڭ شىن نيەتى ەمەس, ساياسي مۇددەسى ءۇشىن جاسالعان قادام دەيدى.ال جالپى حالىق قالاي باعالايدى؟ اكەسىنىڭ قاتالدىعىن ايىپتاسا, دەموكرات بولعانى دەر مە ەكەن, جوق بيلىككە جەتۋ ءۇشىن اكەسىنىڭ ارۋاعىنا تيىسۋدەن دە تايىنبايتىن ادام عوي دەر مە ەكەن, ونى الداعى پرەزيدەنتتىك سايلاۋ كورسەتەدى.
ماماديار جاقىپ, «ەگەمەن قازاقستان».