سەيسەنبى, 7 تامىز 2012 7:49
يزرايل مەن ەگيپەت شەكاراسىندا 16 ەگيپەتتىك اسكەري قىزمەتشىنىڭ قازا بولۋىنا سوقتىرعان تەراكت الەمدىك باق-تار نازارىن وزىنە اۋدارىپ وتىر.
سەيسەنبى, 7 تامىز 2012 7:49
يزرايل مەن ەگيپەت شەكاراسىندا 16 ەگيپەتتىك اسكەري قىزمەتشىنىڭ قازا بولۋىنا سوقتىرعان تەراكت الەمدىك باق-تار نازارىن وزىنە اۋدارىپ وتىر.
تەراكت بولىسىمەن-اق ەگيپەت پرەزيدەنتى موحاممەد مۋرسي اسكەري باسشىلىقپەن جانە ارنايى قىزمەتتەر باسشىلارىمەن شۇعىل كەڭەس وتكىزىپ, تەراكت جاساۋشىلاردىڭ اياۋسىز جازالاناتىنىن مالىمدەدى. وسى رەتتە اسكەري كيىم كيگەن لاڭكەستەردىڭ ەگيپەت ارمياسىنىڭ گازا سەكتورىمەن شەكاراداعى بلوكپوستقا شابۋىل جاساعانىن, كەيبىر سودىرلاردىڭ الدىن-الا بازاعا ەنىپ كەتكەنىن ايتا كەتۋ قاجەت. حالىقارالىق جاڭالىق اگەنتتىكتەرى شابۋىل جاساۋشىلاردىڭ ارتىندا سيناي جارتى ارالىنداعى تەررورشىلار مەن پالەستينالىق سودىرلاردىڭ تۇرعانىن حابارلاۋدا.
«كيۋريوسيتي» مارستان فوتوسۋرەتتەر جىبەردى
اقش پرەزيدەنتى باراك وباما «كيۋريوسيتي» اۆتوماتتى اپپاراتىنىڭ مارستىڭ ۇستىنە تابىستى قونۋىنا بايلانىستى ناسا-نى قۇتتىقتادى.
ناسا ماماندارىنىڭ ايتۋىنشا, اپپارات مارستىڭ ۇستىنە مەيلىنشە ءدالدىكپەن قونعان. ماماندار قازىردىڭ وزىندە پلانەتانىڭ ۇستىنەن بىرنەشە فوتوسۋرەتتەر العان كورىنەدى. مارسقا دەيىنگى جولدىڭ 8 ايدان استام ۋاقىتقا سوزىلعانىن اتاپ ءوتۋ قاجەت. وسى مەرزىم ارالىعىندا اپپارات شامامەن 570 ملن. شاقىرىمداي قاشىقتىقتى ۇشىپ وتكەن. اپپاراتتىڭ قۇنى دا وتە قىمبات, ول شامامەن 2,5 ملرد. دوللار تۇرادى. بۇل امەريكالىقتاردىڭ قىزىل پلانەتانى يگەرۋ تاريحىنداعى ەڭ قىمبات ميسسيا بولىپ تابىلادى ەكەن.
ۇكىمەت اسكەرى شەشۋشى شابۋىلعا دايىندالۋدا
سيريانىڭ مەملەكەتتىك تەلەديدارى ەل اسكەرى «جالدامالى تەررورشىلاردى» الەپپو قالاسىندا وتە ۇلكەن شىعىندارعا ۇشىراتتى دەپ حابارلاۋدا.
ەلدىڭ ەكونوميكالىق استاناسى سانالاتىن الەپپودا قازىر وتە اۋىر شايقاستار جۇرۋدە. اسكەري مالىمەتتەرگە قاراعاندا, ەرەۋىلشىلەرگە قارسى كەڭ كولەمدى شابۋىل جاساۋشى ۇكىمەت اسكەرلەرىنىڭ سانى 20 مىڭعا جەتكەن كورىنەدى. ەرەۋىلشىلەر دە ءوز كەزەگىندە ەلەۋلى شابۋىلعا شىعۋعا دايىن ەكەندىكتەرىن مالىمدەۋدە. بۇعان دەيىن سيريا ارمياسى ەرەۋىلشىلەردى ولار وسى ۋاقىتقا دەيىن قولدا ۇستاپ كەلگەن داماسكىنىڭ سوڭعى اۋدانىنان ىعىستىرىپ شىعارعانىن حابارلاعان بولاتىن. ۇكىمەت اسكەرلەرى ارتيللەريانى پايدالانىپ, ەرەۋىلشىلەردى ۇشاقتارمەن جانە تىكۇشاقتارمەن شابۋىلداۋدا.
ىشكى تەرروريزم رەتىندە تانىلدى
اقش پوليتسياسى سيكحتەر حرامىندا ورىن العان قاندى قىرعىندى «ىشكى تەرروريزم» جاعدايى رەتىندە تەرگەيتىنىن حابارلاعان.
قازىرگى ۋاقىتتا ۆيسكونسين شتاتىندا بولعان وقيعانىڭ ناقتى جاعدايلارى ايقىندالا باستادى. بەلگىسىز بىرەۋ ءدىني ءراسىم ءوتىپ جاتقان شاقتا وەك كريك قالاسىنداعى سيكحتەر حرامىنا باسىپ كىرگەن. تەررورشىنىڭ بەتالدى اتقان وعىنان 6 ادام قازا تاپتى. قىلمىس جاسالعان ورىنعا پوليتسيا كەلگەن كەزدە قىلمىسكەرگە قۇقىق قورعاۋشىنىڭ ءبىرىن جارالاۋدىڭ ءساتى تۇسكەن كورىنەدى. بىراق ونىڭ سەرىگى سول جەردە تەررورشىنىڭ كوزىن جويعان. سيكحتەر قوعامداستىعىندا قانىشەر ءوز ورتامىزدان شىققان جوق پا دەگەن ۇرەي دە بار.
يران پرەزيدەنتىن
مەككەگە شاقىردى
ساۋد ارابياسىنىڭ كورولى ابداللا ءىى يران پرەزيدەنتى ماحمۋد احمادينەجادتى تامىز ايىنىڭ ورتاسىندا بولاتىن توتەنشە يسلام سامميتىنە قاتىسۋعا شاقىردى.
يسلام ىنتىماقتاستىعى ۇيىمىنا مۇشە 57 مەملەكەت باسشىلارى قاتىساتىن توتەنشە سامميت مەككەدە 14-15 تامىزدا وتەدى. فورۋمنىڭ ماقساتى, ساۋد ارابياسى سىرتقى ىستەر ءمينيسترى ساۋد ءال-فەيسالدىڭ ايتۋىنشا, جىككە ءبولىنۋ قاۋپى ءتونىپ تۇرعان قازىرگىدەي كۇردەلى ۋاقىتتا يسلام الەمنىڭ بىرلىگىن تاعى ءبىر ايعاقتاۋ. سوعان بايلانىستى ۇيىمداستىرۋشىلار ءۇشىن سامميتكە وسىعان دەيىن قارىم-قاتىناستار تىم كۇردەلى بولىپ كەلگەن تەھران وكىلىنىڭ قاتىسۋى وتە ماڭىزدى بولىپ تابىلادى.
حيروسيما قاسىرەتىنىڭ 67 جىلدىعى اتاپ ءوتىلدى
جاپونيادا امەريكانىڭ حيروسيما قالاسىنا اتوم بومباسىن تاستاعانىنا 67 جىل تولۋى اتالىپ وتۋدە.
قالالىق بەيبىتشىلىك ساياباعىندا ءوتكەن مەموريالدىق راسىمگە ەلدىڭ پرەمەر-مينيسترى ەسيحيكو نودا قاتىسقان. وبەليسكىنىڭ ىشىنە اتوم بومباسىنىڭ قۇربانى بولعان 280.959 ادامنىڭ اتتارى جازىلعان جاڭا ءتىزىم قويىلعان. قۇرباندار قاتارىنا سوڭعى ءبىر جىلدا قوسىلعاندار سانى 5729 ادامدى قۇراپ وتىر. حيروسيما قالاسىنىڭ مەرى ءوز سوزىندە «فۋكۋسيمادا» بولعان اپاتقا دا توقتالىپ وتكەن. سونىمەن بىرگە, ول وزگە ەلدەردى دە الەمدى يادرولىق قارۋدان ازات ەتۋ جونىندەگى حيروسيما مەن ناگاساكي تۇرعىندارىنىڭ تىلەگىنە قوسىلۋعا شاقىردى.
كۋرد سودىرلارى شابۋىل جاسادى
تۇركيانىڭ وڭتۇستىك-شىعىسىندا تۇرىك اسكەرلەرى مەن كۋرد سودىرلارى اراسىندا بولعان قاقتىعىستان 19 ادام قازا تاپقان.
«بوستاندىق» راديوستانساسىنىڭ حابارلاۋىنشا, ۇرىس كۋرد ەرەۋىلشىلەرىنىڭ ءبىر توبى يراكپەن شەكاراداعى ەلدى مەكەندەردىڭ بىرىندەگى اسكەري بەكەتكە شابۋىل جاساعاننان كەيىن باستالعان. قازا بولعانداردىڭ اراسىندا 6 تۇرىك سولداتى, 2 جەرگىلىكتى تۇرعىن جانە 11 كۋرد سودىرلارى بار كورىنەدى. ونىڭ سىرتىندا تۇرىكتىڭ 15 اسكەري قىزمەتشىسى ءتۇرلى دەنە جاراقاتتارىن العان. وسىدان 2 اپتا بۇرىن اتالعان پروۆينتسيادا تۇرىك ارمياسى كۋرد جۇمىسشى پارتياسىنىڭ سودىرلارىنا قارسى ءىرى اسكەري وپەراتسيا وتكىزگەن بولاتىن. ءسوز رەتىندە كۋرد جۇمىسشى پارتياسىن اقش پەن ەۋرووداقتىڭ تەررورلىق ۇيىم دەپ تانيتىنىن دا ايتا كەتۋ قاجەت.
ينتەرنەت ماتەريالدارى نەگىزىندە ازىرلەندى.