بەيسەنبى, 18 قازان 2012 7:49
وتانىمىز – ورتاق ءۇيىمىز
قازىرگى كەزدە قازاق ەلىندە ىنتىماق پەن بىرلىكتىڭ باستى قۇرالى رەتىندە قۇرىلعان قازاقستان حالقى اسسامبلەياسى تابىستى جۇمىس ىستەۋدە. مەملەكەت باسشىسىنىڭ باستاماسىمەن شاڭىراق كوتەرگەن بۇل قوعامدىق ينستيتۋت بۇگىنگە دەيىن وزىنە جۇكتەلگەن مىندەتتى ابىرويمەن اتقارىپ كەلەدى.
بەيسەنبى, 18 قازان 2012 7:49
وتانىمىز – ورتاق ءۇيىمىز
قازىرگى كەزدە قازاق ەلىندە ىنتىماق پەن بىرلىكتىڭ باستى قۇرالى رەتىندە قۇرىلعان قازاقستان حالقى اسسامبلەياسى تابىستى جۇمىس ىستەۋدە. مەملەكەت باسشىسىنىڭ باستاماسىمەن شاڭىراق كوتەرگەن بۇل قوعامدىق ينستيتۋت بۇگىنگە دەيىن وزىنە جۇكتەلگەن مىندەتتى ابىرويمەن اتقارىپ كەلەدى.
سونىڭ ناتيجەسىندە ەلىمىز دوستىق پەن ىنتىماقتىڭ جەرۇيىعى دەۋگە ابدەن لايىق. مۇنى ەلباسى نۇرسۇلتان نازارباەۆتىڭ وسى باعىتتاعى سارا ساياساتى مەن ۇستانىمىنىڭ ارقاسى, وتانىمىزدى مەكەندەگەن جۇزدەن استام ەتنوستىڭ تۇسىنىگىنىڭ مىقتىلىعى, دوستىعىنىڭ بەرىكتىگى دەۋ ورىندى. ونى ۇسىنىلىپ وتىرعان ارنايى بەتتەگى ماقالالار مازمۇنى دا ايعاقتاي تۇسەدى.
دارقاندىق پەن كەڭپەيىلدىك شاراپاتى
ءبىزدىڭ قوعامدىق بىرلەستىگىمىز 1991 جىلى قۇرىلىپ, قازىرگى تاڭدا سلاۆيان حالىقتارىنىڭ سالت-ءداستۇرى مەن مادەنيەتىنىڭ جاڭعىرۋىنا ايتارلىقتاي ۇلەس قوسىپ وتىر. بىرلەستىك – قازاقستان تاۋەلسىزدىگىنىڭ قۇرداسى. وسىنىڭ ءوزى ورتالىقتىڭ ەلمەن بىرگە بارلىق سىندارلى وتكەلدەر مەن سىناقتى كەزەڭدەردى باستان كەشىرىپ, ورتاق وتانىمىزدىڭ گۇلدەنۋىنە وزىندىك ۇلەس قوسقاندىعىن اڭعارتادى ءارى تولعانىستى سەزىمگە بولەيدى.
تاۋەلسىز مەملەكەتىمىز قىسقا مەرزىمدە كوپ ۇلتتىلىعىمەن قوسا, بىرلىگى جاراسقان, قۇت-بەرەكەسى مولايعان ەل رەتىندە الەم نازارىنا ىلىكتى. بۇل ەلباسى, ۇلت كوشباسشىسى ن.ءا.نازارباەۆتىڭ ۇستانىپ وتىرعان ساليقالى ساياساتى مەن تۇڭعىش رەت قازاقستان حالقى اسسامبلەياسىن قۇرعانداعى كورەگەندىگىنىڭ جەمىسى دەۋىمىز كەرەك. قوعامىمىزدىڭ باستى قۇجاتى – پرەزيدەنتتىڭ ءداستۇرلى جولداۋلارى حالىقتار دوستىعى مەن ءوزارا تۇسىنىستىكتى نىعايتۋ ۇرانىمەن باستالاتىنى, بۇل باعىتتا كەڭ كولەمدى جۇمىستار جۇرگىزىلەتىنى ءار شاڭىراقتىڭ شاتتىق نۇرى دەپ ەسەپتەيمىز. سوندىقتان, وبلىسىمىزداعى 41 ەتنومادەني بىرلەستىكتىڭ بارلىعى وزىنە جۇكتەلگەن مىندەتتەردى جوعارى جاۋاپكەرشىلىكپەن ورىنداپ, ەلباسى, قازاقستان حالقى اسسامبلەياسىنىڭ ءتوراعاسى ن.ءا.نازارباەۆتىڭ سەنىمىن اقتاۋعا كۇش سالاتىنى انىق.
بىرلەستىگىمىزدى كوكشەتاۋ قالاسىنىڭ قۇرمەتتى ازاماتى زينايدا سانچيلو 15 جىل بويى باسقارىپ, جەمىستى ءىزىن قالدىردى. ءوزىمىز دە جاستاۋ كەزىمىزدەن ورتالىق جۇمىسىنا ارالاسقاندىقتان, ەڭ باستى قۇندىلىعىمىز – ۇلتتى ۇيىستىرۋشى قازاق حالقىمەن باۋىرمالدىق قارىم-قاتىناستى, دوستىق تۇسىنىستىكتى نىعايتۋدى ءبىرىنشى كەزەكتەگى پارىز سانايمىز. ءبىزدىڭ عانا ەمەس, وبلىسىمىزدى مەكەندەيتىن 130 ۇلىستىڭ تاعدىرىندا قازاق حالقىنىڭ كەڭقولتىق كوڭىلى مەن تاپ-تازا ىقىلاس-پەيىلى ايرىقشا ورىن الادى. بىزدە «ورىس ءانى» حالىقتىق ءان-بي ءانسامبلى, «زلاتو» جاستار ۆوكالدىق ءانسامبلى مەن ءوزىم جەتەكشىلىك ەتەتىن «يۋنوست سينەگوريا», «ۋلىبكا» ۇلگىلى انسامبلدەرى, باسقا دا ءمۇددەلەر بويىنشا ۇيىرمەلەر جۇمىس ىستەسە, كەز كەلگەن كوپشىلىك شارامىز قازاق حالقىنىڭ مارتەبەسىن كوتەرۋمەن بايلانىستىرىلا ءجۇرگىزىلەدى.
بىرلەستىگىمىزدىڭ «ادام جانە ونىڭ تاعدىرى», «جۇلدىزدار جۇلدىزدى جاعادى», «الەم بالا كوزىمەن», «ءازىلىمىز جاراسسا», بالالارعا ارنالعان «جول قوزعالىسى بەلگىلەرى الەمىندە» اتتى ءىس-شارالارىنا قازاق, تاتار, ۋكراين, پولياك, چەشەن-ينگۋش, تاعى باسقا ەتنوستىڭ وكىلدەرى قاتىستى. ءوز كەزەگىندە, ءبىزدىڭ كونتسەرتتىك باعدارلامالارىمىز وزگە ەتنوستاردىڭ ءان-بيلەرىمەن جاراسىمدى ورنەكتەلەتىنىن ايتقىم كەلەدى.
ءبىزدىڭ ورتاق ۇيىمىزدە ۇلتتىق, ءدىني سالت-داستۇرلەر مەن مەرەكەلەر دە ورتاق. ءبىز وسىنداي قىزىقتى دا قۋانىشتى كۇندەردە, تاعىلىمدى شارالاردا ارقاشان بىرگەمىز. مىنە, ۇلىستىڭ ۇلى كۇنى – قۇربان ايت مەيرامى دا كەلىپ قالدى. مۇسىلمان الەمىنىڭ ايتۋلى كۇنىندە قازاق باۋىرلارىمىزدى, باسقا دا اعايىندارىمىزدى ۇلىق مەرەكەمەن شىن جۇرەكتەن قۇتتىقتايمىن. ءبىرتۇتاس قازاقستانىمىز جايناپ جاسارىپ, جاسامپازدىق بەلەستەردەن كورىنە بەرگەي.
گالينا بۋلىچەۆا,
«يستوكي» سلاۆيان مادەني-اعارتۋ
بىرلەستىگىنىڭ ءتورايىمى.
اقمولا وبلىسى.