23-25 قاراشا ارالىعىندا تارازدا كورنەكتى مەملەكەت جانە قوعام قايراتكەرى دىنمۇحامەد قوناەۆتى ەسكە الۋعا ارنالعان حالىقارالىق تۋرنير وتەدى.
وسىدان 11 جىل بۇرىن تۇساۋى كەسىلگەن ەركىن كۇرەس شەبەرلەرى اراسىنداعى جارىس العاشىندا رەسپۋبليكالىق دەڭگەيدە ءوتىپ ءجۇردى. 2016 جىلى حالىقارالىق دارەجەگە كوتەرىلگەن ءتۋرنيردىڭ اۋقىمى كەڭىپ, مارتەبەسى ءوستى. سول كەزدەن باستاپ, الىس-جاقىن شەت مەملەكەتتەردەن كەلگەن بالۋاندار اۋليەاتا توپىراعىندا كوپتەپ تابان تىرەي باستادى. 2016 جىلى ايتۋلى دودادا رەسەي, موڭعوليا, برازيليا, ارمەنيا, گرۋزيا, تاجىكستان, قىرعىزستان جانە وزبەكستان وكىلدەرى كۇش سىناسسا, بىلتىر ولاردىڭ قاتارىنا جاپونيا, پولشا, ۋكراينا, بەلارۋس جانە ءازىربايجان قوسىلدى.
بيىلعى جارىستا 9 ەلدىڭ ورەندەرى ونەر كورسەتەدى. ولار – ءازىربايجان, قىرعىزستان, وزبەكستان, رەسەي, موڭعوليا, بەلارۋس, گرۋزيا, تاجىكستان جانە قازاقستان قۇرامالارى. ايتۋلى جارىستىڭ جالپى جۇلدە قورى 20 ميلليون تەڭگەنى قۇراپ وتىر .
عالىم سۇلەيمەن,
«ەگەمەن قازاقستان»