بۇل كۇندەرى بوكستان ءۇندىستاننىڭ نيۋ-دەلي قالاسىندا ءوتىپ جاتقان ايەلدەر اراسىنداعى الەم چەمپيوناتىندا مىقتىلار مەن وسالداردىڭ ارا-جىگى اجىراپ, الداعى كۇندەرى جۇلدەلى ورىندار ءۇشىن تالاس باستالادى.
ەرتەڭ جارتىلاي فينالدىق سايىستار باستالادى. بۇل مەجەگە قازاقستاننىڭ قوس بوكسشىسى جەتىپ وتىر. ولار – جاينا شەكەربەكوۆا مەن كارينا يبراگيموۆا. 51 كيلو سالماقتا ونەر كورسەتەتىن جاينا شيرەك فينالدا پولشالىق ساندرا درابيكتى ۇتقان بولاتىن. 60 كيلو سالماقتاعى كارينا قىتايلىق يانگ ۆەنلۋدى قاپى قالدىردى. وسىلايشا, ەلىمىزدىڭ قوس ارۋى جۇلدەلى ورىنداردىڭ ءبىرىن يەلەنۋ مۇمكىندىگىنە يە بولىپ وتىر.
جارتىلاي فينالعا ەڭ كوپ جولداما العان قىتاي قۇراماسى. اسپاناستى ەلىنىڭ بەس بىردەي وكىلى وسى مەجەگە سۇرىنبەي جەتتى. ءۇندىستان قۇراماسىنىڭ دا قارقىنى كۇشتى. جەرگىلىكتى بىلعارى قولعاپ شەبەرلەرىنىڭ تورتەۋى جەڭىس تۇعىرىنا كوتەرىلىپ وتىر. سولتۇستىك كورەيا, اقش جانە تۇركيانىڭ ءۇش بوكسشىسى دا ءدال سونداي قۇرمەتكە بولەنۋدە. قازاقستان, جاپونيا, ۋكراينا, تايپەي, گوللانديا جانە گەرمانيادان ەكى سپورتشى جۇلدەلى ورىن ءۇشىن تالاسۋ قۇقىعىن ساقتاپ قالدى. سونداي-اق, موڭعوليا, بولگاريا, اۆستراليا, تايلاند, وڭتۇستىك كورەيا, يرلانديا, ۋەلس, بەلارۋس, كولۋمبيا جانە رەسەيدەن ءبىر-ءبىر بوكسشى جارىستى جالعاستىرماق.
جارتىلاي فينالدىق سايىستار 22-23 قاراشا ارالىعىندا وتسە, 24 قاراشادا اقتىق سىنعا جولداما العان ارۋلار باس جۇلدە ءۇشىن تالاسادى.
عالىم سۇلەيمەن,
«ەگەمەن قازاقستان»