پارلامەنت ماجىلىسىندەگى «نۇر وتان» پارتياسى فراكتسياسىنىڭ مۇشەلەرى اسىلبەك سماعۇلوۆ, ۆاسيلي ولەينيك, سەرگەي سيمونوۆ, ءاليا ساپاروۆا «يۋبيلەينىي» شاعىن اۋدانىنداعى قۇرىلىس الاڭىندا بولدى.
«نۇرلى جەر» باعدارلاماسى بويىنشا بۇل جوبانى ىسكە اسىرۋعا وبلىستىق بيۋدجەتتەن الىنعان نەسيەلەر ەسەبىنەن 4 ملرد. 917 ملن. 148 مىڭ 100 تەڭگە بولىنگەن. قۇرىلىستى 2020 جىلى تاپسىرۋ جوسپارلانعان. بولىنگەن 67 گا جەر تەلىمىندە 47 ءۇي سالىنىپ, 5190 پاتەر پايدالانۋعا بەرىلۋگە ءتيىس. قازىرگى ۋاقىتقا 25 ءۇيدىڭ, ياعني 2172 پاتەردىڭ قۇرىلىسى جۇرگىزىلىپ جاتىر. شاعىن اۋدان قۇرىلىسىندا 380 ادام جۇمىس ىستەيدى. سول سياقتى مۇندا الەۋمەتتىك نىساندار: 280 ورىندىق 2 بالاباقشا, 1200 ورىندىق مەكتەپ, ەمحانا, مۇز سارايى, ۇلتتىق مادەنيەت ورتالىعى, سمارت-ورتالىق جانە قوناقۇي بولادى.
«ەلباسىنىڭ «7-20-25» باعدارلاماسىنىڭ ارقاسىندا بۇگىنگى كۇندەرى ءتۇرلى ماماندىق يەلەرىنە وزدەرىنىڭ ءبىرىنشى تۇرعىن ۇيلەرىنە يە بولۋ ءۇشىن جاقسى مۇمكىندىك تۋىپ وتىر. بۇل باعدارلاما ەلىمىزدە تۇرعىن ۇيگە دەگەن سۇرانىستىڭ اۋقىمدىلىعىنان, جەكە تۇرعىن ءۇي العىسى كەلەتىن جاستارىمىزدىڭ كوپتىگىنەن تۋىنداپ وتىر. تۇتاستاي العاندا, پرەزيدەنتتىڭ «بەس الەۋمەتتىك باستاماسى» بۇگىندەرى قازاقستاندا بەلسەندى تۇردە ىسكە اسىرىلۋدا, سوندىقتان دا ەلباسى ونىڭ بيىلعى جولداۋداعى ءرولىن اتاپ ءوتتى» دەدى «نۇر وتان» پارتياسى فراكتسياسىنىڭ مۇشەسى اسىلبەك سماعۇلوۆ.
حالىق قالاۋلىلارىنىڭ ايتۋىنشا, «7-20-25» باعدارلاماسى قوستاناي وبلىسىندا ەندى عانا ىسكە اسىرىلىپ جاتىر, ونى تولىعىمەن قامتۋ ءۇشىن, نارىقتا تۇرعىن ۇيلەردى كوبەيتۋ قاجەت. سونداي-اق, ولار ايماقتا «نۇرلى جەر» باعدارلاماسى تابىستى يگەرىلىپ جاتقانىن اتاپ ءوتتى.
«تۇرعىن ءۇي جيناق بانكى» وكىلىنىڭ ايتۋىنشا, يۋبيلەينىي» شاعىن اۋدانىندا جىل سوڭىنا دەيىن, 5 ءۇي, سونىڭ ىشىندە 600 پاتەر ىسكە قوسىلماق.
ءنازيرا جارىمبەت,
«ەگەمەن قازاقستان»
قوستاناي