بۇگىنگى ۇكىمەت وتىرىسىندا قر پرەمەر-ءمينيسترى باقىتجان ساعىنتاەۆ وبلىس اكىمدەرى جەكە ينۆەستيتسيا تارتۋ جۇمىستارىنا باسا نازار اۋدارۋلارى قاجەت ەكەنىن ايتتى.
«2018 جىلدىڭ 9 ايىنىڭ قورىتىندىسى بويىنشا ينۆەستيتسيا تارتۋدا بارلىق ءتيىمدى كورسەتكىشتەردىڭ وسكەنىن ءمينيستردىڭ بايانداماسىنان ەستىدىك. جاڭا كاسىپورىندار مەن جۇمىس ورىندارى قۇرىلدى.
ينۆەستورلارعا بارلىق دەڭگەيدە مەملەكەتتىك قولداۋ شارالارى كورسەتىلۋدە. ينۆەستيتسيالار تارتۋدىڭ جاڭا تەتىكتەرى ەنگىزىلىپ جاتىر. دەگەنمەن, نازار اۋداراتىن جايتتار دا بار. شىمكەنت قالاسىنىڭ اكىمى عابيدوللا ءابدىراحىموۆ ءوز بايانداماسىندا قالاعا سالىنعان جەكە ينۆەستيتسيا كولەمى وڭتۇستىك قازاقستان وبلىسى ۇلەسىنەن تومەندىگى بيۋدجەتتىك ينۆەستيتسيانىڭ وسۋىنە بايلانىستى دەپ ايتىپ كەتتى. ەگەر ءبىز وسىلاي قول قۋسىرىپ وتىراتىن بولساق, وندا بۇكىل جۇمىسىمىز بيۋدجەتكە قاراپ قالادى. جالپى ينۆەستيتسيا ءوسىمى شىمكەنتتە 275 پايىز, ال جەكە ينۆەستيتسيا ۇلەسى 65 پايىز. مۇنداي جاعداي سولتۇستىك قازاقستان وبلىسى, اقتوبە, قىزىلوردا, استانا قالالارىندا دا كەزدەسەدى. اتالعان وڭىرلەردە جەكە ينۆەستيتسيا تارتۋ جۇمىسى قارقىندى دەپ ايتا المايمىز. بارلىق جۇمىس - بيۋدجەتتەن, رەسپۋبليكادان اقشا الۋ, ترانسۇلتتىق كومپانيالاردىڭ ينۆەستيتسياسىن اكەلۋ. ال جەكە ينۆەستيتسيا تارتۋ, ولارعا جاعداي جاساۋ جاعى اقساپ تۇر», - دەدى باقىتجان ساعىنتاەۆ.
الداعى ۋاقىتتا ءوڭىر اكىمدەرىنە جەكەلەي ينۆەستيتسيا تارتۋ مالەلەسىن قولعا الۋدى تاپسىردى. ۇكىمەت باسشىسىنىڭ ايتۋىنشا, ينۆەستورلارمەن جۇمىس ىستەۋ ءۇشىن تولىقتاي قاجەتتى جاعداي جاسالعان. اكىمدەردىڭ ارنايى ورىنباسارلارى جانە ءار وڭىردە ينۆەستيتسياعا جاۋاپتى قوسىمشا ورىنباسارلار ەلباسىنىڭ كەلىسىمىمەن تاعايىندالعان.
سونىمەن قاتار, «قازاق ينۆەستىڭ» وكىلدىكتەرى مەن ينۆەستيتسيالىق كومەك كورسەتۋ ورتالىقتارى اشىلدى. وڭىرلىك ينۆەستيتسيالىق شتابتار قۇرىلدى. ۇكىمەت باسشىسى الداعى ۋاقىتتا اتالعان سالاعا جاۋاپتى ورگانداردى جەكەلەي ينۆەستيتسيا تارتۋ ماسەلەسى بويىنشا ناتيجەلى جۇمىس ىستەۋگە شاقىردى.