قازاننىڭ 22-نەن 23-ءشى جۇلدىزىنا قاراعان ءتۇنى «نۇرسۇلتان نازارباەۆ» حالىقارالىق اۋەجايىندا بۋەنوس-ايرەستەگى (ارگەنتينا) ءۇشىنشى جاسوسپىرىمدەر وليمپياداسىنا قاتىسقان سپورتتىق دەلەگاتسيانى سالتاناتتى تۇردە قارسى الۋ ءراسىمى ءوتتى.
ۇزاق جولدان شارشاعانىنا قاراماستان, جاس اتلەتتەر تۋىستارى مەن جاقىندارىنىڭ قۇتتىقتاۋىنا ريزا بولىپ, باق وكىلدەرىنە ەمەن-جارقىن سۇحبات بەردى.
«قازىرگى كوڭىل-كۇيىمدى سوزبەن جەتكىزە المايمىن. ءتۇن جارىمىنا قاراماستان ءبىزدى كۇتىپ الۋعا قانشا ادام كەلگەن؟! ءتىپتى, كوزىمە جاس الدىم. بىزگە قولداۋ كورسەتىپ, ءبىز ءۇشىن تاقىم قىسقان بارشا اعايىنعا راحمەت! جانكۇيەرلەردىڭ سەنىم ۇدەسىنەن شىعا العانىمىز ۇلكەن باقىت», - دەيدى وليمپيادا چەمپيونى, ۆەلوسپورتشى گلەب برۋسەنسكي.
ء«دال وسىلاي قارسى العانى ءۇشىن راحمەت! ارينە, ءبىزدى كۇتىپ الاتىنىن بىلدىك. بىراق تاپ وسىنشا ادام جينالادى دەپ ويلاماعان ەك. كوپ راحمەت!», - دەيدى گلەبتىڭ كوماندالاسى ەۆگەني فەدوروۆ.
«ەلىمىزگە ورالدىق. ەلدە كۇتىپ العان كىسىلەرگە كوپتەن-كوپ راحمەت! جەڭىستى كۇندەرىمىز كوپ بولسىن! العا, قازاقستان!», - دەيدى دزيۋدودان التىن جۇلدەگەر اتانعان بەكارىس سادۋاقاس.
قازاقستان قۇراما كومانداسى ساپىنداعى ەڭ جاس سپورتشىلاردىڭ ءبىرى روزا ابيتوۆا حالىقارالىق كوماندا ساپىندا وليمپيادانىڭ كۇمىس جۇلدەگەرى اتاندى. ول وزىنە قولداۋ كورسەتكەن جانكۇيەرلەرگە العىسىن ايتىپ, ريزاشىلىعىن ءبىلدىردى.
«جىراقتا ءجۇرىپ جەڭىپ العان مەدالدىڭ قانشالىقتى باعالى ەكەنىن ەلگە كەلگەن سوڭ تۇسىنەسىڭ. مۇنداي ساتتەردە ساعان كورسەتىلگەن قولداۋ وتە ماڭىزدى. ەلىمىزدە ءبىز ءۇشىن قۋاناتىن ادامدار كوپ. مىنە, سول جاندار ءۇشىن دە جەڭىسكە جەتكىم كەلەدى. العا, قازاقستان!», - دەپ اعىنان جارىلدى دزيۋدودان جاسوسپىرىمدەر وليمپياداسىنىڭ كۇمىس جۇلدەگەرى مارگاريتا گريتسەنكو.
جاسوسپىرىمدەر وليمپياداسىنىڭ قولا جۇلدەگەرى ستەللا سۋحانوۆا دا كوماندالاستارىنىڭ تىلەگىنە قوسىلىپ, جانكۇيەرلەرگە باسىن ءيدى.
ەسكە سالا كەتەيىك, بۋەنوس-ايرەستە قازاقستان سپورتشىلارى ءتورت التىن, ءۇش كۇمىس جانە ءۇش قولا مەدال جەڭىپ الدى. ودان بولەك, حالىقارالىق كوماندا ساپىندا جاس سپورتشىلارىمىز 1 كۇمىس جانە 1 قولا مەدال يەلەندى. التىن جۇلدەگەرلەر: بەكارىس سادۋاقاس (دزيۋدو), دياس باحراددين (ەسكەك ەسۋ), گلەب برۋسەنسكي مەن ەۆگەني فەدوروۆ (ۆەلوسپورت), ايبەك ورالباي (بوكس). كۇمىس جۇلدەگەرلەر: دامير تويباي (بوكس), تالعات شايكەن (بوكس), مارگاريتا گريتسەنكو (دزيۋدو). قولا جۇلدەگەرلەر: نادەجدا ريابەتس (بوكس), ستەللا سۋحانوۆا (ەسكەك ەسۋ), ءابىلمانسۇر باتىرعالي (كاراتە). حالىقارالىق كوماندا ساپىندا روزا ابيتوۆا (كوركەم گيمناستيكا) كۇمىس, بەكارىس سادۋاقاس (دزيۋدو) قولا مەدال جەڭىپ الدى.