قارعا ادىم جەردى مۇڭ قىلعان دەنساۋلىعىنىڭ كىناراتىنا قاراماي, بالا كۇنىنەن كيىكتىڭ اسىعىنداي شىمىر, ءاماندا الىپ ۇشىپ العا ۇمتىلىپ تۇراتىن شيراق بولىپ ءوستى. مەكتەپتە ءتاۋىر وقىدى. كەم بولسا دا قاتارىنان قالعىسى كەلمەگەن. دەرجاۆينسك قالاسىنداعى كاسىپتىك-تەحنيكالىق كوللەدجدە باعدارلاماشى ماماندىعىن يگەردى.
ەشكىمگە الاقان جايدىرمايتىن, كۇن كورىسىن ايىراتىن كاسىپ ىزدەگەن. تىڭنان سوقپاق سالماق. ءالى ەشكىم قولعا الماعان ىلكىمدى شارۋاعا ءىلىنىپ كەتسە جارار ەدى. ەلدەگى كاسىپكەرلەرمەن اقىلداسىپ, زامانا اۋجايىن اڭداعان. عالامتوردى دا سان رەت ءسۇزىپ ءوتتى. قولىنان كەلەدى-اۋ دەگەن ءبىرتالاي جۇمىستاردىڭ جاي-جاپسارىن كوڭىل ەلەگىنەن وتكىزگەن. اقىرى تاپتى. قالا ىشىندەگى كىشىگىرىم قويمانى جالعا الىپ, بەي-بەرەكەت شاشىلىپ جاتاتىن كارتون قاعازدارىن, اياققا ورالىپ ىبىرسىعان پلاستيك بوتەلكەلەردى, تەسىلىپ, جارامسىز بولىپ قالعان تەمىر ىدىستاردى جيناي باستادى.
بىرەۋدىڭ شارۋاسىنا بىرەۋ قارايلاسا قويا ما, ەشكىمنەن جاردەم تىلەگەن جوق. قالا ءىشىن ارالاپ, وزىنە قاجەتتى شيكىزات ىزدەۋگە كىرىستى. ءىسى وڭىنان وڭعارىلعان سوڭ تەڭگەلەپ بولماسا دا تيانداپ قور جينالا باستاعان. العاشقى اقشاسىنا ۆەلوسيپەد ساتىپ الدى. وعان زات سالاتىن ارنايى جاشىكتەر ورناتتى.
وتكەن جىلدىڭ كۇزىندە «نۇر وتان» پارتياسىنىڭ اۋداندىق فيليالىنا كومەك سۇراپ كەلگەن. ونداعىلار بەتىن قايتارعان جوق. قايتا جاعدايىن ءتۇسىنىپ, جاناشىرلىق كورسەتتى. قاجەتتى قۇجاتتاردى جيناستىرىپ, قويمانى سەنىمگەرلىكپەن پايدالانۋعا قول ۇشتارىن سوزدى.
–سەرگەي ءوز جۇمىسىن كارتون جيناۋدان باستاپ ەدى. ەل ىشىندە مۇنداي زات تولىپ جاتىر عوي. جيناۋى قيىن بولماعانىمەن, وبلىس ورتالىعىنا جونەلتۋ اۋىر بولىپ تۇر,–دەيدى اۋداندىق پارتيا فيليالىنىڭ كەڭەسشىسى ءادىل نۇربەكوۆ.
ەكىنشى توپتاعى مۇگەدەك سەرگەي پريۆالوۆ «باستاۋ بيزنەس» باعدارلاماسىنا قۇجاتتارىن تاپسىرىپ قويعان. الداعى ۋاقىتتا نەسيە الىپ, بيزنەسىمدى كەڭەيتسەم دەگەن نيەتتە.
–الدىمەن قوقىس وڭدەيتىن تسەح اشار ەدىم,–دەيدى جاس كاسىپكەر,–بۇل ءىسىم ءبىر جاعىنان وزىمە پايدالى بولسا, ەكىنشى جاعى قالا تازالىعىنا دا سەپتىگىن تيگىزەدى ەمەس پە. ات كوپىر بولىپ جاتقان قوقىس اتاۋلىنى كادەگە جاراتىپ, قايتادان وڭدەۋ ارقىلى قۇرىلىس زاتتارىن شىعارۋدى ارماندايمىن.
ون ەكى مۇشەسى ساۋ كەي ازامات ەكى قولعا ءبىر كۇرەك تابا الماي وشارىلىپ وتىرعاندا, سەزىمى سەرگەك سەرگەيدىڭ ىسىنە ءتانتى بولاسىڭداعى.
بايقال ءبايادىل,
«ەگەمەن قازاقستان»
اقمولا وبلىسى,
جارقايىڭ اۋدانى.