نۇروتاندىقتار كەشە پاۆلودارلىقتارعا وزدەرىنىڭ سايلاۋالدى تۇعىرناماسىن تانىستىردى. ول «قازاقستان. 2017 ماقساتتارى. جاڭا ءىس-قيمىل جوسپارى» دەپ اتالادى. جالپى, ەل پرەزيدەنتىنىڭ ساليقالى ساياساتىنىڭ ناتيجەسىندە وتانىمىز 20 جىل ىشىندە تولاعاي تابىستارعا قول جەتكىزدى. اۋەلى پارتيا وكىلدەرى سوڭعى جىلدارداعى جەتىستىكتەرىمىزگە توقتالىپ, ىلە-شالا وزدەرىنىڭ تۇعىرنامالارىنا قاراي ويىستى. ونداعى باسىم باعىتتاردىڭ ءبىرى – ەكونوميكانى دامىتۋدىڭ جاڭا ولشەمدەرى. ەكونوميكالىق ءوسۋدىڭ باستى ناتيجەسى – كىرىستەردىڭ ءوسۋى. الداعى 5 جىلدا ءىجو كولەمى 15 مىڭ اقش دوللارىنا دەيىن جەتەدى. پارتيا 2017 جىلعا دەيىن انا مەن بالا ءولىمىن 1,5 ەسەگە دەيىن تومەندەتۋدى ماقسات ەتىپ وتىر. مەملەكەت الەۋمەتتىك جاردەماقى كولەمىن بىرتىندەپ ءوسىرىپ, ال الەۋمەتتىك كومەك پەن زەينەتاقىنىڭ ارقاۋلىق كولەمىن كۇنكورىس دەڭگەيىنەن 60 پايىزعا دەيىن وسىرەتىن بولادى.
رەسپۋبليكالىق شتاب وكىلدەرى باعدارلامالىق قۇجاتتىڭ نەگىزگى باعىتتارىن «دوستىق ۇيىنە» كەلىپ, ەتنومادەني بىرلەستىكتەر وكىلدەرىمەن تالقىلادى. قالا ورتالىعىنداعى ساۋلەتتى عيماراتتىڭ كەڭ زالىندا بالالاردىڭ ءوز حالقىنىڭ ءتىلىن, ادەت-عۇرپىن ۇيرەنۋگە مۇمكىندىك بەرەتىن ۇلتتىق جاڭارۋ مەكتەبى ورنالاسقان. بۇگىنگى كەزدەسۋدە ەتنومادەني بىرلەستىكتەر وكىلدەرى ەلباسى ساياساتى مەن پارتيانىڭ جۇرگىزىپ وتىرعان جۇمىسىنا كەڭ قولداۋ ءبىلدىردى.
نۇروتاندىقتاردىڭ تاعى ءبىر كەزدەسۋى وبلىس ورتالىعىنداعى ءبىر اۋلادا ءوتتى. ايتا كەتەرلىگى, 20 جىلدا وبلىس ورتالىعى وزگەردى, جاقساردى, جاڭا ءزاۋلىم ۇيلەر بوي كوتەردى. تۇرعىن ءۇي-كوممۋنالدىق شارۋاشىلىعىن جاڭعىرتۋ باعدارلاماسى بويىنشا ەسكى ۇيلەردى جوندەۋ جۇمىسى دا باستالىپ كەتتى.
قالالىقتار بارلىق وڭ وزگەرىستەردى پرەزيدەنتتىڭ اتىمەن بايلانىستىرادى.
ساپار بارىسىن قورىتىندىلاعان «نۇر وتان» حدپ توراعاسىنىڭ ءبىرىنشى ورىنباسارى, رەسپۋبليكالىق قوعامدىق شتاب جەتەكشىسى نۇرلان نىعماتۋلين: «نۇر وتان» پارتياسى بۇكىل ەلىمىز بىلەتىن ناعىز حالىقتىق پارتيا بولعاندىقتان, ءبىز ءۇشىن وسىنداي كەزدەسۋلەردىڭ ورنى دا ەرەكشە, ماڭىزى دا زور. سەبەبى, پارتيامىزدىڭ سايلاۋالدى تۇعىرناماسىن جانە بارلىق مەملەكەتتىك باعدارلامالاردى ورىنداۋ ءۇشىن وسى كەزدەسۋلەردە ايتىلعان ۇسىنىستارعا نازار اۋداراتىن بولامىز, – دەدى.
فاريدا بىقاي.
پاۆلودار.