كوكشەتاۋ قالاسىندا ەل تاۋەلسىزدىگىنىڭ 20 جىلدىعى قارساڭىندا تاعى ءبىر ينفراقۇرىلىمدىق ماڭىزدى جوبا – اۋەجايدىڭ ۇشۋ-قونۋ الاڭىن ىسكە قوسۋ ءراسىمى بولدى. العاشقى رەيستى «سكات» اۋە كومپانياسىنىڭ ۇشاعى ورىندادى. سول بورتپەن كەلگەن كولىك جانە كوممۋنيكاتسيا ءمينيسترى بەرىك كاماليەۆتى اقمولا وبلىسىنىڭ اكىمى سەرگەي دياچەنكو, اۋەجاي جانە ۇشۋ-قونۋ جولاعىن قايتا سالۋ جۇمىستارىن اتقارعان مەردىگەرلىك كومپانيالار باسشىلارى قارسى الدى.
كوكشەنىڭ كۇمبىر كۇيى مەن اۋەزدى ءانى قالىقتاعان اۋەجاي باسىنداعى سالتاناتتا جاڭا نىساننىڭ تانىستىرىلۋى وتكىزىلسە, جۋرناليستەر بورتىندا «تاۋەلسىز» دەگەن جازۋى بار ۇشاقتىڭ جولاۋشىلارىمەن اڭگىمەلەسۋگە مۇمكىندىك الدى. «شىمكەنت-الماتى-كوكشەتاۋ» باعىتىمەن ۇشقان «تۇڭعىشتار» ۇشاقتا بارلىق قولايلىلىقتار قاراستىرىلعانىن, الماتىمەن ەكى ارالىققا نەبارى 1 ساعات 45 مينۋت جۇمسالعانىن ريزاشىلىقپەن ايتىپ جاتتى.
سالتانات شاراسىندا ءسوز باستاعان مينيستر ب.كاماليەۆ ەلباسى ن.نازارباەۆتىڭ تىكەلەي باقىلاۋىنداعى جوبانى ىسكە اسىرۋ جوسپاردان وزا جۇزەگە اسىرىلىپ جاتقانىن, ونى قارجىلاندىرۋعا رەسپۋبليكالىق بيۋدجەتتەن 8,3 ملرد. تەڭگە بولىنگەنىن حابارلادى. بۇل قاراجات ەسەبىنەن اۋەجايداعى 30 نىسان تۇبەگەيلى جاڭعىرتىلاتىن بولادى. العاشقى سىناقتان ويداعىداي وتكەن كوكشەتاۋ اۋەجايى زاماناۋي اۋە كەمەلەرىنىڭ بارلىق تۇرلەرىن قابىلداي الاتىنىن دالەلدەدى. بۇل وعان حالىقارالىق ازاماتتىق اۆياتسيا ۇيىمىنىڭ (يكاو) ءبىرىنشى كاتەگورياسىن بەرۋگە لايىقتى دەگەن ءسوز.
ال, كەلەسى جىلى اەروۆوكزال عيماراتىن قايتا سالۋ اياقتالعان سوڭ مينيسترلىك ۇكىمەتكە كوكشەتاۋ قالاسىنىڭ اۋەجايىنا حالىقارالىق دارەجە بەرۋ جونىندە ۇسىنىس ەنگىزەدى. سونىمەن, كوكشەتاۋ قالاسىنىڭ اۋەجايى ەلىمىزدىڭ ون التىنشى حالىقارالىق اۋەجايى بولادى.
قازاقستان 1992 جىلدان بەرى يكاو-نىڭ مۇشەسى جانە وسى حالىقارالىق ۇيىمنىڭ ستاندارتتارى مەن ۇسىنىستارىن ۇستانۋ بويىنشا بارلىق شارالاردى ىسكە اسىرۋدا.
اتاپ ايتقاندا, سوڭعى 5 جىلدا رەسپۋبليكادا 7 اۋەجايدىڭ ۇشۋ-قونۋ جولاقتارىن جانە 5 جولاۋشى تەرمينالىن قايتا سالۋ ءجۇرگىزىلدى. سونىمەن قاتار, 2014 جىلعا دەيىن رەسپۋبليكادا تاعى 11 اۋەجايدا ۇشۋ-قونۋ جولاقتارىن, جولاۋشى جانە جۇك تەرمينالدارىن قايتا سالۋ جوسپارلانۋدا.
اقمولا وبلىسىنىڭ اكىمى سەرگەي دياچەنكو بۇل جوبانىڭ بۋراباي كۋرورتتى ايماعىن دامىتۋدا ماڭىزدى ورىن الاتىندىعىن اتاپ كورسەتسە, باس مەردىگەر «قۇلاگەر» جشس ديرەكتورلار كەڭەسىنىڭ توراعاسى توكەن ەگىنباەۆ قۇرىلىسشىلار ءوز مىندەتتەمەلەرىن ابىرويمەن ورىندايتىندىعىنا سەندىردى.
باقبەرگەن امالبەك,
كوكشەتاۋ.