موڭعوليانىڭ بايان-ولگەي ايماعىنىڭ ورتالىعى ولگەي قالاسىندا نوسەر جاۋىننىڭ سالدارىنان 530 ءۇيدى سۋ باسىپ قالعان. تابيعي اپات كەزىندە 2512 ادام ەۆاكۋاتسيالانىپ, مەكتەپتەر مەن بالاباقشالارعا ورنالاستىرىلدى. اپات سالدارىنان كەلگەن شىعىن كولەمى الدىن الا بولجام بويىنشا 4 ملن اقش دوللارىنان اسىپ وتىر.
نوسەر جاڭبىر شىلدەنىڭ 14-ىنەن باستاپ جاۋعان. جاڭبىر سالدارىنان العاشقى كۇنى 275 ءۇي مەن قورا-قوپسى سۋ استىندا قالسا, 16 شىلدە كۇنگى جاڭبىردان سوڭ سۋ باسقان ۇيلەر سانى 530-عا جەتتى. موڭعوليانىڭ مونتسامە اگەنتتىگى تاراتقان دەرەكتەرگە قاراعاندا, تابيعي اپات كەزىندە 170 ادامعا مەديتسينالىق كومەك كورسەتىلگەن. قازىرگى تاڭدا ايماق باسشىلارى, ايماقتىڭ توتەنشە جاعدايلار جونىندەگى قىزمەتىنىڭ ماماندارى, مەملەكەتتىك مەكەمەلەردىڭ قىزمەتكەرلەرى تاۋدان كەلەتىن تاسقىندى قوبدا وزەنىنىڭ ارناسىنا قاراي بۇرۋ شارالارىن ۇيىمداستىرىپ, كۇنى-ءتۇنى كەزەكشىلىكتە تۇر. مەتەورولوگيا قىزمەتىنىڭ ماماندارى نوسەر جاڭبىر اتالعان ايماقتا شىلدەنىڭ 21-ىنە دەيىن قايتالانۋى مۇمكىن ەكەندىگىن حابارلاۋدا. بۇل ءوز كەزەگىندە وڭىردە سەل قاۋپىن كۇشەيتىپ, اپات شىعىندارىن مولايتىپ جىبەرۋى مۇمكىن. قازىرگى كەزدە قالادا 100-گە جۋىق تەحنيكا اپات زاردابىن جويۋمەن اينالىسىپ جاتىر.
ولگەي قالاسىنىڭ كەيبىر اۋداندارىن 2016 جىلى دا سۋ شايىپ, تاسقىننىڭ سالدارىنان ءبىر بالا كوز جۇمعان بولاتىن. سول جىلى قازاقستان ۇكىمەتى سەل جۇرگەن بايان-ولگەي ايماعىنا 200 مىڭ اقش دوللارى كولەمىندە گۋمانيتارلىق كومەك بەرگەن ەدى. ال قازاقستاندىق بەلسەندى ازاماتتار 2,5 ملن تەڭگە, وڭتۇستىك قازاقستان وبلىسىنىڭ كاسىپكەرلەرى مەن قوعامدىق ۇيىمدارى 3 ملن تەڭگە قارجىلاي كومەك كورسەتكەن-ءدى. سونىمەن قاتار قازاقستاندىقتار تابيعات اپاتىنان زارداپ شەككەن قانداستارعا كيىم-كەشەك پەن كەرەك-جاراق جەتكىزىپ بەرگەن بولاتىن. بيىل دا قايىرىمدىلىق شارالارىن ۇيىمداستىرىپ, باسىنا ءىس تۇسكەن باۋىرلارعا جاردەم ۇيىمداستىرۋدى باستاپ كەتكەن ازاماتتار بار.