ادىلەتتى سايلاۋ – باستى مىندەتىمىز
ەلباسى ن.نازارباەۆ «نۇر وتان» حدپ سايلاۋالدى شتابىنا وسىنداي مىندەت قويدى
كەشە ەل تاۋەلسىزدىگىنىڭ 20 جىلدىعىنا وراي وتكىزىلگەن مەرەكەلىك شارالارمەن قاتار, ءماجىلىس جانە ءماسليحات سايلاۋلارىنا قاتىساتىن ساياسي پارتيالار ءۇشىن ۇگىت-ناسيحات جۇمىستارى باستالىپ تا كەتكەن-ءدى. وسى كۇنى قازاقستان پرەزيدەنتى, «نۇر وتان» حدپ توراعاسى نۇرسۇلتان نازارباەۆ پارتيانىڭ رەسپۋبليكالىق قوعامدىق شتابىندا بولدى.
«نۇر وتان» حدپ ورتالىق اپپاراتىندا ەلباسى ساراپتاما-تالداۋ توبىنىڭ, ءباسپاسوز جانە لوگيستيكالىق ورتالىقتارى جۇمىسىمەن جان-جاقتى تانىستى. سونىمەن بىرگە, وسى جەردە ءوڭىرلەرمەن بەينەماجىلىس تۇرىندە پارتيانىڭ سايلاۋالدى وڭىرلىك شتابىنىڭ جەتەكشىلەرىمەن سەلەكتورلىق كەڭەس ءوتتى. كەڭەستى اشقان پارتيا ءتوراعاسى ءماجىلىس پەن جەرگىلىكتى ءماسليحاتتار سايلاۋىنا دايىندىق بارىسىن جوعارى باعالاپ, ونىڭ ءدال 16 جەلتوقسان كۇنى باستالعانىندا تەرەڭ ءمان جاتقاندىعىن جەتكىزدى. ءتاۋەلسىزدىكتىڭ 20 جىلدىعى قازاقستاننىڭ دامۋىنىڭ جاڭا تاراۋىن اشىپ بەرىپ وتىر. ءماجىلىس سايلاۋى قازاقستاندىق ساياسي ءجۇيەنى دەموكراتيالاندىرۋدىڭ جاڭا كەزەڭى بولۋى كەرەكتىگىن تىلگە تيەك ەتكەن نۇرسۇلتان ءابىش ۇلى ونىڭ قورىتىندىسى بويىنشا تومەنگى پالاتا قۇرامىندا كەمىندە ەكى ساياسي پارتيا بولۋى كەرەكتىگىن ەرەكشە اتادى.
«نۇر وتاننىڭ» رەسپۋبليكالىق قوعامدىق شتابى كەڭەسىنىڭ وتىرىسىندا ەلباسى ەرەكشە كوتەرىڭكى كوڭىل كۇيدە بولدى. زالعا جينالعان پارتيا مۇشەلەرىمەن ەمەن-جارقىن اڭگىمە-دۇكەن قۇرىپ, ارا-اراسىندا ازىلدەپ تە وتىردى. الدىمەن ءسوز «رودينا» جشس ءتوراعاسى يۆان ساۋەرگە بەرىلدى. ول جەكەشەلەندىرۋ كەزىنەن بەرى ءوز شارۋاشىلىعىنداعى 480 ۇلەسشىنىڭ ءالى بىردە-بىرەۋى ۇجىمنان شىقپاعانىن, ونىڭ ارقايسىسىنىڭ ۇلەسى 600 ەسە وسكەندىگىن ورتاعا سالا وتىرىپ, وسىنىڭ بارلىعى دا ەلباسىنىڭ سارابدال ساياساتى ارقاسىندا مۇمكىن بولعاندىعىن جەتكىزدى.
پارلامەنت ءماجىلىسىنىڭ بۇرىنعى دەپۋتاتتارى ايتكۇل ساماقوۆا مەن داريا كلەبانوۆا قاراپايىم تۇرعىندار تاراپىنان ەلباسىعا دەگەن ەرەكشە ءىلتيپاتتىڭ ساقتالىپ وتىرعاندىعىن ايتا كەلىپ, سوندىقتان دا قولداۋعا ءازىر ەكەندىگىنە سەندىردى. ال «حالىق قاھارمانى», گەنەرال-لەيتەنانت باقىتجان ەرتاەۆ وتان قورعاۋ ءوزىنىڭ بالا كەزىنەن ارمانى بولعانىن, سول ارمانىنا قول جەتكىزگەنىن مالىمدەپ, وسى ۋاقىتقا دەيىن جاساعان قىزمەتى وتانىمىزدى قورعاۋ ماقساتىمەن ۇندەس شىققانىن جاريا ەتتى. ول سونداي-اق قازىرگى تاڭدا ارداگەرلەرگە كوپتەگەن قولداۋلاردىڭ بولىپ جاتقاندىعىن اتاپ كورسەتتى.
ال «ساۋاپ» رەسپۋبليكالىق قوعامدىق قورىنىڭ پرەزيدەنتى, جازۋشى باقىتبەك سماعۇل ءتىپتى مەرەكەگە وراي ءبىر شۋماق ولەڭ دە وقىپ بەردى. ول ءوز سوزىندە ءبىزدىڭ 20 جىل ىشىندە قول جەتكەن ەڭ ۇلكەن جەتىستىكتەرىمىزدىڭ ءبىرى – تۇراقتىلىق, تاتۋلىق جانە بەيبىتشىلىك ەكەنىن باسا ايتتى. ول تەك قانا تۇڭعىش پرەزيدەنت نۇرسۇلتان ءابىش ۇلى نازارباەۆتىڭ سىندارلى ساياساتىنىڭ ارقاسىندا قول جەتىپ وتىرعان تابىستار. ولاي بولسا, «نۇر وتان» پارتياسى پرەزيدەنتتىڭ ماڭىزدى باستامالارىن جۇزەگە اسىرىپ, ەلىمىزدى كوركەيتۋگە, حالىقتىڭ تۇرمىسىن جاقسارتۋعا زور ۇلەس قوسىپ كەلە جاتقان حالىقتىق ۇيىم, دەگەن ۇستانىمىمەن دە بولىسە كەتتى.
پارتيا توراعاسىنىڭ ءبىرىنشى ورىنباسارى نۇرلان نىعماتۋلين مەملەكەت باسشىسىن رەسپۋبليكالىق قوعامدىق شتاب سايلاۋعا تولىق دايىن ەكەندىگىنەن حاباردار ەتتى. ول سايلاۋعا دايىندىق بارىسى ونىڭ وتەتىن مەرزىمى انىقتالعان كۇنى-اق باستالىپ كەتكەندىگىن جەتكىزدى. ەلىمىزدىڭ بارلىق وڭىرىندە 226 شتاب قۇرىلعان. قازاقستاننىڭ ءتيىستى سايلاۋ زاڭناماسىنا تولىق جاۋاپ بەرەتىن سايلاۋالدى ناۋقاننىڭ جەلىلىك كەستەسى مەن مەديا-جوسپارى ءازىرلەنىپ, زاڭ ساراپتاماسىنان وتكەندىگىن دە ورتاعا سالدى. سايلاۋالدى شتابتار قۇرامىنا قوعام بەلسەندىلەرى, ۇكىمەتتىك ەمەس ۇيىمدار وكىلدەرى كىرسە, ودان باسقا تاعى 64 مىڭداي ەرىكتى تارتىلعانى بەلگىلى بولدى.
– ەلىمىز تاۋەلسىزدىك العان 20 جىل ىشىندە جەتكەن جەتىستىكتەرى ءبىزدىڭ ۇگىت-ناسيحات جۇمىستارىمىزدىڭ نەگىزگى تاقىرىبىنا اينالادى, سونىمەن بىرگە, قازاقستاندا جۇرگىزىلىپ جاتقان الەۋمەتتىك ساياسات ارتىقشىلىقتارىنا دا باسا نازار اۋدارىلاتىن بولادى, – دەدى رەسپۋبليكالىق شتاب جەتەكشىسى ءوزىنىڭ سوزىندە. – جانە بارلىق سايلاۋشىلارعا سايلاۋالدى تۇعىرنامادا كورسەتىلگەن ماقساتتار مەن مىندەتتەردى جەتكىزۋ كوزدەلۋدە. ناسيحات جۇمىستارى بارىسىندا حالىققا, ءاسىرەسە, جەرگىلىكتى جەرلەردەگى تۇرعىندارعا 20 جىلدىق دامۋدىڭ نەگىزگى تابىستارىن, ەڭ باستىسى – وسى جەتىستىكتەردىڭ ءاربىر قازاقستاندىققا, ءاربىر وتباسىنا قالاي وڭ اسەرىن تيگىزگەنىن ءتۇسىندىرۋ نەگىزگى مىندەت بولىپ تابىلادى. سوندىقتان دا ۇگىت-ناسيحات جۇمىستارى ەلىمىزدىڭ بارلىق ايماقتارىن قامتىپ, ءار ءتۇرلى اۋديتوريا ءۇشىن ناقتى جۇرگىزىلمەك.
سەلەكتورلىق كەڭەس بارىسىندا, سونىمەن قاتار, پارتيانىڭ سايلاۋالدى وڭىرلىك شتابىنىڭ جەتەكشىلەرىنىڭ باياندامالارى تىڭدالدى. مەملەكەت باسشىسى بارلىق پارتيالاردىڭ, سونداي-اق مەملەكەتتىك ورگانداردىڭ سايلاۋالدى ناۋقان كەزەڭىندە قولدانىستاعى زاڭنامانى قاتاڭ ساقتاۋ قاجەتتىگىنە نازار اۋداردى. «ءبىزدىڭ الدىمىزدا ادىلەتتى جانە تازا سايلاۋ وتكىزۋ مىندەتى تۇر. بارلىق بيلىك ورگاندارى تەك ءوز ىستەرىمەن اينالىسىپ, سايلاۋ ناۋقانىنىڭ بارىسىنا كەدەرگى كەلتىرمەۋلەرى كەرەك, – دەدى مەملەكەت باسشىسى قاتاڭ ەسكەرتىپ. – وسىعان وراي باس پروكۋراتۋراعا زاڭنامانىڭ ساقتالۋىن قاداعالاۋدى, ونىڭ بۇزىلۋى فاكتىلەرى تۋرالى شاعىمدار مەن وزگە دە وتىنىشتەرگە جەدەل جاۋاپ قايتارۋدى قامتاماسىز ەتۋدى تاپسىرامىن. سايلاۋدى باقىلاۋدى جانە قوعامدىق تەكسەرۋدى قامتاماسىز ەتۋ باعىتىندا بايلانىس جانە اقپارات مينيسترلىگىنە ورتالىق سايلاۋ كوميسسياسىمەن بىرلەسىپ, بارلىق ساياسي پارتيالاردىڭ بۇقارالىق اقپارات قۇرالدارىنا تەڭ قولجەتىمدىلىگىن قامتاماسىز ەتۋدى جۇكتەيمىن. «نۇر وتان» مەن وزگە دە پارتيالاردىڭ نەگىزگى باسىمدىقتارى بىرلىكتى جانە قوعامنىڭ تىنىشتىعىن نىعايتۋ بولۋى ءتيىس.
ەلباسى كەلەسى كەزەكتە قازىرگى تاڭدا «نۇر وتان» ءوزىنىڭ حالىقتىق پارتيا ەكەنىن دالەلدەگەنىن اتاپ ءوتتى. پرەزيدەنتتىك سايلاۋ قازاقستاندىقتاردىڭ ءجۇرگىزىلىپ وتىرعان ساياساتتى تولىق قولدايتىنىن جانە ۇلتتىڭ ستراتەگيالىق باعىتپەن جۇرۋگە دايىن ەكەنىن انىق كورسەتتى. ءبىزدىڭ پارتيامىزعا 850 مىڭنان استام ادام مۇشە. ەلىمىز بويىنشا 7 مىڭ باستاۋىش ۇيىمدارى جۇمىس ىستەيدى. سوندىقتان ءبىز ادامدارعا نە كەرەكتىگىن, ەلىمىزگە نە قاجەت ەكەندىگىن بىلەمىز. سايلاۋالدى ناۋقان كەزەڭىندە بولاشاق دامۋىمىزدىڭ ستراتەگياسىن, ونىڭ نەگىزگى باسىمدىقتارىن حالىققا ءتۇسىندىرۋ ماڭىزدى, دەدى. اتالعان باسىمدىقتار پارتيانىڭ «ۇلتتىق ءىس-قيمىل جوسپارى. قازاقستان. ماقساتتار 2017» سايلاۋالدى تۇعىرناماسىندا جانە ەلباسىنىڭ «نۇر وتان» حدپ-نىڭ XIV سەزىندە سويلەگەن سوزىندە كورىنىس تاپقان. بۇل – پارتيانىڭ سايلاۋالدى شتابىنىڭ باستى مىندەتى.
جالپى, نۇروتاندىقتار ءوز ماقساتتارىن ءاربىر ۇيگە كىرىپ, ءاربىر سايلاۋشىعا جەتكىزۋگە دايىن. سەبەبى, پارتيانىڭ سايلاۋالدى تۇعىرناماسى – قازاقستاننىڭ الداعى 5 جىلدىق دامۋ جوسپارى. ونىڭ نەگىزىن پرەزيدەنت ستراتەگياسى مەن «حالىقتىڭ داۋىسى» اكتسياسى ارقىلى جينالعان حالىقتىڭ تىلەگى قۇرايدى.
اسقار تۇراپباي ۇلى,
سۋرەتتەردى تۇسىرگەندەر س.بوندارەنكو, ب.وتارباەۆ.
شەرۋىن الماتىدان باستادى
ءماجىلىس سايلاۋىنا قاتىساتىن ساياسي پارتيالار ءۇشىن ناسيحات جۇمىستارىن جۇرگىزۋ باستاۋ السا, ودان قازاقستان پاتريوتتارى پارتياسى دا سىرت قالعان جوق. اتالعان پارتيا مۇشەلەرى العاشقى شارالارىن كەشە الماتىدا وتكىزدى.
الماتى تۇرعىندارى ەلىمىز تاۋەلسىزدىگىنىڭ 20 جىلدىعىن اتاپ ءوتۋدى «تاۋەلسىزدىك مونۋمەنتىنە» گۇل شوقتارىن قويۋ ارقىلى ازاتتىق جولىندا قۇربان بولعان ۇلت باتىرلارى رۋحىنا تاعزىم ەتۋدەن باستادى. قولدارىنا گۇلدەستە ۇستاپ كەلە جاتقان ۇلى وتان سوعىسى مەن ەڭبەك ارداگەرلەرى, قوعام قايراتكەرلەرى مەن ساياساتكەرلەر اراسىندا پارتيا توراعاسى عاني قاسىموۆ تا بولدى.
– ءبىز ەلىمىزدىڭ پروگرەسس جانە دەموكراتيا جولىمەن ىلگەرى ءجۇرۋىن قالايمىز. تاۋەلسىزدىك, ازاتتىق جولىندا جاندارىن پيدا ەتكەندەر وسى كۇندى كورە الماي كەتتى. سوندىقتان بۇگىنگى ۇرپاق ەگەمەندىكتىڭ قادىرىن تۇسىنە بىلۋلەرى ءتيىس... جالپى, وتانىمىز جيىرما جىلدا تولايىم تابىستارعا قول جەتكىزدى, بولاشاقتا وسى باعىتتان تايماي, ەكونوميكاسى دامىعان, ىرگەلى مەملەكەت بولىپ قالىپتاسۋ جولىندا جۇمىس ىستەۋىمىز كەرەك, – دەدى ع.قاسىموۆ.
ايناش ەسالي.
«رۋحانياتقا» ارنالعان فيلم
كەشە سايلاۋ ناۋقانىنا قاتىساتىن پارتيالاردىڭ ءبىرى – «رۋحانيات» سايلاۋالدى ۇگىت-ناسيحات جۇمىستارىنا كىرىسىپ كەتتى. پارتيا ەل ەكونوميكاسىن كوتەرۋدى, الەۋمەتتىك ماسەلەلەردى شەشۋدى, بيىك ادامگەرشىلىكتى جانە رۋحاني باي قوعامدى دامىتۋدى ءوزىنىڭ باستى باعدارى ەتىپ العان.
پارتيانىڭ كەزەكتەن تىس ءVىىى سەزىندە پارتيا توراعاسى سەرىكجان مامبەتالين «رۋحانيات» پارتياسىنىڭ جارعىسىنا وزگەرىس ەنگىزىلگەنىن اتاپ وتە كەلە, پارتيا ۇسىنعان كانديداتتاردىڭ بارلىعى دەرلىك جوعارى ءبىلىمدى, ساياساتتان حابارى بار, كوزى اشىق ادامدار ەكەندىگىن العا تارتقان بولاتىن.
«رۋحانيات» پارتياسى ۇگىت-ناسيحات جۇمىستارىن كەشە الماتىدا پاتريوتتىق ءفيلمنىڭ تۇساۋكەسەرىمەن باستادى. جۋىردا عانا ءتۇسىرىلگەن «ايشا» ءفيلمىنىڭ رەجيسسەرى ەركىن راقىشەۆ 7 سەريالى تۋىندىسىن «رۋحانيات» پارتياسىنا ارنايتىندىعىن جەتكىزدى. رەجيسسەر ەركىن راقىشەۆتىڭ «رۋحانيات» پارتياسىنا قابىلدانعانى كۇنى كەشە عانا ەكەن. «بۇگىنگى تاڭدا ەڭ باستىسى, حالىقتىڭ مۇددەسىن قورعاۋ, سولار ءۇشىن جۇمىس ىستەۋ. بۇعان قوسا, ءتىل ماسەلەسى, جۇمىسسىزدىق ماسەلەسى دە بار», – دەدى رەجيسسەر.
ماماديار جاقىپ.
ۇسىنىس-پىكىرلەر دە تىڭدالادى
كەشە قازاقستاننىڭ «اق جول» دەموكراتيالىق پارتياسىنىڭ ساياسي باسشىلىعى پارتيانىڭ استانا قالاسىنداعى رەسپۋبليكالىق شتابىندا باس قوسىپ, پارلامەنت ءماجىلىسى دەپۋتاتتارىنىڭ سايلاۋىنداعى ساياسي باسەكەگە دايىن ەكەندىكتەرىن مالىمدەدى.
پارتيا وزدەرىنىڭ سايلاۋالدى ۇگىت جۇمىستارىن ەڭ الدىمەن ەلىمىزدىڭ شالعايداعى ەلدى مەكەندەرىنەن باستاپ وتىر. بۇل باعدارلامانىڭ باستاپقى بولىگى بولسا كەرەك. سوندىقتان دا كەزدەسۋلەردە پارتيا وكىلدەرى سايلاۋشىلاردى وزدەرىنىڭ سايلاۋالدى تۇعىرناماسىمەن تانىستىرىپ قانا قويماي, سايلاۋشىلاردىڭ دا ۇسىنىس-پىكىرلەرىن تىڭداپ, ولاردى شەشۋ جولدارىن قاراستىرماق.
«ءبىزدىڭ پارتيا سايلاۋالدى ۇگىت جۇمىستارى باستالعان كۇنى ەلىمىزدىڭ بىرقاتار ەلدى مەكەندەرىندە بولىپ, سايلاۋشىلارمەن كەزدەسۋلەر وتكىزدى, – دەدى «اق جول» پارتياسىنىڭ ءتوراعاسى ازات پەرۋاشەۆ بىزبەن اڭگىمەسىندە. – ەلىمىزدىڭ 8 وبلىسىنداعى سايلاۋشىلارمەن كەزدەسۋ بارىسى كورسەتكەندەي, كوپشىلىكتى الەۋمەتتىك ماسەلەلەر تولعاندىرادى ەكەن. بۇلار نەگىزىنەن كوممۋنالدىق قىزمەت كورسەتۋ تاريفتەرىنىڭ قىمباتشىلىعىنا, جۇمىسسىزدىققا, تۇرعىن ۇيمەن قامتاماسىز ەتۋگە بايلانىستى».
ءاليسۇلتان قۇلانباي.
كەز كەلگەن پارتياعا ۇلكەن سىن
كەشە الماتىدا جالپىۇلتتىق سوتسيال-دەموكراتيالىق پارتياسىنىڭ ەلىمىزدىڭ 16 وڭىرىنەن كەلگەن وكىلدەرىنىڭ قاتىسۋىمەن پارتيانىڭ سايلاۋالدى العاشقى جيىنى بولىپ ءوتتى. پارتيا باسشىلارىنىڭ پىكىرىنشە, ەلىمىزدىڭ پارلامەنتى مىندەتتى تۇردە كوپپارتيالى بولۋى ءتيىس.
«ەلىمىزدىڭ پرەزيدەنتى ايتقانداي, كوپپارتيالى پارلامەنت بولۋى ءۇشىن وعان قازىرگى بيلىككە پىكىرىن اشىق, ورىندى جانە دالەلدى ايتىپ جۇرگەن پارتيا كىرۋ كەرەك دەپ ويلايمىن, – دەدى جالپىۇلتتىق سوتسيال-دەموكراتيالىق پارتياسىنىڭ باس حاتشىسى ءامىرجان قوسانوۆ. – وسىنداي كوپپارتيالى پارلامەنتتى قۇرا الاتىن بولساق, وندا حالقىمىزدىڭ, قوعامىمىزدىڭ دامۋىنىڭ ۇلكەن كەزەڭى بولماق».
جالپىۇلتتىق سوتسيال-دەموكراتيالىق پارتياسىنىڭ سايلاۋالدى تۇعىرناماسىندا, جوعارىدا اتاپ وتكەنىمىزدەي, الەۋمەتتىك سالاعا باسا ءمان بەرىلگەن. ەندى ولار وزدەرى دايىنداعان ءارى قابىلداعان تۇعىرناما اياسىندا ەلىمىزدىڭ بارلىق وڭىرلەرىنە بارىپ, سايلاۋالدى ۇگىت جۇمىستارىن جۇرگىزەتىن بولادى.
جالپىۇلتتىق سوتسيال-دەموكراتيالىق پارتياسىنان پارلامەنت ءماجىلىسىنىڭ دەپۋتاتتىعىنا پارتيالىق تىزىممەن 54 كانديدات تىركەلگەن ەدى. كانديداتتاردىڭ قۇرامىندا بەس ۇلتتىڭ وكىلى بار.
قانات ەسكەندىر.
حالىق جاقسى ومىرگە لايىقتى
كەشە الماتى كوشەلەرىندە تاڭسارىدەن باستاپ حالىقشىل كوممۋنيستەردى قولداۋعا ارنالعان ءۇنپاراقتار تاراتىلىپ, ۇراندار مەن ءتۇرلى-ءتۇستى پلاكاتتار ءىلىندى. پارتيا اتىنان پارلامەنت ءماجىلىسىنىڭ سايلاۋىنا 21 ادام قاتىسۋدا. قكحپ بيىلعى سايلاۋعا تۇعىرناماسىن جان-جاقتى ازىرلەپ, العا قويعان ماقسات-مىندەتتەرىن ايقىنداپ كەلىپ وتىر. پارتيا العا قويعان ءمىندەتتەردىڭ بارلىعى قكحپ-نىڭ «قازاقستاننىڭ بولاشاعى ءۇشىن» دەپ اتالاتىن باعدارلاماسىندا ناقتى كورسەتىلگەن.
پارلامەنت ءماجىلىسى دەپۋتاتتىعىنان ۇمىتكەرلەردىڭ ءبىرى گالينا بايمۇحانوۆانىڭ ايتۋىنشا, قازىرگى كەزدە حالىقتىڭ ءال-اۋقاتىن جاقسارتۋ – وزەكتى ماسەلەلەردىڭ ءبىرى. سوندىقتان ءبىز ەڭبەكشى حالىقتىڭ مۇددەسىن قورعاي وتىرىپ, بايلارمەن ەمەس, كەدەيشىلىكپەن كۇرەسۋدى دە ماقسات ەتۋدەمىز. ءبىزدىڭ ەلدىڭ ءاربىر ازاماتى جاقسى ءومىر سۇرۋگە لايىقتى. دەپۋتاتتىققا كانديداتتاردىڭ ىشىندە دارىگەرلەر, پەداگوگتار, عالىمدار, بيزنەسمەندەر, شارۋالار مەن باسقا دا ماماندىق يەلەرى بار. وسىلايشا ءبىز پارلامەنت ماجىلىسىنە قاراپايىم حالىقتىڭ اراسىنان سۋىرىلىپ شىققان ازاماتتاردىڭ دا سايلانۋى كەرەك ەكەنىن كورسەتكىمىز كەلەدى, دەيدى گ.بايمۇحانوۆا.
قورعانبەك امانجول.
باستى باعدارلارى ايقىن
كەشە ءماجىلىس دەپۋتاتتارىنىڭ سايلاۋى بويىنشا ۇگىت-ناسيحات جۇمىستارى باستالىپ كەتتى. الداعى ساياسي دودادا ءوز كۇش-قايراتىن سىنايتىن مۇنداي پارتيالاردىڭ ءبىرى – قازاقستاننىڭ سوتسيال-دەموكراتيالىق «اۋىل» پارتياسى.
2 جەلتوقسان كۇنى قازاقستاننىڭ سوتسيال-دەموكراتيالىق «اۋىل» پارتياسىنىڭ كەزەكتەن تىس VIII سەزى وتكەن بولاتىن. بۇل جيىندا پارتيانىڭ سايلاۋالدى تۇعىرناماسى بەكىتىلىپ, «اۋىل» پارتياسىنىڭ اتىنان كانديداتتار ءتىزىمى ۇسىنىلعان-تىن. عاني قاليەۆ جەتەكشىلىك ەتەتىن بۇل پارتيانىڭ نەگىزى 2000 جىلى قالانسا, بۇگىندە ونىڭ قۇرامىنا 200 مىڭنان استام ازامات توپتاسىپ ۇلگەرگەن.
پارتيانىڭ VIII سەزىندە: «مەن «اۋىل» پارتياسىنىڭ بەدەلى ءۇشىن قولىمنان كەلگەنشە كۇرەسەمىن. ەندىگى پارلامەنتكە مۇشە بولاتىن ادامداردىڭ ىشىندە قۇرىعاندا ۇلتتىڭ مۇددەسىن قورعايتىن 10 ادام كەرەك», دەپ ءسوز سويلەگەن «مادەنيەت» جۋرنالىنىڭ باس رەداكتورى, جازۋشى دۋلات يسابەكوۆتىڭ, سونداي-اق, «اۋىل» پارتياسى مۇشەلەرىنىڭ كوزدەگەن ماقسات-مىندەتتەرىنىڭ قانشالىقتى دەڭگەيدە جۇزەگە اساتىنى ۋاقىت ەنشىسىندە. ازىرگە, «اۋىل» پارتياسى ەل-ەلدى ارالاپ, ۇگىت-ناسيحات جۇمىستارىنا باتىل كىرىسىپ كەتتى.
ءلايلا ەدىلقىزى.
40 پايىز داۋىس جيناماق
كەشە استانادا «ادىلەت» دەموكراتيالىق پارتياسى سايلاۋ ناۋقانىن باستاپ كەتتى. «ادىلەت» پارتياسىنىڭ توراعاسى ماقسۇت نارىكباەۆتىڭ ايتۋىنشا, پارلامەنت ءماجىلىسىنە سايلانعان جاعدايدا ولار كەڭ كولەمدى كونستيتۋتسيالىق رەفورمالاردى جۇرگىزىپ, زاڭ شىعارۋشى ورگاننىڭ وكىلەتتىگىن ارتتىرۋعا, تاۋەلسىز سوت جۇيەسىن قالىپتاستىرىپ, اتقارۋشى بيلىكتەن تاۋەلسىز وبلىسارالىق وكرۋگتىك جانە حالىقتىق بەيبىت سوت بيلىگىن, ياعني بيلەر سوتىن ورناتۋعا كۇش سالاتىن بولادى.
– قازىرگى كەزدە ەلىمىزدە ازاماتتاردىڭ ەڭبەك قۇقىن زاڭ ءجۇزىندە قورعاۋ قاجەتتىلىگى تۋىنداپ وتىر, – دەيدى م.نارىكباەۆ. – ولاردىڭ اراسىندا اۋلا سىپىرۋشى, بالا باعۋشى, بازاردا ساتۋشى بولىپ جۇمىس ىستەيتىن ادامدار كوپ. ءبىزدىڭ پارتيانىڭ ماقساتى – ءاربىر ازاماتتىڭ زاڭدى مۇددەسى مەن قۇقىن قورعاپ, ولاردىڭ لايىقتى ءومىر سۇرۋىنە جاعداي جاساۋ.
بۇعان دەيىن ادىلەت پارتياسى سايلاۋشىلاردىڭ 10 پايىز داۋىسىن جينايتىنىنا سەنىمدى بولسا, قازىر وزدەرىنىڭ باعدارلاماسىندا كورسەتىلگەن باسىم باعىتتاردىڭ ناتيجەسىندە حالىقتىڭ 40 پايىز داۋىسىن جينايتىندارىنا ۇمىتتەنەتىندەرىن بىلدىرۋدە.
قازىر پارتيالىق تىزىمدەگى 59 ۇمىتكەردىڭ ىشىندە ماقسۇت نارىكباەۆ, ءۋاليحان قايساروۆ پەن مۇرات راەۆ سياقتى ەلىمىزگە بەلگىلى ازاماتتار بار.
داستان كەنجالين.