ماحاببات مەن پاراساتتى قوس ءورىمدى بۇرىمداي قاتار جىرعا قوسقان اقىن ءحانبيبى ەسەنقاراقىزىنىڭ ەسىمى قازاق ەلىنە ەتەنە تانىس. ەلباسىنىڭ «رۋحاني جاڭعىرۋ» باعدارلاماسى اياسىندا وبلىس اكىمدىگىنىڭ قولداۋىمەن اقىن ءحانبيبى جايىق جاعاسىنا كەلىپ, جىر كەشىن وتكىزدى. قازاقستاننىڭ ەڭبەك سىڭىرگەن قايراتكەرى كوپەن امىربەك جۇرگىزگەن شىعارماشىلىق كەش ءماندى دە ماعىنالى بولدى.
قازىنالى اتىراۋ تۋرالى ولەڭىن وقىپ باستاعان كەشتە ءحانبيبى ەسەنقاراقىزى ءومىر تۋرالى تولعانىستارىن دا كورەرمەنمەن ءبولىسىپ وتىردى. ماحامبەت اتىنداعى اكادەميالىق قازاق دراما تەاترىنىڭ ارتىستەرى اقىن ولەڭدەرىن مانەرلەپ وقىسا, بەلگىلى انشىلەر ۇلىقپان جولداسوۆ, حاديشا شالاباەۆا, مەدەت قارامىرزا مەن «سامال» توبى ورىنداعان اندەر دە اتىراۋ اسپانىندا اۋەلەدى.
– مۇنايلى ولكە, شىرايلى ولكە تۋرالى ولەڭدەرىم از ەمەس. سونى اتا جۇرتىمنىڭ الدىندا وقىپ بەرەر ءبىر كۇن بولسا يگى ەدى دەپ كوپتەن بەرى ويلاپ جۇرگەن ارمانىم ورىندالدى, – دەيدى حالىقارالىق «الاش» ادەبي سىيلىعىنىڭ لاۋرەاتى ءحانبيبى ەسەنقاراقىزى.
اقىن كەشىنە قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتورايىمىنىڭ ورىنباسارى ءلاززات سۇلەيمەن دە قاتىسىپ, اق تىلەگىن ارنادى.
باقىتگۇل باباش, «ەگەمەن قازاقستان»
اتىراۋ