جازۋشى شەرحان مۇرتازانىڭ «جۇرەككە ءاجىم تۇسپەيدى» دەگەن شىعارماسىن سۇيسىنە وقىپ, كوڭىل شىركىننىڭ قارتايمايتىنىن جاقسى بىلگەنىمىزبەن, ادامزات بالاسىنىڭ لۇپىلدەگەن وسى ءبىر نازىك مۇشەسىنە سالماق تۇسەتىنىن, ول سونىڭ سالدارىنان ءتۇرلى اۋرۋلارعا ۇشىرايتىنىن جاقسى بىلەمىز. ەلىمىزدەگى ا.ن.سىزگانوۆ اتىنداعى ۇلتتىق عىلىمي حيرۋرگيا ورتالىعى, كارديولوگيا عىلىمي-زەرتتەۋ ينستيتۋتى, ۇلتتىق سالاماتتى ءومىر سالتىن قالىپتاستىرۋ رەسپۋبليكالىق ورتالىعىنىڭ بىلىكتى دارىگەرلەرى وبلىسقا ارنايى كەلىپ, جۇرەك اۋرۋلارى بويىنشا ەمدەۋ جانە الدىن الۋ جونىندە ءوڭىر ماماندارىنا كەڭەستەر بەرىپ, دەرتى دەندەگەن ناۋقاستاردى قابىلدادى. ماقسات – ەلىمىزدىڭ 2011-2015 جىلدارعا ارنالعان «سالاماتتى قازاقستان» باعدارلاماسىن ىسكە اسىرۋ مەن جۇرەك-قان اينالىمى اۋرۋلارىنان قايتىس بولاتىنداردىڭ سانىن ازايتۋعا ۇلەس قوسۋ.
جۇرەك اۋرۋى بويىنشا بۇگىندە وبلىستا 8 مىڭنان استام ادام ەسەپتە تۇر. ستاتيستيكالىق مالىمەتتەر بويىنشا, ەلىمىزدىڭ وڭتۇستىك ايماعى, ونىڭ ىشىندە جامبىل وبلىسىنىڭ تۇرعىندارى اراسىندا جۇرەك دەرتىنە شالدىققاندار سانى كوپ. ول شامامەن 100 000 تۇرعىنعا شاققاندا 222,4 ادامنان كەلەدى ەكەن. ا.ن.سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ باس ديرەكتورى جەتكەرگەن ارزىقۇلوۆتىڭ ايتۋىنشا, وڭتۇستىك حالقىنا جىلىنا 7,5 مىڭ ادامعا جۇرەك اقاۋى بويىنشا ءتۇرلى وتالار جاسالادى. اسىرەسە, بالالار اراسىندا اسقىنداپ وتىرعان ءتۋابىتتى جۇرەك-قولقا كەمىستىگى اۋرۋىنا ۇشىرايتىندارعا حيرۋرگيالىق كومەكتەر اسا كوپ قاجەت. سەبەبى, دۇنيەگە كەلىسىمەن-اق كۇردەلى جۇرەك اقاۋى بايقالعان بالالاردىڭ 80 پايىزى 1 جاسقا جەتپەي وسى دەرتتەن كوز جۇمادى.
وسىعان بايلانىستى جۇرەك دەرتىنەن بولاتىن اۋرۋلاردىڭ الدىن الۋ, ەمدەۋ جۇمىستارىن جانداندىرۋ ءۇشىن كەدەرگى بولىپ وتىرعان ماسەلەلەردى شەشۋگە كومەكتەسۋ جانە اقىل-كەڭەس بەرىپ, وبلىس ءدارىگەرلەرىن الداعى ۋاقىتتا بۇل باعىتتا اتقارىلار جۇمىستاردىڭ جوسپارىمەن تانىستىرىپ, ولارمەن ءوزارا ءتاجىريبە بولىسۋگە كەلگەن بىلىكتى ماماندار بايزاق, جامبىل اۋداندارىندا بولىپ, مۇقتاج ناۋقاستارعا تەكسەرۋ جۇمىستارىن ءجۇرگىزدى. كۆوتا ارقىلى ۇلتتىق عىلىمي-زەرتتەۋ ينستيتۋتتارىنا بارىپ ەمدەلۋ ءجونىندە ءبىرقاتار ناۋقاستارعا جولدامالار بەرۋ تۋرالى ۇسىنىستار جاسادى. جۇرەك-قان تامىرلارى اۋرۋلارى بويىنشا رەسپۋبليكاداعى ۇزدىك سانالاتىن عىلىمي ورتالىقتىڭ بىلىكتى ماماندارى ايماق دارىگەرلەرىمەن جۇمىس ءتاجىريبەلەرى بويىنشا پىكىر الماسىپ, شەبەرلىك سىنىبىن وتكىزدى. سونىمەن قاتار, جۇرەك اۋرۋىنان بولاتىن ءولىم سانىن ازايتۋ ءۇشىن مەكەمەلەردى انگيوگرافيامەن قامتاماسىز ەتىپ, اورتوگرافيالىق جالعاۋ شۋنتتارى ءتارىزدى جولدارمەن ەمدەۋ ءجۇرگىزەتىن كادرلاردى رەزيدەنتۋرادا وقىتىپ, ولارعا جاڭا يننوۆاتسيالىق تەحنولوگيالاردى كەڭىنەن قولدانۋدى ۇيرەتۋ قاجەت ەكەندىگىن ءتۇسىندىردى.
وبلىستا بيىل جۇرەك اۋرۋلارى بويىنشا ناۋقاستارعا ارنالعان 25 ورىنعا ارنالعان كارديوديسپانسەر اشىلعان بولاتىن. سونداي-اق, وبلىستىق اۋرۋحاناداعى شەت مەملەكەتتەردە بىلىكتىلىگىن ارتتىرىپ كەلگەن ارنايى كارديولوگ-ماماندارمەن جاساقتالعان كارديوحيرۋرگيا ءبولىمشەسىنىڭ دە جۇمىس ىستەپ جاتقانىنا 2 جىل بولدى. بولىمشەنى باسقاراتىن تالىپ ءاشيروۆتىڭ ايتۋىنشا, بولىمدە اپتاسىنا 10-15 كۇردەلى وتالار جاسالادى جانە ولاردىڭ بارلىعى ءساتتى اياقتالۋدا.
وپەراتسيادان كەيىن ناۋقاستار تەز ارادا ايىعىپ كەتۋدە. تەك دەر كەزىندە دارىگەردىڭ كومەگىنە جۇگىنبەي, دەرتى اسقىنعاندا عانا اق حالاتتىلاردان جاردەم سۇرايتىندار دا بار.
– سوندىقتان, تۇرعىندار الدىن الا دارىگەرگە كورىنىپ, ءتيىستى ەم قابىلداسا, جۇرەك-قان تامىرلارى اۋرۋلارى ازايعان بولار ەدى, – دەيدى ت.اشيروۆ.
كوسەمالى ساتتىباي ۇلى.
جامبىل وبلىسى.