يولكا سەيىتبايقىزى پوگرانيچنيك اۋىلىنداعى باۋىرجان مومىش ۇلى اتىنداعى مەكتەپتە مۇعالىم بولىپ ەڭبەك ەتەدى.
ەلىمىز ەگەمەندىگىن العان ساتتە-اق, ۇلانباتىردا تۇراتىن سەيىتباي كۇجكەي اعامىز بەن كۇلساي كوكسەگەن اپامىزدىڭ وتباسى اتامەكەنگە قاراي اسىعىس جينالدى. 1992 جىلى ەڭبەك شارتى بويىنشا ەلگە قاراي بەت تۇزەگەن كوشتىڭ ىشىندە العاشقىلاردىڭ ءبىرى بولىپ جەتتى. باياناۋىلدىڭ جۇسىپبەك ايماۋىتوۆ اتىنداعى اۋىلىنا قونىستاندى.
– ايماۋىتوۆتىڭ اتى سول كەزدەن جۇرەككە ورنىقتى. كوشكە رۋح بەرگەندەي. ول كەزدە مەن 8 جاستا ەدىم. كەلە سالا قۇرىلىس باستاپ, اكەم باستاعان كوش 20 شاقتى ءۇي سالدى. وسى ۇيلەرگە ءبارىمىز قونىستاندىق, – دەيدى يولكا ەلگە كەلۋىن ەسكە الىپ.
قازىر سەيىتباي كۇجكەيدىڭ ۇلكەن وتباسى نەمەرە, شوبەرەلەرىمەن اقسۋ قالاسى اۋماعىنا قاراستى پوگرانيچنيك اۋىلىندا تۇرادى. كۇلساي اپامىز «التىن القا» يەگەرى. وكتيابر, نۇرلان, نۇرجان ەرجان, ءبىرجان, يولكا, بەكجان, مارتا, بەرىكبول اتتى 9 بالا تاپقان انا. بارلىعى دا ۇلانباتىر قالاسىندا دۇنيەگە كەلىپتى.
– 5 ۇلدان كەيىن تۋعان ماعان اكەم يولكا دەگەن ەسىم بەرىپتى. مەن 1983 جىلى 29 جەلتوقساندا جاڭاجىلدىق مەرەكە قارساڭىندا ۇلانباتىردا دۇنيەگە كەلدىم, – دەيدى يولكا.
بۇل كۇندەرى يولكانىڭ اعالارى وسى اۋىلدا تۇرادى. بارلىعى دا تەمىر جول بويىندا ەڭبەك ەتۋدە.
– جەڭگەلەرىم مۇعالىمدەر. ءىنىم بەكجان اقسۋ قالاسىندا تۇرادى, زاۋىتتا جۇمىس ىستەيدى. مارقۇم ەرجان اعام ءجاسوسپىرىم كەزىندە موڭعوليادا قايتىس بولدى. كەنجە ءىنىم بەرىكبول قاراشاڭىراقتا اتا-اناممەن بىرگە. ول دا تەمىرجولشى, كەلىنىمىز بالاباقشادا قىزمەتتە, – دەيدى.
يولكا ءسىڭلىمىزدىڭ رامازان, شىڭعىس, كامشات اتتى ءۇش بالاسى ءوسىپ كەلەدى. اتا-اجەلەرىنىڭ ورتاسىندا. جولداسىم ۋلاۆحان داۋلەتبەك تە تەمىرجولشى. ول دا موڭعوليانىڭ ءتوۆ ايماعىندا 1983 جىلى 15 قاراشادا دۇنيەگە كەلىپتى. 2006 جىلى يولكامەن وتباسىن قۇرعان. ۋلاۆحان مەن يولكا 1-سىنىپتان باستاپ بىرگە وقىعان ەكەن. پارتالاستار دوستىعى ماحاببات سەزىمىنە ۇلاسقان.
– بالا كەزىمدە ەسىمىمدى وزگەرتەم دەپ ارمانداۋشى ەدىم, شىنار دەگەن ەسىم ۇنايتىن. شىنار دا قاسيەتتى اعاش قوي. بىراق ءوز اتىما ابدەن ۇيرەنىپ كەتتىم. مەنىڭ اكە-شەشەمدى, وتباسىمدى جىل سايىن باقىتقا, قۋانىشقا جەتكىزەتىن, باسقا ادامداردى تاڭعالدىراتىن ەرەكشە ەسىمىمە قازىر ريزامىن, – دەيدى ول.
فاريدا بىقاي,
«ەگەمەن قازاقستان»
پاۆلودار وبلىسى,
اقسۋ قالاسى,
پوگرانيچنيك اۋىلى
سۋرەتتە: يولكا مەن ۋلاۆحان