كەشە بەيبىتشىلىك جانە كەلىسىم سارايىندا جاستار شىعارماشىلىعىنىڭ «شابىت» XIV حالىقارالىق فەستيۆالى ءوز جۇمىسىن اياقتادى.
بيىلعى جاستار سايىسى قاي جاعىنان دا كوپتىڭ كوڭىلىنەن شىقتى دەپ ايتۋعا بولادى. «باعى جانسىن جاستاردىڭ, ارىستانداي ايباتتى, جولبارىستاي قايراتتى, مەن جاستارعا سەنەمىن!» – دەپ اقىن جىرلاسا, مىنە, سول بالعىن جۇرەكتەر وزدەرىنىڭ كەستەلى ويلارى مەن تىلسىم سىرلارىن وسى جوبا ارقىلى جان-جاقتى جايىپ سالعانىنا جينالعان جۇرتشىلىق كۋا بولدى. استانالىق دانا رىسبەكوۆا مەن داريا سادۋاقاسوۆا تسيرك ونەرىنەن كاسىبي شەبەرلىكتەرىن كورسەتسە, مارجان اراپباەۆا, رۇستەم جۇگىنىسوۆ پەن «ەلىگاي» حور توبى, ءجاميلا جارقىمباەۆا ونەرلەرى كوپشىلىكتى سۇيسىنتكەن. ارمەن قاراي دا التى اتالىم بويىنشا جارىس كورىگى قىزا تۇسكەن. «ۇزدىك ادەبي شىعارما», «بەينەلەۋ ونەرى», «ەسترادا جانرى», «حالىق اندەرى», «كلاسسيكالىق اندەر», «بايان-اككاردەون» نوميناتسيالارىنان باق سىناسقان ونەرپازداردىڭ بيىل وتە كوپ بولعانى كوڭىلگە قۋانىش سەزىمىن ۇيالاتتى.
پرەزيدەنتتىك مادەنيەت ورتالىعىندا ۇلتتىق اندەر اتالىمىنداعى «دومبىرا» جانە «ءداستۇرلى اندەر» نوميناتسياسىنىڭ ءى كەزەڭى ءوتتى. ول ەكى كۇنگە سوزىلدى. «باق شابا ما, باپ شابا ما» دەمەكشى, ۇكىلەرىن جەلبىرەتىپ جارىسقا 42 ونەرپاز قاتىستى. ءار قاتىسۋشى 3 كۇيدەن ورىندادى. ءى كەزەڭدە قاتىسۋشىلار تاريحي كۇيدى, ەكىنشىسىندە ماحامبەتتىڭ «جاۋعا شاپقان», ال ۇشىنشىسىندە قۇرمانعازىنىڭ «اقباي», ءداۋلەتكەرەيدىڭ «توپان», تاتتىمبەتتىڭ «بەستورە», «بوزايعىر», «سارىجايلاۋ» كۇيلەرىنىڭ بىرەۋىن تاڭداپ ورىندادى.
وسىلارمەن قاتار قازىرگى زامان مۇراجايىندا بەينەلەۋ ونەرى مەن قولدانبالى ونەر بويىنشا بايقاۋ ءوتتى. كورمەگە ءتۇرلى-ءتۇستى بوياۋلار, زەرگەرلىك بۇيىمدار, پاننولار جانە اعاشتان, شىنىدان, تاعى دا باسقا بۇيىمداردان جاسالعان قولونەر زاتتارى, بارلىعى 116 ەڭبەك قويىلعان.
«ءداستۇرلى ءاننىڭ» ءىى كەزەڭىندە 43 قاتىسۋشىدان 17-ءسى, ال «دومبىرا» نوميناتسياسى بويىنشا 42 قاتىسۋشىدان 15 كۇيشى عانا باق سىنادى. بايقاۋ قورىتىندىسى بويىنشا 8 قاتىسۋشى ارنايى ديپلوممەن ماراپاتتالدى. ۇكىتاي ەرنيازوۆ ءۇشىنشى ورىندى, بولات دولداشەۆ – ەكىنشى, ال ءبىرىنشى ورىندى ەرجان جامەنكەەۆ يەلەندى. باس جۇلدە ازامات شىناروۆقا بۇيىردى.
«بەينەلەۋ ونەرى» نوميناتسياسىنا قاتىسۋشى جاس سۋرەتشىلەردىڭ كورمە-بايقاۋىنان دا كوكەيگە كوپ نارسە تۇيۋگە بولادى. «دەكوراتيۆتىك-قولدانبالى ونەر» بايقاۋىنىڭ ءى كەزەڭىنە 16-35 جاس ارالىعىنداعى 119 ادامنىڭ قاتىسۋىنىڭ ءوزى بۇل ونەرگە دەگەن جاستاردىڭ ءسۇيىسپەنشىلىگىن اڭعارتقان. ەلىمىزدىڭ 13 وڭىرىنەن, سونداي-اق قىرعىزستاننان, موڭعوليادان, رەسەيدەن دە دارىندى جاستار كەلىپ قاتىسىپتى. كورمەگە سۋرەتشىلەردىڭ, كيىم-كەشەك ديزاينەرلەرىنىڭ, وقىتۋشىلاردىڭ, جوعارعى وقۋ ورنى ستۋدەنتتەرىنىڭ, ءتىپتى, مەكتەپتىڭ جوعارى سىنىپ وقۋشىلارىنىڭ دا جۇمىستارى قويىلعان.
مۇندا ءبىرىنشى ورىن – بوتاگوز زەينەلحانعا, ەكىنشى ورىن – باۋىرجان دوسجانوۆقا, ال ءۇشىنشى ورىن ليۋدميلا سوبولەۆاعا بەرىلدى. حاكىمجان ناۋرىزبايدىڭ اتاۋلى ديپلومىن اقتاۋ قالاسىنان كەلگەن ساۋلە كۋلچيكوۆا السا, ناعيما وتەپوۆا اتىنداعى ارنايى ديپلوم استانالىق ءانۋار شايمەرگەنوۆكە تابىستالدى.
پرەزيدەنت كۋبوگىنا استانالىق ءداستۇرلى ءانشى سىرىم مۇحامەدجانوۆ يە بولدى .
نۇرزادا كۇمىسبەك.
____________________
سۋرەتتەردى تۇسىرگەن ورىنباي بالمۇرات.