قىزىلورداڭىز شولەيتتى ايماق قوي. بۇيرا قۇمدارى بۇعىپ جاتىر. اڭىزاق جەلى وكپەڭنەن وتەدى. سەلدىر وسكەن سەكسەۋىل دەمەسەڭىز, تال-داراقتىڭ دا جايقالىپ تۇرعانى شامالى. جىڭعىلى مەن توراڭعىلىنىڭ اراسىنان اندا-ساندا پىر-پىرلاپ قىرعاۋىل ۇشادى. سول شولەيتتى ايماقپەن كۇن باتىسقا قاراي ءجۇرىپ كەلە جاتساڭىز ۇلكەن جولدىڭ بويىنان ناعي ءىلياسوۆ دەگەن اۋىلعا كەز بولاسىز. اۋىلعا كىرگەننەن جەرۇيىققا تاپ بولعانداي كۇي كەشەرىڭىز انىق. اينالانى گۇل كومكەرىپ جاتىر. تاپ ءبىر گۇلدەن كىلەم توقىعانداي. كوك مايساسى دا جايقالىپ ءوسىپ تۇر. اعاشتارىنا ادام قولىنىڭ تيگەنى سونادايدان بايقالادى. ويتكەنى بويى ءتىپ-تىك, بەتالدى ءوسىپ تۇرعان بۇتاق بايقالمايدى. اۋىلدىڭ قاق ورتاسىندا قاۋىزداردان سۋ اتقىلاپ تۇر. ونىڭ قاسىندا لوندونداعى بيگ-بەننىڭ كوشىرمەسى ورىن تەپكەن. ناعيلىق اعايىن ساعاتتارىن وسى كىشى «بيگ-بەنگە» قاراپ تۇزەيدى. مادەنيەت ءۇيى ينەدەن جاڭا شىققانداي. جىپ-جيناقى. مۇنتازداي تازا. اۋىلداعى اعايىنعا قىزمەت ەتەتىن ورتالىق دۇكەنى قالاداعى سۋپەرماركەتتەردەن ءبىر مىسقال دا كەم ەمەس. دۇكەنمەن جاپسارلاس مەيرامحانا ورنالاسقان. «اسەم» مەيرامحاناسىنا 200 ادام ءبىر مەزەتتە سىيادى. ناعيلىق تۇرعىندار توي-تومالاعىن وسىندا وتكىزەدى. مەكتەبى دە جاڭا سالىنعانداي. كۇردەلى جوندەۋدەن وتكەن. سونىمەن قاتار تۇرعىندارعا قىزمەت كورسەتەتىن ناۋبايحاناسى جانە بار. قىسقاسى, كەلبەتى كەلىسكەن اۋىل. قالا تيپتەس دەسە دە بولعانداي. ال اۋىلعا وسىنداي كورىك بەرگەن كىم؟ ول – ابزال ەراليەۆ دەگەن ابزال ازامات. قىزىلورداداعى كۇرىش وندىرۋمەن اينالىساتىن «ابزال جانە ك» سەرىكتەستىگىنىڭ ءتوراعاسى. وسى اۋىلدىڭ ءتولتۋماسى. اۋىل ءبىر كۇندە وسىنداي بولا قالعان جوق. ونىڭ كوركەيۋىنە ارنايى ماماندار شاقىرىپ, ادامداردى جۇمىلدىردى. اينالاسى ءۇش جىلدىڭ ىشىندە ناعي اۋىلى ادام تانىماستاي وزگەردى. وعان 250 ميلليون تەڭگە كولەمىندە قارجى جۇمسالدى. ءسويتىپ ناعي ءىلياسوۆ اۋىلى زامان تالابىنا ساي جاڭعىردى. وتكەندە ەلباسى سىر ءوڭىرىنە ساپار جاساعاندا وسى اۋىلعا سوقتى. اۋىلدى كورىپ ريزاشىلىعىن ءبىلدىردى.
بۇل اۋىلدىڭ نەگىزى 1931 جىلى قالانعان. جالپى جەر كولەمى 17549 گەكتاردى قۇرايدى. بۇگىندە اۋىلدا 2235 ادام تۇرادى. سونداي-اق, اۋىلدا 5 شارۋا قوجالىعى جۇمىس جاساپ جاتىر.
وسىندايدا وي كەلەدى: قازاق اۋىلدارىنان شىققان كاسىپكەر جىگىتتەر كوپ قوي. سولاردىڭ ءبارى ابزال ەراليەۆتەن ۇلگى السا. ءسويتىپ ءوز اۋىلدارىن كوركەيتسە دەيسىڭ. سوندا قازاقستاندا كورىكسىز اۋىل بولماس ەدى.
ەرجان بايتىلەس.
قىزىلوردا وبلىسى.