ەلوردانىڭ «سارىارقا» ۆەلوترەگىندە ۆەلوترەكتەن الەم كۋبوگىنىڭ ءبىرىنشى كەزەڭى بولىپ ءوتتى. وعان الەمنىڭ 43 ەلىنەن كەلگەن 312 سپورتشى وليمپيادا ويىندارىنىڭ جولداماسى ءۇشىن سايىسقا ءتۇستى. 24 مەدال جيىنتىعى ساراپقا سالىنعان كۋبوكتىق كەزەڭ جەكە جانە كوماندالىق سپرينت, كەيرين, ۇپاي بويىنشا سايىس, ومنيۋم, جۇپتىق مەديسون سايىسى, سكرەتچ جانە جەكە سىنداعى جارىستار توڭىرگىندە بولدى.
جارىستىڭ اشىلۋ سالتاناتىنا حالىقارالىق ۆەلوشاباندوزدار وداعىنىڭ (UCI) پرەزيدەنتى پەت ماككۋەيد پەن ەلىمىز ۆەلوسپورت فەدەراتسياسىنىڭ پرەزيدەنتى قايرات كەلىمبەتوۆ قاتىسىپ, سپورتشىلارعا ءساتتىلىك تىلەدى. سونداي-اق سالتاناتتى شارادا پەت ماككۋەيد قازاقستان پرەزيدەنتى نۇرسۇلتان نازارباەۆتىڭ قازاقستان مەن الەمدەگى ۆەلوسيپەد سپورتىنىڭ دامۋىنا قوسقان ۇلەسىن اسا جوعارى باعالاپ, زور العىسىن ءبىلدىردى جانە UCI-ءدىڭ التىن بەلگىسىن تابىستادى.
جوعارىداعى اتالعان سىندار بويىنشا سايىسقا تۇسكەن ساڭلاقتار ءدۇبىرلى دودادا بارىن سالىپ باقتى. ناتيجەسىندە جالپى ەسەپتە ءبىرىنشى كەزەڭنىڭ الەم كۋبوگىن ءبىر التىن, ەكى كۇمىس جانە بەس قولا مەدالمەن گەرمانيالىق سايىپقىراندار يەلەندى. ەكىنشى ءجۇلدە اۆستراليالىقتارعا بۇيىردى. ولاردىڭ قورجىنىندا ءبىر التىن ءجانە ەكى كۇمىس بار. ال ءۇشىنشى تۇعىرعا ءبىر التىن, ءبىر كۇمىس جانە ءبىر قولا مەدالمەن فرانتسۋز سپورتشىلارى جايعاستى.
– بۇل جارىسقا قاتىسقانىمىزعا ءبىز وتە قۋانىشتىمىز. ارينە, بۇعان ءبىرىنشى كەزەكتە باس جۇلدە العانىمىز سەبەپ ەكەنى بەلگىلى. سونىمەن قاتار, مۇنداعى ويىن الاڭدارى قاتتى ۇنادى. ال ۇيىمداستىرۋ جۇمىستارىنا ايتار العىسىمىز شەكسىز. بۇيىرتسا الداعى ۋاقىتتا دا وسىنداي ءىرى جارىستارعا ەلدەرىڭىزگە كەلۋگە ءبىز قاشاندا ءازىرمىز, – دەدى نەمىستىڭ «Erdgas- 2012» كومانداسى باسپاسوز قىزمەتىنىڭ مەنەدجەرى مايكل حيبنەر.
اتالمىش بايراقتى باسەكە ءوز ءمارەسىنە جەتكەننەن كەيىن بريفينگ وتكىزگەن حالىقارالىق ۆەلوشاباندوزدار وداعىنىڭ پرەزيدەنتى پەت ماككۋەيد جارىستىڭ وتە جوعارى دەڭگەيدە وتكەنىن ءجانە ۇيىمداستىرىلعانىن ايتتى. سونىمەن بىرگە ول استانادا UCI- ءدىڭ تمد جانە ورتالىق ازيا ەلدەرى بويىنشا وكىلدىكتىڭ اشىلاتىندىعىن جانە ونىڭ رەسمي وكىلى قازاقستان ۆەلوسپورت فەدەراتسياسىنىڭ پرەزيدەنتى قايرات كەلىمبەتوۆ بولاتىندىعىن مالىمدەدى.
استانادا جالاۋى كوتەرىلگەن بۇل جارىس الەم كۋبوگىنىڭ ءبىرىنشى كەزەڭى بولسا, ەكىنشى كەزەڭ كولۋمبيانىڭ كالي قالاسىندا وتپەك. قاڭتار ايىندا كۋبوكتىق كەزەڭدى پەكين قارسى السا, جارىستار كەلەر جىلدىڭ اقپانىندا لوندوندا اياقتالادى.
ءابدىراحمان قىدىربەك.
سۋرەتتەردى تۇسىرگەن ورىنباي بالمۇرات.