جالپى, ترامۆايسىز وبلىس ورتالىعىن كوزگە ەلەستەتۋ دە مۇمكىن ەمەس. ويتكەنى, تراۆماي قالاداعى جوعارى سۇرانىسقا يە قوعامدىق كولىك بولىپ تابىلادى. 40 جىلدان اسا ۋاقىت بويى ترامۆاي قالا تۇرعىندارىنا قىزمەت ەتىپ كەلەدى. كۇنىنە مىڭ ادامعا دەيىن تاسىمالدايتىن ترامۆاي باسقارماسىندا بۇل كۇندەرى 115 ترامۆاي ۆاگونى بار بولسا, ونىڭ 86-سى كۇندەلىكتى قوزعالىس باعىتتارىنا جىبەرىلەدى. ال, ەلىمىز بويىنشا ترامۆاي پاۆلوداردان باسقا وسكەمەندە, الماتىدا, تەمىرتاۋدا بار. سوڭعى كەزدەرى ۆاگون پاركى دە ەسكىردى, جولدارى دا توزدى, ءوز ەلىمىزدە ولاردى جاسايتىن زاۋىت تا جوق, رەسەيدەن جەتكىزىلەدى.
ال, ءبىر ترامۆايدىڭ قۇنى شامامەن 70 ميلليون تەڭگە تۇراتىن كورىنەدى. ەندى مىنە, وسى ءتۇيىندى ماسەلە دە شەشىلگەندەي.
وتكەن اپتادا وبلىس ورتالىعىندا وبلىستىق اكىمدىكتىڭ باستاماسىمەن اشىلعان «قازاقستان-ءسىبىر 2011» حالىقارالىق كورمەسى شەڭبەرىندە «الەۋمەتتىك كاسىپكەرلىك كورپوراتسياسى» ۇلتتىق كومپانياسى» اق-تىڭ جەرگىلىكتى وكىلدىگى پولشا ەلىنەن كەلگەن كاسىپورىن باسشىلارىمەن كەزدەسۋگە مۇمكىندىك الدى. كەزدەسۋ بارىسىندا كەلىسسوزدەر جۇرگىزىلىپ, ءوزارا ىنتىماقتاستىق جونىندە مەموراندۋمعا قول قويىلدى. ياعني, ەكى ەل كاسىپورىندارى قالالىق ترامۆاي باسقارماسىنىڭ تەحنيكالىق ءجۇيەسىن تولىقتاي مودەرنيزاتسيالاۋ, جاڭارتۋ مەن جاڭعىرتۋ, ترامۆاي جولدارىن جوندەۋ جانە ترامۆاي قۇراستىراتىن تسەح اشۋ بويىنشا يننوۆاتسيالىق جاڭا جوبانى ءجۇزەگە اسىرۋعا كەلىستى. پولشا تاراپىنان مەموراندۋمعا ءتورت كومپانيا, ونىڭ ىشىندە ۆارشاۆا ترامۆاي كومپانياسى دا بار, باسشىلارى قول قويدى. ءسويتىپ, ەلارالىق ىنتىماقتاستىق بايلانىستار ارقاسىندا الداعى جىلدارى وبلىس ورتالىعىنىڭ كوشەلەرىندە جاڭادان سالىنعان شويىن جولدارمەن ەۋروپالىق ستاندارتقا ساي ترامۆاي ۆاگوندارى جۇرەتىن بولادى.
وسى مەموراندۋمدارعا ءسايكەس, «ۆارشاۆالىق ترامۆاي» كاسىپورنى وبلىس ورتالىعىنا جاڭا زامان ترامۆايلارىن جەتكىزەدى. بۇل – ءبىر. ەكىنشىدەن, ەۋروپا ترامۆاي جولدارىمەن ءبىزدىڭ جولداردىڭ ايىرماشىلىعى جەر مەن كوكتەي دەيدى. سوندىقتان, وسى ايىرماشىلىقتى جاقىنداتۋ ءۇشىن «پەسا بۋدگوشش» دەگەن كاسىپورىن «تينەس» دەگەن كومپانيامەن بىرلەسىپ وبلىس ورتالىعىنداعى ترامۆاي جولدارىن جوعارى ستاندارتتارعا ساي ءجوندەيتىن بولادى. ۇشىنشىدەن, بۇل كومپانيالار الماتىداعى مەترو قۇرىلىسىنا قاتىسقان كورىنەدى. ولاي بولا, ولار ءۇشىن جەردىڭ بەتىندەگى ترامۆاي جولىن سالىپ بەرۋ تۇك ەمەس شىعار. «الەۋمەتتىك كاسىپكەرلىك كورپوراتسياسى» اق-تىڭ جەرگىلىكتى جەردەگى وكىلدەرىنىڭ ايتۋىنشا, وبلىس ورتالىعى ءۇشىن قۋانىشتى بۇل ءىستىڭ ءجۇزەگە اسۋىنا پولشانىڭ ۇلتتىق ەكونوميكالىق بانكى قارجى بەرىپ وتىرعان كورىنەدى.
فاريدا بىقاي.
پاۆلودار.