«يادروسىز الەم ءۇشىن» حالىقارالىق كونفەرەنتسياسىنىڭ تۇسكە دەيىنگى ماجىلىستەرىنىڭ سوڭىندا قازاقستان رەسپۋبليكاسىنىڭ مەملەكەتتىك حاتشىسى قانات ساۋداباەۆتىڭ قاتىسۋىمەن جۋرناليستەرگە ارنالعان ءباسپاسوز ءماسليحاتى وتكىزىلدى. ونى ءسىم-ءنىڭ جاۋاپتى قىزمەتكەرى رومان ۆاسيلەنكو اشىپ, العاشقى ءسوزدى ق.ساۋداباەۆقا بەردى.
– قۇرمەتتى جۋرناليستەر, باسپاسوز كونفەرەنتسياسىنا قاتىسۋشىلار, دەپ باستادى ول ءوزىنىڭ ءسوزىن. – بۇگىنگى «يادروسىز الەم ءۇشىن» حالىقارالىق فورۋمىنىڭ وسىدان 20 جىل بۇرىن يادرولىق پوليگوندى جاپقان, بۇكىل الەمدە قۋاتى جونىنەن ءتورتىنشى ورىنداعى يادرولىق الەۋەتىنەن ءوز ەركىمەن باس تارتقان قازاقستاندا ءوتىپ وتىرعاندىعىنىڭ وزىندىك ءمانى بار. بۇگىن ءبىزدىڭ جاس ەلىمىزگە الەمنىڭ كوپتەگەن مەملەكەتتەرىنەن پارلامەنتاريلەر, ساياسي جانە مەملەكەت قايراتكەرلەرى, حالىقارالىق ۇيىمدار باسشىلارى, يادرولىق قارۋدى تاراتپاۋ ءجونىندەگى دۇنيەجۇزىلىك ۇدەرىستەردىڭ بەلسەندىلەرى كەلىپ وتىر. بۇل فورۋم قازاقستان پرەزيدەنتى نۇرسۇلتان نازارباەۆتىڭ باستاماسىمەن وتكىزىلۋدە. ودان ءارى ق.ساۋداباەۆ ءمارتەبەلى قوناقتار اراسىنان باسپاسوز ءماسليحاتىنا ماگاتە-ءنىڭ باس ديرەكتورى يۋكيا امانونىڭ, ياسجتشۇ اتقارۋشى حاتشىسى تيبور توتتىڭ, اقش ەنەرگەتيكا مينيسترىنىڭ ءبىرىنشى ورىنباسارى دەنيەل پونەماننىڭ كەلىپ وتىرعانىن اتاپ ءوتتى. بۇگىنگى فورۋمىمىزعا الەمنىڭ كوپتەگەن ەلدەرىنەن وسىنشالىقتى بەدەلدى وكىلدىكتىڭ كەلۋى دۇنيە ءجۇزى قاۋىمداستىعىنىڭ ءبىزدىڭ ەلىمىزدىڭ ءجانە ونىڭ كوشباسشىسىنىڭ عالامدىق قاۋىپسىزدىكتى ساقتاۋعا ءجانە يادرولىق قاتەردى ازايتۋعا قوسقان ۇلەسىنە بەرىلگەن ۇلكەن باعا دەپ ەسەپتەۋ كەرەك. فورۋمداعى باستى وقيعا پرەزيدەنت ن.نازارباەۆتىڭ وسى جيىندا سويلەۋى بولدى. مەملەكەت باسشىسىنىڭ يادروسىز ءالەمگە جەتۋدىڭ ستراتەگيالىق جولدارىن ايقىنداۋى يادرولىق قارۋدى تاراتپاۋ قوزعالىسىنا ناعىز جول كارتاسى رەتىندە قولدانىلاتىن بولادى.
فورۋمداعى پىكىرتالاستار بارىسىندا قاتىسۋشىلار ادامزاتتى يادرولىق قارۋدان ازات ەتۋدىڭ, يادرولىق سىناقتاردان جانە يادرولىق نىسانداردىڭ اپاتتارىنان زارداپ شەككەن ايماقتارداعى الەۋمەتتىك-ەكونوميكالىق جانە ەكولوگيالىق پروبلەمالاردى شەشۋدىڭ وزەكتى ماسەلەلەرىن قاراستىرادى. فورۋم قورىتىندىسى بويىنشا استانا دەكلاراتسياسى قابىلدانادى, دەي كەلىپ, قانات ساۋداباەۆ ءسوزىنىڭ سوڭىندا: جالپى العاندا, ءبىز «يادروسىز الەم ءۇشىن» حالىقارالىق فورۋمى ادامزاتقا پايدالى ماقساتتاردى ورىنداۋعا مۇمكىندىك بەرەر دەگەن ۇمىتتەمىز, دەپ ءوزىنىڭ ويىن قورىتتى.
ودان كەيىن ماگاتە-ءنىڭ باس ديرەكتورى يۋ.امانو جانە باسقالارى وزدەرىنىڭ قىسقا مالىمدەمەلەرىن جاسادى. ولاردىڭ سوزدەرىنىڭ ءبارى قازاقستاننىڭ يادروسىز الەم قۇرۋ جولىنداعى ۇدەرىسكە سۇبەلى ۇلەس قوسىپ جۇرگەندىگىن جانە ونىڭ وسى ماقساتتار جولىنداعى ىستەرىنىڭ ماڭىزىن اتاپ ءوتۋگە سايدى. وسىدان كەيىن ءباسپاسوز ءماسليحاتىنا قاتىسۋشىلار جۋرناليستەردىڭ كوپتەگەن سۇراقتارىنا جاۋاپ بەردى. سونىڭ ىشىندە يادرولىق قۋاتتى بەيبىت ماقساتقا پايدالانۋ جونىندە ماگاتە باسشىسىنا كوپتەگەن سۇراقتار قويىلدى. يادرولىق قۋاتتى قولدانا باستاعان ەلدەردىڭ ءبارىن قارۋ جاساپ جاتىر دەگەن كۇدىكتىڭ قايدان شىعاتىنىنا جاۋاپ بەرۋدى وتىنگەن سۇراقتار كوپ بولدى. ماسەلەن, يراننىڭ يادرولىق قۋاتتى پايدالانۋعا قارسى الەم قاۋىمداستىعىن قارسى قويۋدىڭ نەگىزى بار ما دەگەن ساۋال قويىلدى. وعان ماگاتە باسشىسى يراننىڭ ۇزاق ۋاقىت بويى ۇيىممەن ىنتىماقتاسۋدان باس تارتقاندىعى جانە باسقا دا سەبەپتەر بولعانىن ايتتى. جالپى, ءبىز يادرولىق قۋاتتى بەيبىت ماقساتقا بىزبەن ىنتىماقتاسا وتىرىپ پايدالانۋدى قولدايمىز, دەدى باس ديرەكتور.
«ەگەمەن-اقپارات».