مەملەكەت باسشىسى نۇرسۇلتان نازارباەۆ قازاقستاننىڭ حالىق جازۋشىسى, كورنەكتى اقىن تۇمانباي مولداعاليەۆتىڭ قايتىس بولۋىنا بايلانىستى مارقۇمنىڭ وتباسى مەن تۋعان-تۋىستارىنا كوڭىل ايتۋ جەدەلحاتىن جولدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
«حالقىمىزدىڭ اسا كورنەكتى اقىنى, مەملەكەتتىك سىيلىقتىڭ لاۋرەاتى تۇمانباي مولداعاليەۆ اعامىزدىڭ ومىردەن وتۋىنە بايلانىستى اۋىر قايعىلارىڭىزعا ورتاقتاسىپ, كوڭىل ايتامىن.
قازاق ەلى «تۇماش» دەپ ەركەلەتكەن ارداقتى ازامات, ۇلتتىق پوەزيامىزدىڭ وركەندەۋىنە ولشەۋسىز ۇلەس قوسقان جىر الىپتارىنىڭ ۇركەردەي توبىنا جاتاتىن ساناۋلى قايراتكەرلەردىڭ ءبىرى ەدى.
سەزىم مەن نازىك ليريكانىڭ تەڭدەسسىز شەبەرى تۇماعاڭنىڭ ولەڭدەرى كوپتەگەن جۇرەككە وشپەستەي جول سالعانى ءشۇباسىز. جان-دۇنيەڭدى ءۇيىرىپ, رۋحىڭدى اسقاقتاتا بىلەتىن شىنشىل دا تاكاپپار پوەزياسى بۇل كۇندە ۇلتتىق مادەنيەتىمىزدىڭ التىن قورىنا, حالقىمىزدىڭ رۋحاني بايلىعىنا اينالدى.
قالامگەردىڭ ونەگەلى ءومىرى, جارقىن بەينەسى, عيبراتى مول ومىرشەڭ ولەڭدەرى وشپەيدى دەپ بىلەمىن.
مارقۇمنىڭ جاتقان جەرى جارىق بولىپ, نۇرلى دا ءمولدىر جانى پەيىشتە شالقىسىن دەمەكپىن», دەلىنگەن جەدەلحاتتا.