بۇرناعى كۇنى قازاقستانداعى «ويماشا» پوليگونىندا ءىرى كولەمدى بىرلەسكەن «ورتالىق-2011» ستراتەگيالىق جاتتىعۋى باستالدى. جاتتىعۋعا قازاقستان رەسپۋبليكاسى قارۋلى كۇشتەرى قۇرلىق اسكەرلەرىنىڭ قولباسشىسى گەنەرال-لەيتەنانت مۇرات مايكەەۆ جەتەكشىلىك ەتۋدە.
اتالعان شارانىڭ باستالۋىنا بايلانىستى وقۋ ورتالىعىنىڭ الاڭىندا قازاقستان قارۋلى كۇشتەرى مەن رەسەي جاعىنان جاتتىعۋعا قاتىساتىن 3,5 مىڭعا جۋىق جەكە قۇرام سالتاناتتى ساپ تۇزەدى. قاتىسۋشى ەلدەردىڭ ءانۇرانى ورىندالىپ, مەملەكەتتىك جالاۋلارى كوتەرىلدى. جاتتىعۋ جەتەكشىسى م.مايكەەۆ شارا ەكى ەل اراسىنداعى سەرىكتەستىكتىڭ دامۋىنا, ءوزارا ءىس-قيمىلدى جەتىلدىرە تۇسۋگە, اسكەري سالادا بايلانىستى نىعايتۋعا جاڭاشا قوزعاۋ سالاتىندىعىن اتاپ كورسەتتى.
وزدەرىنە قويىلعان تاپسىرمانى ورىنداۋعا ءازىر اسكەري قىزمەتشىلەر سالتاناتپەن ساپ تۇزەپ ءوتتى. جەكە قۇرام قورعانىس وپەراتسيالارىن ورىنداۋ, جاعدايدى ورىستەتۋ ءجونىندەگى كەشەندى شارالاردى ورىنداۋعا ءازىر ەكەنى انىق بايقالدى. ءسويتىپ, «ويماشا» پوليگونىندا قازاقستان قارۋلى كۇشتەرى مەن رەسەي جاعىنان 550-دەن استام ءاسكەري تەحنيكا, 19 ۇشاق جانە 43 كەمەنىڭ قاتىسۋىمەن بىرلەسكەن جاۋىنگەرلىك جاتتىعۋلار باستاۋ الدى.
جاتتىعۋدىڭ العاشقى كەزەڭىندە ءبولىمدەر نەگىزگى اۋداندا ورنالاسادى جانە بەلگىلەنگەن ۋاقىتتا ءبىر مەزگىلدە شارتتى تۇردەگى جاۋدى جويىپ جىبەرۋ ءۇشىن الدىڭعى شەپتە شابۋىلداۋ ادىستەرىن ورىندايدى, سونداي-اق ءوزارا-ءىس-قيمىل مەن بايلانىستى پىسىقتايدى. ەڭ باستىسى – ۇرىس دالاسىندا قازاقستان مەن رەسەي اسكەرلەرىنىڭ ءىس جۇزىندە ءبىر جاعادان باس, ءبىر جەڭنەن قول شىعارا بىرلەسە ءىس-قيمىل تانىتۋى بولماق.
جاتتىعۋدىڭ نەگىزگى ارقاۋى نەمەسە ءمانى ورتالىق ازيا ايماعىندا وقيعالار ورىن العان جاعدايدا, وعان قاتىسۋ ءۇشىن قازاقستان رەسپۋبليكاسى قۇرلىق اسكەرلەرى باس قولباسشىسىنىڭ باسشىلىعىمەن كواليتسيالىق ءاسكەر توبىن (كۇشتەرىن) قۇرۋ بولىپ تابىلادى.
وكسانا پارپۋرا, قورعانىس مينيسترلىگى ءباسپاسوز قىزمەتىنىڭ قىزمەتكەرى.
سۋرەتتەردى تۇسىرگەن رومان كازۋنين.