ەلوردا اكىمى جاڭا اۆتوبۋس باعدارلارىن ىسكە قوسۋ جانە ايالداما كەشەندەرىن اشۋ بويىنشا جەدەل شارالار قابىلداۋدى تاپسىردى, دەپ حابارلادى استانا اكىمدىگىنىڭ ءباسپاسوز قىزمەتى.
ونىڭ ايتۋىنشا, ەلوردادا سالىنعان جولداردى (800 كم اسا) ەسكەرسەك, 250-گە جۋىق ايالداما ورناتۋ كەرەك. ولاردى جوبالاۋ كەزىندە استانانىڭ كليماتتىق جاعدايلارىن ەسكەرۋ قاجەت. سونىمەن قاتار, قالا باسشىسى جاڭا ايالدامالاردىڭ جايلى بولۋى ءتيىس ەكەندىگىن اتاپ ءوتتى. نەگىزىنەن, بۇل كەشەندەر مەملەكەتتىك-جەكە مەنشىك ارىپتەستىك ەسەبىنەن سالىناتىن بولادى, ال جوبا 2017 جىلدىڭ ءبىرىنشى جارتىسىندا جۇزەگە اسىرىلادى.
قالاداعى جاڭا ايالداما پاۆيلوندارى مەن اۆتوبۋس مارشرۋتتارى كوشە-جول جەلىسىنىڭ دامۋىنا قاراي پايدا بولادى. 2016 جىلدىڭ سوڭىنا دەيىن استانادا 45 جاڭا شىنى جانە پەرفوراتسيالانعان ايالداما اباتتاندىرىلادى. بۇعان قوسا, جابىق ءتيپتى جاڭا ايالدامالار جوبالانۋدا. ولار جولاۋشىلار اعىنى تىعىز جەرلەردە ورناتىلماق. سونداي-اق, كولەمدى جابىق ساۋدا جانە تەحنيكالىق ورىنجايلاردان, اشىق الاڭنان تۇراتىن اۆتوستانتسيالار جاسالادى. ونىڭ اۋماعىندا تەز تاماقتانۋ پۋنكتى, قوعامدىق دارەتحانالار, تولەمدەر قابىلداۋ پۋنكتى, لايت-بوكستار جانە ت.ب. بولادى.
سونىمەن قاتار, اسەت يسەكەشەۆ اۆتوبۋس پاركتەرىن جاڭارتۋ, جولاۋشىلار تاسىمالى قىزمەتىنىڭ ساپاسىن ارتتىرۋ, اۆتوبۋستاردىڭ قوزعالىس ينتەرۆالىن ازايتۋ جانە ەسكى ماشينالاردى قولدانىستان شىعارۋ ماسەلەلەرىنە نازار اۋداردى. اكىمنىڭ اتاپ وتۋىنشە, ەلوردا حالقىنىڭ سانى ۇدايى ءوسىپ وتىرادى, سايكەسىنشە قوعامدىق كولىككە تۇسەتىن جۇكتەمە ارتادى. قازىرگى كەزدە كۇن سايىن 700-دەن اسا قوعامدىق كولىك جولعا شىعادى, ولار 875 مىڭ ادامعا قىزمەت كورسەتەدى.
مۇنىمەن قوسا, 2017 جىلى استانانىڭ اۆتوبۋس پاركتەرى IVECO ماركالى 210 زاماناۋي جايلى اۆتوبۋسپەن تولىقپاق. جاڭا جىلجىمالى قۇرامدى ساتىپ الۋ ەۋروپا قايتا قۇرۋ جانە دامۋ بانكىنىڭ ينۆەستيتسيالىق قولداۋىنىڭ ارقاسىندا مۇمكىن بولىپ وتىر. جاڭا اۆتوبۋستار اقپاراتتاندىرۋ, اۋا باپتاۋ, جىلىتۋ, بەينەباقىلاۋ جۇيەلەرىمەن, سونداي-اق, مۇمكىندىگى شەكتەۋلى جاندارعا جانە بالالار ارباسىمەن جۇرگەن اتا-انالار ءۇشىن ارنايى پاندۋستارمەن جابدىقتالادى.