تۇركيا پرەمەر-ءمينيسترى رەدجەپ تايىپ ەردوعان اراب مەملەكەتتەرىنىڭ ليگاسى ماجىلىسىندە ەرەكشە شابىتپەن ءسوز سويلەپ, جينالعاندار دۇركىن-دۇركىن قول شاپالاقتاپ وتىرعان. ول ءسوزىنىڭ نەگىزگى بولىگىن تاياۋ شىعىس پروبلەمالارىنا, ونىڭ ىشىندە پالەستينانىڭ تاۋەلسىزدىگىنە ارناعان.
ەردوعاننىڭ پىكىرىنشە, پالەستينا مەملەكەتىن 1967 جىلعى شەكارا شەبىندە حالىقارالىق تانۋ – ول مۇمكىندىك ەمەس, قاجەتتىلىك. وسىعان بايلانىستى تۇركيا پرەمەر-ءمينيسترى الەمنىڭ بارلىق ەلدەرىن بۇۇ باس اسسامبلەياسىنىڭ ءماجىلىسىندە پالەستينانىڭ ءوز تاۋەلسىزدىگىن تانۋ تۋرالى تاپسىرىسىن قولداۋعا شاقىردى. سونىمەن قاتار, ول يزرايل تاراپىن اياۋسىز سىن تەزىنە الدى.
لاڭكەستىكتەن 17 ادام وپات بولدى
كەشە يراكتىڭ ورتالىعى مەن باتىسىندا كەم دەگەندە 17 ادامنىڭ ءومىرىن قيعان لاڭكەستىكتەر جاسالدى. قازا تاپقانداردىڭ اراسىندا 5 پوليتسيا قىزمەتكەرى مەن 2 سولدات بار. سونداي-اق, مەداتيا مەن حاببانيا قالالارىنداعى جارىلىستاردان, ايەلدەر مەن بالالاردى قوسا العاندا, 50 ادام ءتۇرلى دەڭگەيدە جاراقات العان.
العاشقىسىندا قالاداعى كوپشىلىك ءجيى باراتىن مەيرامحانا جانىنا قويىلعان ماشينە جارىلسا, ەكىنشىسىندە جەرگىلىكتى اسكەري بازاعا باعىت العان سولداتتار مىنگەن جۇك ماشينەسىنە جاپسىرىلعان «جابىسقاق-بومبا» ىسكە قوسىلعان. وسىمەن ءبىر مەزگىلدە قارۋلى جاساق باعدادتىڭ كاحيرا اۋدانىنداعى پوليتسيا بولىمشەسىنە شابۋىل جاساعان. ەكى قۇقىق قورعاۋ ورگانىنىڭ قىزمەتكەرى اتىپ ولتىرىلسە, بىرەۋى جاراقاتتانىپتى.
اسكەري ۇشاقتار تاۋعا سوعىلدى
تايۆاننىڭ ۇلتتىق قورعانىس مينيسترلىگىنە قاراستى ەكى جويعىش ۇشاعى جاتتىعۋ ۇشۋلارى كەزىندە تاۋعا سوعىلىپ, اپاتقا ۇشىرادى. ۇشاقتار بورتىنداعى ۇشقىشتاردىڭ ۇشەۋى دە قازا تاپقان. ۇشاقتاردىڭ ءبىرى ەكى ورىندىق F-5F بولسا, ەكىنشىسى RF-5E ماركالى بارلاۋشى-ۇشاق ەكەن.
تايۆان قورعانىس مينيسترلىگىنىڭ وكىلى پولكوۆنيك دەۆيد لونىڭ ايتۋىنشا, اتالعان امەريكالىق ۇشاقتار ەل اسكەري-اۋە كۇشتەرىنىڭ ساپىندا 1970 جىلداردىڭ ورتاسىنان بەرى تۇرعان كونەرگەن ۇشاقتار كورىنەدى. قازىرگى كەزدە تايۆان اسكەري-اۋە كۇشتەرى قاتارىندا 60 ع-5, جەرگىلىكتى 126 جويعىش ۇشاق,146 ع-16 جانە 56 فرانتسيالىق جويعىش ۇشاق بار ەكەن.
اۋە اپپاراتىن جويىپتى
تانىلماعان تاۋلى قاراباق رەسپۋبليكاسىنىڭ اسكەري قىزمەتكەرلەرى ازەربايجاننىڭ ۇشقىشسىز ۇشاتىن بارلاۋشى-ۇشاعىن جويىپ جىبەرگەنىن جاريا ەتتى. ۇشاقتىڭ قانداي جاعدايدا اتىپ تۇسىرىلگەنى ازىرشە بەلگىسىز. سونداي-اق اۋە اپپاراتىنىڭ مودەلى تۋرالى دا ەشتەڭە ايتىلمايدى.
ال ازەربايجان بيلىگى تاراپىنان اتالعان اقپاراتتى نە قۋاتتاعان, نە تەرىسكە شىعارعان مالىمدەمە دە تۇسە قويعان جوق. مۇنىڭ الدىندا ازەربايجاننىڭ يزرايلدە شىعارىلعان بارلاۋشى-ۇشاعى قاراباق شەكاراسى پەريمەترى بويىنشا وقتىن-وقتىن ۇشىپ تۇرادى دەپ حابارلانعان بولاتىن. بۇل مالىمدەمەنىڭ دە وتىرىك-شىنى بەيمالىم.
ەڭ باي ەلدە 46 ميلليون كەدەي بار
2010 جىلدىڭ قورىتىندىلارى بويىنشا, كەدەيلىك شەگىندە ءومىر ءسۇرىپ جاتقان امەريكالىقتاردىڭ سانى 46 ميلليون ادامنان اسىپ كەتكەن. بۇل تۋرالى اقش ستاتيستيكا بيۋروسىنىڭ رەسمي ەسەبىندە كولدەنەڭ تارتىلادى. ءبىر جىل ىشىندە ەلدەگى ءسىڭىرى شىققان كەدەيلەر سانى 2,8 ميلليون ادامعا كوبەيگەن.
بۇل – قۇراما شتاتتاردا, تۇتاستاي العاندا, تۇرعىنداردىڭ 15,1 پايىزى ءسىڭىرى شىققان كەدەي دەگەن ءسوز. ستاتيستيكا بيۋروسىنىڭ مالىمدەۋىنشە, ەلدەگى كەدەيلەر سانى اقش-تىڭ رەتسەسسيا جاعدايىنان شىققانىنا قاراماستان ۇلعايا ءتۇسىپ وتىر جانە بۇل ۇدەرىس سوڭعى 4 جىل بويى انىق بايقالۋدا. ونىڭ ۇستىنە كەدەيلىك دەڭگەيى باقىلاۋ جۇرگىزىلىپ كەلە جاتقان سوڭعى 52 جىل ىشىندە ەڭ تومەنگى ساتىعا قۇلدىراعان.
«وليمپيالىق» ساۋدا ورتالىعى اشىلدى
الداعى جىلى انگليانىڭ استاناسى – لوندون قالاسىندا كەزەكتى جازعى وليمپيا ويىندارى وتەتىنى بەلگىلى. وسى ايتۋلى وقيعادان 1 جىلعا جۋىق ۋاقىت بۇرىن لوندوندا جارىستار وتكىزىلەتىن بولاشاق وليمپيا باعىنا وزىندىك ءبىر كىرەبەرىس بولاتىن ساۋدا-ويىن-ساۋىق ورتالىعى (سوو) اشىلدى.
سوو-نىڭ جالپى الاڭى 177 مىڭ شارشى مەتردى قۇرايدى. كەشەندە 300-دەن استام دۇكەن, 70 مەيرامحانا, 14 زالى بار كينوتەاتر, 3 وتەل, ۇلىبريتانياداعى ەڭ ءىرى كازينو مەن 5 مىڭ ماشينەگە ارنالعان اۆتوتۇراق ورنالاسقان. جوباعا سالىنعان ينۆەستيتسيانىڭ جالپى كولەمى شامامەن 2,3 ميلليارد دوللاردى قۇراعان. وسىلايشا سوو ەۋروپاداعى قالا شەگىندە ورنالاسقان ەڭ ءىرى نىسان بولىپ تاريحقا جازىلدى.
قىسقا قايىرىپ ايتقاندا:
ارگەنتينانىڭ استاناسى بۋەنوس-ايرەس قالاسىندا ەكى پويىزدىڭ جانە جولاۋشىلار اۆتوبۋسىنىڭ قاقتىعىسۋىنان اپات بولدى. وقيعا سالدارىنان 7 ادام كوز جۇمسا, 160-ى ءتۇرلى دەڭگەيدە دەنە جاراقاتتارىن العان. 20 ادامنىڭ جاعدايى وتە اۋىر كورىنەدى.
امەريكانىڭ ەكس-پرەزيدەنتى دجيممي كارتەر پالەستينا اۆتونومياسىنىڭ بۇۇ-دان ءوزىنىڭ تاۋەلسىزدىگىن تانۋدى تالاپ ەتپەكشى بولىپ وتىرعان نيەتىن ماقۇلدايتىنىن مالىمدەدى. ال اقش مەملەكەتتىك حاتشىسى حيللاري كلينتون بولسا, پالەستينا جاعىن تاۋەلسىزدىگىن تانىتۋعا تالپىنىسىنان باس تارتۋعا شاقىرىپ وتىر.
قىتايدىڭ حەنان پروۆينتسياسىنداعى گۋني قالاسىندا بالتامەن «قارۋلانعان» جەرگىلىكتى تۇرعىن بالالار باقشاسىنىڭ ءتاربيەلەنۋشىلەرىنە دۇرسە قويا بەرگەن. قىلمىسكەردىڭ ەسسىز شابۋىلىنان 4 ادام قازا تاۋىپ, ەكەۋى جارالانعان. كوز جۇمعانداردىڭ ۇشەۋى – اتا-انالار, بىرەۋى – ءسابي.
بەلورۋسسيانىڭ ۇلتتىق بانكى كەشەدەن باستاپ ۇلتتىق ۆاليۋتانى «ەركىن جۇزۋگە» جىبەرگەن بولاتىن. ارتىنشا بەلارۋس ءرۋبلى ۆاليۋتا ساۋدا-ساتتىعىنىڭ قوسىمشا سەسسياسىندا «ەتپەتتەي جىعىلدى», ياعني قاتتى قۇنسىزدانىپ شىعا كەلدى. ءسويتىپ, قازىر 1 اقش دوللارىنىڭ قۇنى 8,6 مىڭ جەرگىلىكتى ءرۋبلدى قۇراپ وتىر.
ينتەرنەت ماتەريالدارى نەگىزىندە ازىرلەندى.