كەشە استانادا «اق جول» پارتياسىنىڭ باستاماسىمەن جەلتوقسان كوتەرىلىسىنىڭ 25 جىلدىعىن لايىقتى دەڭگەيدە اتاپ ءوتۋ جونىندە رەسپۋبليكالىق قوعامدىق كوميتەت قۇرىلدى. بۇل تۋرالى ۇسىنىستى وتكەن اپتادا «اق جول» قدپ تورالقاسىنىڭ وتىرىسىندا پارتيا توراعاسى ازات پەرۋاشەۆ ايتقان بولاتىن, دەپ حابارلادى «اق جول» قدپ-نىڭ ءباسپاسوز قىزمەتى.
مەملەكەتتىك ءتىل مارتەبەسى تۋرالى وي-پىكىر سوڭعى كەزدە ەلىمىزدىڭ بىرقاتار ازاماتتارىنىڭ مەملەكەتتىلىكتى قازاق تاريحىنان بولەك الىپ قارايتىنىن بايقاتتى. وكىنىشكە قاراي, بازبىرەۋلەر قازاقستان تاۋەلسىزدىگىن قازاق حالقىنىڭ عاسىرلار بويى جالعاسقان كۇرەسىنىڭ ءناتيجەسى ەمەس, ءبىر ساتتىك تاعدىردىڭ تارتۋى دەپ قابىلدايتىن سياقتى. شىندىعىنا كەلگەندە, تاۋەلسىزدىككە قول جەتكىزۋ جولىندا قانشاما باتىل قادامدار جاسالىپ, تالاي جان قۇربان بولدى. وسى جولدا ونداعان جىلدارعا سوزىلعان كۇرەس پەن كوتەرىلىستەر از بولعان جوق. سولاردىڭ بىرەگەيى مەن قورىتىندىسى 1986 جىلعى جەلتوقسان كوتەرىلىسى دەپ تانۋىمىز قاجەت.
– جەلتوقسان كوتەرىلىسىنىڭ 25 جىلدىعى, ەل تاۋەلسىزدىگىنىڭ مەرەيتويىمەن تۇسپا-تۇس كەلىپ وتىر. تاۋەلسىزدىكتىڭ 20 جىلدىعىنا ارنالعان مەرەكەلىك شارالاردى اتاپ وتۋمەن قاتار, ەل ەگەمەندىگى ءۇشىن قاسىق قانى قالعانشا كۇرەسكەن ازاماتتارعا جانە سول ۋاقتاعى تاريحي ماڭىزى زور وقيعالارعا قۇرمەت كورسەتۋىمىز كەرەك. ەڭ الدىمەن, بۇل باعىتتا ءبىزدىڭ زامانداستارىمىز, 1986 جىلعى قازاق جاستارىنىڭ كوتەرىلىسىنە قاتىسۋشى بوزبالا مەن بويجەتكەندەرىمىزدىڭ الدىندا باس ءيۋىمىز قاجەت, – دەپ اتاپ ءوتتى ازات پەرۋاشەۆ.
بۇگىنگى تاڭدا جەلتوقسان كوتەرىلىسىنە جان-جاقتى تاريحي جانە ساياسي باعا بەرىلۋى كەرەك. وسى باعىتتا قازاقستاننىڭ «اق جول» دەموكراتيالىق پارتياسى ۇلت تاريحىن بۇگىنگى جانە كەيىنگى ۇرپاققا شىنايى تۇردە جەتكىزۋ ءۇشىن ناقتى ىسكە كىرىسىپ وتىر.
اتاپ ايتۋ كەرەك, جەلتوقسان كوتەرىلىسىنىڭ 25 جىلدىعىن لايىقتى دەڭگەيدە اتاپ ءوتۋ ءجونىندەگى رەسپۋبليكالىق قوعامدىق كوميتەت – پارتيادان بولەك ۇيىم. «اق جول» دەموكراتيالىق پارتياسى تەك بۇل كوميتەتتى قۇرۋعا ۇيىتقى بولدى جانە الداعى كۇنى وسى كوميتەتتىڭ ءساتتى قىزمەت ەتۋى ءۇشىن بارىنشا قولداۋ كورسەتەدى.
وتىرىس بارىسىندا كوميتەتتىڭ جۇمىس جوسپارى جاسالىپ, تىڭ ۇسىنىستار تىڭدالدى. بۇل ۇسىنىستاردىڭ بارلىعى جاقىن كۇندەرى جيناقتالىپ, كوميتەت اتىنان ورتاق ۇندەۋ رەتىندە قوعام نازارىنا ۇسىنىلاتىن بولدى.
قوعامدىق كوميتەتتىڭ ۇيىمداستىرۋشىلىق وتىرىسىنا ەلىمىزگە اتى ءمالىم ازاماتتار سابىر قاسىموۆ – قوعام قايراتكەرى, امانگەلدى ايتالى – قوعام قايراتكەرى, سۇلتانحان اققۇل ۇلى – الاشتانۋشى, «ازاتتىق» راديوسىنىڭ رەداكتورى, ءمامبەت قويگەلديەۆ – قازاقستان تاريحشىلارى قوعامىنىڭ پرەزيدەنتى, بەيبىت قويشىباەۆ – «ادىلەت» تاريحي-اعارتۋ ورتالىعىنىڭ جەتەكشىسى, دوس كوشىم – «ۇلت تاعدىرى» قوزعالىسىنىڭ جەتەكشىسى, ساياساتتانۋشى, بەيسەنعازى نۇكەن – «جەلتوقسان اقيقاتى» قوزعالىسىنىڭ جەتەكشىسى, ايدوس سارىم – قوعام قايراتكەرى, داۋرەن بابامۇراتوۆ – «بولاشاق» جاستار قوعامىنىڭ توراعاسى, تالعات ابدىجاپاروۆ – اۋعان سوعىسى ارداگەرلەرى قاۋىمداستىعى ءتوراعاسىنىڭ ورىنباسارى, الماس تۇرتاەۆ – «اق جول» قدپ-نىڭ قىزىلوردا وبلىستىق فيليالىنىڭ توراعاسى, ەركەبۇلان ءىلياسوۆ – كاسىپكەر اتسالىستى.
جەلتوقسان كوتەرىلىسىنىڭ 25 جىلدىعىن لايىقتى تۇردە اتاپ ءوتۋ قوعامدىق كوميتەتى مۇنىمەن تولىقتاي قامتىلىپ, قۇرىلىپ ءبىتتى دەۋگە بولمايدى. ياعني, اتالعان ۇسىنىستى قولدايتىن كەز كەلگەن بىرلەستىكتەر مەن ەل ازاماتتارى كوميتەت جۇمىسىنا اتسالىسا الادى.
قوعامدىق كوميتەت وتىرىسىنىڭ قورىتىندىسىندا ونىڭ توراعاسى بولىپ, بەلگىلى جازۋشى, قوعام قايراتكەرى سماعۇل ەلۋباي تاعايىندالدى.