كەشە قازاقستان پرەزيدەنتى جانىنداعى ادام قۇقىقتارى جونىندەگى كوميسسيانىڭ «2010 جىلى قازاقستان رەسپۋبليكاسىنداعى ادام قۇقىقتارىنىڭ احۋالى تۋرالى» بايانداماسىنىڭ حالىقارالىق تۇساۋكەسەرى بولىپ ءوتتى.
بۇعان دەيىن بايانداما حالىقارالىق جانە وتاندىق ساراپشىلاردىڭ وڭ باعاسىن العان بولاتىن. وسى رەتتە ادام قۇقىقتارى جونىندەگى بايانداما ۇلىبريتانيانىڭ قازاقستانداعى جانە قىرعىزستانداعى ەلشىلىكتەرىنىڭ, ەقىۇ استاناداعى ورتالىعىنىڭ تەحنيكالىق كومەگى ارقاسىندا قازاق, ورىس جانە اعىلشىن تىلدەرىندە باسىلىپ شىقتى. تۇساۋكەسەر راسىمىنە قاتىسقاندارعا ارناپ قازاقستان رەسپۋبليكاسىنىڭ سىرتقى ىستەر ءمينيسترى ەرجان قازىحانوۆ, قازاقستان رەسپۋبليكاسى پرەزيدەنتىنىڭ جانىنداعى ادام قۇقىقتارى جونىندەگى كوميسسيانىڭ توراعاسى ساعىنبەك تۇرسىنوۆ, ۇلىبريتانيانىڭ قازاقستانداعى جانە قىرعىزستانداعى ديپلوماتيالىق ميسسيالارى باسشىسىنىڭ ورىنباسارى دجون تەرلوۋ جانە ەۋروپاداعى قاۋىپسىزدىك جانە ىنتىماقتاستىق ۇيىمىنىڭ استاناداعى ورتالىعىنىڭ باسشىسى الەكساندر كەلچەۆسكي قۇتتىقتاۋ ءسوز سويلەدى.
ءوزىنىڭ قۇتتىقتاۋ سوزىندە ادام قۇقىقتارى جونىندەگى كوميسسيانىڭ توراعاسى ساعىنبەك تۇرسىنوۆ ەلىمىزدەگى قۇقىق قورعاۋ تەتىكتەرىنىڭ حالىقارالىق ستاندارتتارعا سايكەستىگىن, ايتسە دە بۇل باعىتتا ءالى دە جەتىلدىرۋدى قاجەت ەتەتىن تۇستار بار ەكەندىگىن ايتا كەلىپ, ناقتى قادامدار بارىسىن تىلگە تيەك ەتتى. ە.قازىحانوۆ قۇقىقتىق ورتانى جەتىلدىرۋ ءجونىندەگى جۇمىس باعدارلامالىق قۇجاتتارمەن – 2010-2020 جىلدارعا ارنالعان قازاقستان رەسپۋبليكاسىنداعى قۇقىقتىق ساياسات تۇجىرىمداماسىمەن جانە 2009-2012 جىلدارداعى ادام قۇقى سالاسىنداعى ءىس-ارەكەت ۇلتتىق جوسپارىمەن ۇيلەستىرىلگەندىگىن ەرەكشە اتادى. قازىرگى تاڭدا ەكى قۇجات تا پرەزيدەنت تاراپىنان بەكىتىلگەن.
ە.قازىحانوۆتىڭ پايىمىنشا, بۇگىندە باياندامادا ۇلتتىق زاڭنامامەن سالىستىرمالى سارالاۋ جانە ولاردىڭ ادام قۇقى سالاسىنداعى حالىقارالىق ستاندارتتارعا سايكەستىگىن ايعاقتايتىن قۇقىق قولدانۋ تاجىريبەسى دە بار. ول ناقتى ادامنىڭ ازاماتتىق, ساياسي, ەكونوميكالىق, الەۋمەتتىك جانە مادەني قۇقىقتارىنىڭ ساقتالۋ ماسەلەلەرىن قامتيدى. بۇل حالىقارالىق جانە ۇكىمەتتىك ەمەس قۇقىق قورعاۋ ۇيىمدارى ءجىتى نازار اۋدارعان باعىتتار بولىپ تابىلادى. وسى ورايدا مينيستر ادام قۇقىن قورعاۋ مەن ونى العا جىلجىتۋدا الەمدىك تاجىريبەنى ەسەپكە الماي ىلگەرى جىلجي المايتىنىمىزدى ەرەكشە ايتتى. مىنە, بۇل فاكتورلار كوپ جاعدايدا قازاقستاننىڭ بۇۇ-نىڭ ادام قۇقىقتارى سالاسىنداعى نەگىزگى سانالاتىن كەلىسىمدەرى مەن كونۆەنتسيالارىنا قوسىلۋى بويىنشا شەشىمگە كەلۋىن ايقىنداپ بەردى. ونىڭ ۇستىنە قازاقستان ادام قۇقىن ساقتاۋدى قاداعالاۋ حالىقارالىق تەتىكتەرىمەن ىنتىماقتاستىقتى ۇنەمى قولداپ كەلە جاتقاندىعىن ايتا كەتكەن ءجون. 2011 جىلدىڭ شىلدەسىندە بۇۇ ادام قۇقىقتارى جونىندەگى كوميتەتىندە قازاقستاننىڭ ازاماتتىق جانە ساياسي قۇقىقتار تۋرالى حالىقارالىق پاكتىدە كورسەتىلگەن ەرەجەلەردى ساقتاۋى جونىندەگى ۇلتتىق العاشقى بايانداماسى قورعالدى.
جالپى, 2010 جىلعى 1 قاڭتار مەن 31 جەلتوقسان ارالىعىنداعى كەزەڭ ىشىندە كوميسسيا حاتشىلىعىنا جەكە جانە زاڭدى تۇلعالاردان قۇقىق پەن بوستاندىعى بۇزىلۋى بويىنشا 1320 جازباشا شاعىم كەلىپ تۇسكەن. سونىڭ 27,20 پايىزى قۇقىق قورعاۋ ورگاندارىنىڭ ارەكەتتەرى مەن ارەكەتسىزدىكتەرىنە بايلانىستى ەكەن. ال 19,62 پايىزى اكىمدەردىڭ, اتقارۋشى جانە وكىلەتتى بيلىك ورگاندارى لاۋازىمدى قىزمەتتەرىنىڭ ارەكەتتەرىنە كۇيىنسە, 9,39 پايىزى سوت شەشىمدەرىنىڭ ورىندالماۋىنا جانە وزگە دە ماسەلەلەرگە شاعىمدانعان.
جالپى, باياندامانىڭ تۇساۋكەسەرىنە مەملەكەتتىك ورگانداردىڭ, ەلىمىزدىڭ قۇقىق قورعاۋ سالاسىنداعى ۇكىمەتتىك ەمەس ۇيىمداردىڭ, ەلىمىزدە اككرەديتتەلگەن حالىقارالىق ۇيىمدار مەن ديپلوماتيالىق وكىلدىكتەردىڭ باسشىلارى, ادۆوكاتۋرا, نوتاريات, ءبىلىم جانە عىلىم ۇيىمدارى, مادەنيەت, بيزنەس جانە بۇقارالىق اقپارات قۇرالدارىنىڭ وكىلدەرى قاتىستى. باياندامانى كوميسسيا مۇشەلەرى تاستەمىر ابىشەۆ, ءمادينا جاربوسىنوۆا, ۆيتالي ۆورونوۆ جانە ەڭلىك نۇرعاليەۆا تانىستىرىپ, بىرقاتار سۇراقتارعا جاۋاپ بەردى.
اسقار تۇراپباي ۇلى.