ەلباسىمىز نۇرسۇلتان نازارباەۆتىڭ قىزىلجار وڭىرىنە جۇمىس ساپارى وبلىس ديقاندارىن بيىك بەلەستەرگە ۇمتىلدىرىپ, ەگىن وراعىن ۇيىمشىلدىقپەن ءوتكىزۋگە ەرەكشە دەم بەردى. مەملەكەت باسشىسى سولتۇستىكقازاقستاندىقتاردىڭ جاۋاپتى ناۋقاندى ۇيىمداستىرۋداعى بىلىكتىلىگىن اتاپ كورسەتىپ, مول استىقتى ىسىراپسىز جيناپ الاتىنىمىزعا ۇلكەن سەنىم ءبىلدىردى. تاۋەلسىزدىگىمىزدىڭ مەرەيلى مەرەكەسى قارساڭىندا سەرتكە ساي سەرپىن كورسەتۋدى اقجارلىقتار دا ۇلكەن ابىروي سانايدى. قازىردىڭ وزىندە بىرقاتار شارۋاشىلىقتار استىق جيناۋدى ءبىتىرىپ, كەلەسى جىلدىڭ قامىنا كىرىسىپ كەتكەن.
ماسەلەن, وبلىستىق ءماسليحاتتىڭ دەپۋتاتى مۇحامەدجان لۇقپانوۆ باسقاراتىن «لۇقپانوۆ» جشس 2300 گەكتار القاپتىڭ ەگىنىن ىسىراپسىز قامبالاپ الدى. گەكتار بەرەكەلىلىگى 17,5 تسەنتنەرگە جەتتى. گ. ميتينا جەتەكشىلىك ەتەتىن «ميتين» شق شىعىمدىلىقتى 18 تسەنتنەردەن اينالدىردى. «نان» شارۋا قوجالىعى دا بيىك تابىستارعا قول جەتكىزدى. «اگروتەحنيكا اقجار», «مەنجىن», «كيەۆسكوە سەۆەر» سەكىلدى سەرىكتەستىكتەر مارەگە تاياۋ. «بۇلانباي» شق ءار گەكتاردان 25 تسەنتنەر ءدان جيناپ, جارىس كوشىن باستادى.
اقجار – استىقتى اۋدانداردىڭ ءبىرى. سوڭعى 5 جىلدىڭ ءىشىندە تىڭ جانە تىڭايعان جەرلەردى يگەرۋ ەسەبىنەن ەگىس القاپتارى 320 مىڭ گەكتارعا دەيىن ۇلعايدى. ءداندى داقىلدار نەگىزىنەن جازىق دالالاردا وسىرىلەتىندىكتەن, ساپاسى جوعارى, بالۋىزى 23-تەن كەم ەمەس. بىلتىر قۋاڭشىلىققا قاراماستان, ءتۇسىمدىلىك 12 تسەنتنەر بولسا, بيىل 17,5 تسەنتنەردەن الۋدامىز. جىل ءوتكەن سايىن مەملەكەتتىڭ اگرارلىق سالاعا دەگەن قارجىلىق قولداۋى ارتىپ كەلەدى. بۇرىندارى شەت ەلدەردىڭ تەحنيكالارىن ساتىپ الۋعا ينۆەستورلار عانا قاۋقارلى بولسا, قازىر ماشينا-تراكتور پاركىن سەرىكتەستىكتەر مەن شارۋا قوجالىقتارى دا جاڭارتا باستادى. سوڭعى 5 جىلدا 6,7 ميلليارد تەڭگەگە 400-دەن استام شەت ەلدەردىڭ قۋاتتى تەحنيكالارى اكەلىندى. كوكتەمگى, كۇزگى دالا جۇمىستارىنىڭ 75-80 پايىزى وسىنداي الىمدى تەحنيكالارمەن اتقارىلادى.
عىلىم جەتىستىكتەرى مەن وزىق تەحنولوگيالار دا كەڭىنەن قولدانىلادى. پرەزيدەنت وسى جولعى جۇمىس ساپارىندا ىلعال ساقتاۋدىڭ نولدىك تەحنولوگياسىن كەڭىنەن يگەرۋگە تاپسىرما بەردى. اۋداندا ىلعال ساقتاۋدىڭ, توپىراقتىڭ قۇنارلىلىعىن كەمىتپەيتىن ءتاسىلدى قولداناتىن اگروقۇرىلىمدار بارشىلىق. جۇمىستى تالاپقا ساي ۇيىمداستىرۋدىڭ ارقاسىندا كۇن سايىن 11-13 مىڭ گەكتار القاپتىڭ استىعى باستىرىلۋدا. وراققا 400-گە جۋىق كومباين تارتىلعان. جانار-جاعار مايدان تاپشىلىق جوق. تاسىمالداۋ جۇمىسى ەكى اۋىسىمدا اتقارىلىپ, قىرماندار مەن ەلەۆاتورلاردا دا جۇمىس قىزۋ ءورىس العان.
ءسوز اراسىندا ەلباسىنىڭ «جاڭا ونجىلدىق – جاڭا ەكونوميكالىق ورلەۋ – قازاقستاننىڭ جاڭا مۇمكىندىكتەرى» جولداۋىنان تۋىندايتىن تالاپتارعا سايكەس ۇشقىر جوبالاردىڭ ىسكە اسىرىلعانىن ايتا كەتكەن ءجون. سولاردىڭ ءبىرى – اششىكول اۋىلىندا بوي كوتەرگەن 60 مىڭ توننالىق استىق قابىلداۋ كاسىپورنى. ونىڭ قۇرىلىس جۇمىستارى مەن جابدىقتاۋ قوندىرعىلارىنا 600 ميلليون تەڭگە جۇمسالدى. استىق قابىلداۋ, كەپتىرۋ, تازالاۋ جانە ساقتاۋ كومپيۋتەر ارقىلى اتقارىلادى. ءارقايسىسى 10 مىڭ توننالىق 6 سىيىمدىلىق, استىق وڭدەيتىن جانە كەپتىرەتىن قوندىرعىلار, قوزعالتقىش تاسىمالداعىشتار, جۇك ۆاگوندارى مەن اۆتوموبيلدەرگە ارنالعان ەلەكتروندى تارازىلار شەتەلدەردىڭ وزىق تەحنولوگياسىنا نەگىزدەلگەن. بيىل استىقتىڭ كۇتكەندەگىدەن دە مول بولاتىنىن ەسكەرىپ, ونى ساقتاۋ ماسەلەسىنە ايرىقشا نازار اۋدارىپ وتىرمىز.
استىق ءوندىرىسى سالاسىنداعى بيىك بەلەسىمىز ەل تاۋەلسىزدىگىنىڭ 20 جىلدىعى مەرەكەسىنە ارنالعان تورقالى تارتۋىمىز بولماق.
اعزام تاستەمىروۆ, اقجار اۋدانىنىڭ اكىمى.
سولتۇستىك قازاقستان وبلىسى.