الداعى جىلى باتىس قازاقستان وبلىسى تەاترلارىن جاراقتاندىرۋ, ساحنالارىن بەزەندىرۋ جانە جاڭا كيىم-كەشەك الۋعا 100 ملن تەڭگە جۇمسالماق. بۇل تۋرالى وبلىس اكىمى التاي كولگىنوۆ مادەنيەت سالاسىنىڭ قىزمەتكەرلەرىمەن كەزدەسۋىندە ايتتى.
ءوڭىر باسشىسىنىڭ اتاپ وتكەنىندەي, تاۋەلسىزدىك جىلدارى مادەنيەت جانە ونەر سالاسىندا دا كوپتەگەن وزگەرىس-جاڭالىقتار بولدى. مىسالى, قازىرگى تاڭدا 600 ملن. جۋىق تەڭگەگە 28 مادەنيەت نىسانى كۇردەلى جانە اعىمداعى جوندەۋدەن وتكىزىلۋدە. بۇدان كەيىنگى كەزەك تەاترلارعا كەلمەكشى. ورالدا باتىس قازاقستان وبلىستىق قازاق دراما تەاترى مەن ا.وستروۆسكي اتىنداعى ورىس دراما تەاترى بولسا, اۋدانداردا حالىق تەاترلارى بار. مىنە, سولاردىڭ دا زامان تالابىنا ساي جاڭعىرتىلۋى ءۇشىن قاجەتتى كومەك-قولداۋ كورسەتىلەتىن بولادى.
جيىن بارىسىندا التاي كولگىنوۆ تاۋەلسىزدىكتىڭ 25 جىلدىعىنا وراي ەلباسى جارلىعىمەن ماراپاتتالعان ەلگە تانىمال ءداستۇرلى ءانشى, ع.قۇرمانعاليەۆ اتىنداعى وبلىستىق فيلارمونيا ءسوليسى داستان ەسەنتەمىروۆكە «ەرەن ەڭبەگى ءۇشىن» مەدالىن تابىس ەتتى. سونداي-اق سىرىم جانە شىڭعىرلاۋ اۋداندىق ورتالىقتاندىرىلعان كىتاپحانا جۇيەسىنىڭ ديرەكتورلارى راۋشان حاسانوۆا مەن گۇلسىم قۋاناەۆا, تەرەكتى اۋدانى فەدوروۆ اۋىلدىق ورتالىقتاندىرىلعان كىتاپحانا جۇيەسىنىڭ ديرەكتورى مارينا لۋكمانوۆا, قۇرمانعازى اتىنداعى مۋزىكا كوللەدجى حالىق اسپاپتار ءبولىمىنىڭ مەڭگەرۋشىسى اسىلعانىم قۇسماعامبەتوۆاعا «مادەنيەت سالاسىنىڭ ۇزدىگى» توسبەلگىسى تابىس ەتىلدى. تاعى بىرقاتارى وبلىس اكىمى مەن قر مادەنيەت جانە سپورت ءمينيسترىنىڭ العىسحاتتارىنا, باسقا دا ماراپاتتارعا يە بولدى.