2016 جىلى ۇلتتىق ەكونوميكانىڭ نەگىزگى ءوسۋ درايۆەرى شاعىن بيزنەس بولدى. بۇل سەكتورداعى كىرىس 45% ۇلعايعان, بەلسەندى جۇمىس ىستەيتىن كاسىپورىندار سانى 5% كوبەيدى, دەپ حابارلايدى, ranking.kz.
بيىلعى جىل ءوسۋ قارقىنى بويىنشا شاعىن سەكتوردىڭ ءابسوليۋتتى باسىم بولۋىمەن اياقتالادى. 2016 جىلى قاراشا ايىنىڭ سوڭىندا قازاقستاندا 125 مىڭ شاعىن كاسىپورىندار بەلسەندى جۇمىس ىستەگەن. شاعىن بيزنەس جاڭا مۇشەلەرمەن قارقىندى تولىقتىرىلىپ وتىرعان. ءبىر جىلدا جاڭا كاسىپورىندار سانى بىردەن 21% وسكەن. اتالعان ءوسىم ءىرى سەكتور بەلسەندىلىگىنىڭ تومەندەۋىمەن تۇسپا-تۇس كەلدى.
ءبىر جىلدا بەلسەندى ءىرى جانە ورتا كومپانيالار سانى 1% قىسقارعان, ال جاڭا كاسىپورىنداردىڭ اشىلۋى 39% ءبىر-اق قۇلدىراعان.
ماماندار قازاقستانداعى شاعىن بيزنەستىڭ جىلدام دامۋىنا باعدارلامالار وپەراتورى «دامۋ» قورى ارقىلى مەملەكەتتىڭ كاسىپكەرلىكتى بەلسەندى تۇردە نەسيەلەۋى ىقپال ەتكەنىن اتاپ ءوتتى. شاعىن جانە ورتا بيزنەسكە مەملەكەتتىك قولداۋ ءبىلدىرۋدىڭ نەگىزگى قۇرالى - نەسيەلىك مولشەرلەمەنى سۋبسيديالاۋ. 2010 جىلدان بۇگىنگە دەيىن كاسىپكەرلەر ءۇشىن نەسيە مولشەرلەمەسىن سۋبسيديالاۋ بويىنشا 1,6 تريلليون تەڭگە سوماسىنا 8,3 مىڭ جوبا ماقۇلداندى.
سۋبسيديالاردىڭ جالپى كولەمى 135 ميلليارد تەڭگەنى قۇرادى. بيىلعى قاڭتار-قىركۇيەك ايلارىندا تولەنگەن سۋبسيديالار 21,8 ميلليارد تەڭگە سوماسىنا نەمەسە بارلىق 2015 جىل دەڭگەيىنىڭ 82% قۇرايدى. نەسيەلەۋ اناعۇرلىم ارزان بولا ءتۇستى جانە بانكتەر بيزنەسكە ارنالعان نەسيەلىك ونىمدەر ساتىلىمىنىڭ وتكەن جىلعى دەڭگەيمەن سالىستىرعاندا 54% وسكەنىن انىقتادى.
2016 جىلدىڭ قاڭتار-قىركۇيەك ايلارىندا قر بارلىق شاعىن كاسىپورىندارى بىرلەسىپ شامامەن 15 تريلليون تەڭگە كىرىس تاپتى. ءبىر جىلدىق ءتۇسىم 45% ۇلعايدى. بۇل كەزەڭدە ءىرى جانە ورتا كاسىپورىندار پايدا تابۋ قارقىنىن 18% عانا ۇلعايتا الدى.
بيىلعى 9 ايدىڭ قورىتىندىسى بويىنشا, كىشى كاسىپورىندار 1,4 تريلليون تەڭگە كولەمىندە نەمەسە وتكەن جىلدان 4,5 ەسە كوپ تابىس تاپتى. سەكتورداعى ءوندىرىس تيىمدىلىگى 2015 جىلى 3% كورسەتسە, بيىل 10% جەتكەن.