قازىرگى كەزدە جاڭاشىل مۇعالىم رەتىندە دامۋ – ۋاقىت تالابى. جاڭاشىل ۇستاز رەتىندە كورىنىپ, زامان اعىمىنا ساي شاكىرتتەرگە مەملەكەتتىك ءتىلدى مەڭگەرتەتىن ءتىل مامانى بولۋ ءۇشىن جاڭا ادىستەر قولدانۋدىڭ تيىمدىلىگى وتە زور. XXI عاسىر ۇستازى بۇگىنگى كۇن تالابىنا ساي جان-جاقتى دامىعان, تەرەڭ بىلىممەن قارۋلانعان وقۋشى تۇلعاسىن سومداۋ ءۇشىن ءوزى دە شەبەرلىكتىڭ شىڭىنان كورىنۋى ءتيىس. قازىرگى تاڭدا وقۋ ۇردىسىندە قازاق ءتىلىن وقىتۋدا سان الۋان جاڭا ءادىس-تاسىلدەر ساپالى ءبىلىم بەرۋدە ۇلكەن ءرول اتقارادى.
قازاقستان رەسپۋبليكاسى تاۋەلسىزدىگىنىڭ 25 جىلدىعى قارساڭىندا, قاراعاندى قالاسىنىڭ №40 نەگىزگى مەكتەبىندە «تاۋەلسىز قازاقستاننىڭ تانىمال كوشباسشىسى» اتتى ءححى عاسىر كوشباسشىسى زياتكەرلىك ويىنىن ۇيىمداستىردىق. وعان مەكتەبىمىزدىڭ ادينا لەۆەن, دامير ءتۇسىپوۆ, تاتيانا نيكاندروۆا, ءمادينا وماروۆا, ابىلاي جۇماجانوۆ, مەرەي ءابدىمومىنوۆا, بەكجان وڭداسىن, شىرىن ديداربەكوۆا, نۇرگۇل احمەت, ناتاليا مەتەليتسا, سەدا يۋنۋسوۆا, ۆالتەر لەتكيمان ءتارىزدى قازاق ءتىلى مەن ادەبيەتى پانىنەن مەيلىنشە جۇيرىك شاكىرتتەرى قاتىستى. ولار «مۇراگەر» جانە «ارمان» اتتى ەكى توپقا ءبولىندى. «بايگە», «پوليگلوت», «ءتىل ونەرى», «ويلان, تاپ!», «جورعا» دەپ اتالعان كەزەڭدەردەن قۇرالعان سايىس اسا قىزىقتى ءوتتى. مەكتەپ اكىمشىلىگىنەن قۇرالعان قازىلار القاسى سايىس سوڭىندا «ارمان» توبىن جەڭىمپاز دەپ تانىعانمەن, ەكى توپ تا وسال كورىنگەن جوق.
وقۋشىلارعا زامان تالابىنا ساي ساپالى, تياناقتى ءبىلىم بەرۋ – مۇعالىم الدىنداعى ۇلكەن مىندەت. وقىتۋدىڭ جاڭا پەداگوگيكالىق تەحنولوگيالارىن ساباققا ەنگىزۋ بۇگىنگى تاڭدا ءاربىر ۇستازدىڭ باستى ماقساتى بولۋى شارت. سەبەبى, ەلىمىزگە زامان تالابىنا ساي ويلاي الاتىن, شۇعىل شەشىمدەر قابىلداي بىلەتىن, بەلسەندى, شىعارماشىل ازاماتتار قاجەت. ساباقتا تەك بىلىمدىلىك ماقساتتاردى شەشىپ قويماي, بالالاردىڭ جەكە باستارىنىڭ قاسيەتتەرىن, قابىلەتتەرىن دامىتۋدىڭ جولدارىن قاراستىرۋدا ءداستۇرلى وقىتۋ مەن دامىتا وقىتۋدىڭ ايىرماشىلىعىن سالىستىرۋ كەستەسى ارقىلى كورسەتۋگە بولادى. مۇعالىم بۇل جۇيەمەن جۇمىس جاساعاندا, ۇنەمى وقۋشى ساناسىندا بولىپ جاتقان وزگەرىستەردى باقىلاپ, ونىڭ دامۋىن جان-جاقتى زەرتتەي وتىرىپ, ءوز ساباقتارىن سوعان ساي وزگەرتىپ وتىرۋى ءتيىس.
مەنىڭشە, جاڭا زامان مۇعالىمى ءوز بويىنداعى بارلىق جاقسى قاسيەتتەردى وقۋشىلارعا ءبىلىم بەرۋ مەن تاربيەلەۋدە ۇيلەستىرە وتىرىپ دارىتۋى كەرەك. ءوز ويلارىن ەركىن جەتكىزە الاتىن, العان بىلىمدەرىن ومىردە قولدانا الاتىن وقۋشىلاردى جەتىلدىرۋ – ۇستاز قولىندا. وسى ماقساتتارعا جەتۋ ءۇشىن ءارى قاراي جۇمىس ىستەۋ, شەبەر مۇعالىم بولۋ ءار پەداگوگتىڭ وزىنە بايلانىستى.
ساۋلە بۇرلەنوۆا,
№40 نەگىزگى مەكتەپتىڭ قازاق ءتىلى ءپانى مۇعالىمى
قاراعاندى