بوكس دەگەن بەكزادا ونەرمەن وسى كۇنى ەر جىگىتتەر عانا ەمەس, نازىك جاندىلار دا اينالىسا باستادى. مۇحامەد ءاليدىڭ قىزى لەيلا ءالي, ءوزىمىزدىڭ قاراعاندىنىڭ تۋماسى ناتاليا راگوزينا – كاسىپقوي بوكستىڭ شەبەرى رەتىندە الەمدىك دەڭگەيدە تانىمال. حالىقارالىق اۋەسقوي بوكس فەدەراتسياسى (ايبا) وسىدان ءتورت جىل بۇرىن قىزدار بوكسىن وليمپيا ويىندارىنا قوستى. سودان بەرى ەكى وليمپيادا ءوتىپ, قازاقستان قورجىنىنا ماريا ۆولنوۆا مەن داريعا شاكىموۆا قولا جۇلدە سالىپ ۇلگەردى.
وكىنىشكە قاراي, ريوداعى جازعى وليمپيا ويىندارىنا 60 كيلودا جولداما الا المادىق. استاناداعى ليتسەنزيالىق الەم بىرىنشىلىگىنە ەل چەمپيونى نازىم يششانوۆا ەمەس, ودان جەڭىلگەن ريمما ۆولوسەنكونىڭ قاتىسقانى جانكۇيەرلەردىڭ نارازىلىعىن تۋعىزدى. ونىڭ ۇستىنە, ۆولوسەنكو جولداما الا العان جوق. بۇل جايت سول كەزدە بۇقارالىق اقپارات قۇرالدارىندا قىزۋ تالقىلانعان-دى. سول وقيعادان كەيىن, ءوز-وزىنە كەلە باستاعان يششانوۆانى جاڭا جىل قارساڭىندا سوزگە تارتىپ كوردىك.
اقجايىقتا دۇنيەگە كەلگەن سپورتشى قىزدان الدىمەن مەشىن جىلىنىڭ سايىستارىنا شولۋ جاساۋىن وتىنگەنبىز.
– بيىلعى جىل نەگىزىنەن جاقسى باستالعان ەدى. اقپان ايىندا ەلوردادا قازاقستان چەمپيوناتىن ۇتتىم. ودان كەيىن قىتايداعى ليتسەنزيالىق تۋرنيرگە قاتىستىم. بىراق ازداعان ساتتىلىك جەتىسپەي, وندا وليمپيادا جولداماسىنا يەلىك ەتە المادىم. ال مامىر ايىندا استانادا وتكەن الەم ءبىرىنشىلىگىنە «ءبىر كىسىلەردىڭ ارقاسىندا» قاتىسا المادىم. ول تۋرالى ەندى ەسىمە دە العىم كەلمەيدى, – دەيدى ن.يششانوۆا.
وليمپياداعا قاتىسامىن دەگەن ءۇمىتى سۋ سەپكەندەي باسىلعان سوڭ, بوكسشى قىز ءبىراز ۋاقىت ىشتەي قينالعان. وسى كەزدە اتا-اناسىنىڭ قولداۋى كوپ دەمەۋ بولىپتى.
– مەنى ءاردايىم قولداي بىلەتىن اكەم مەن انام بار. قيىن كەزدە سول كىسىلەر دەمەۋ بولدى. سونىڭ ارقاسىندا ءوز-وزىمە كەلىپ, جاتتىعۋعا قايتا كىرىستىم. قازاقستان چەمپيوناتى مەن قىتايداعى تۋرنيردەن كەيىن ءبىراز ۋاقىت شارشى الاڭعا شىقپادىم. باپكەرىم ەكەۋمىز جاز بويى دايىندالدىق. سوسىن تامىزدا ماحاچكالاداعى تۋرنيرگە قاتىسىپ, ءبىرىنشى ورىنمەن ورالدىم. كەيىننەن ستۋدەنتتەر اراسىنداعى الەم چەمپيوناتى مەن مۇنايلى ەلدەر اراسىنداعى الەم كۋبوگىنان قولا جۇلدە ەنشىلەدىم. كوماندالاستارىممەن سالەمىم ءتۇزۋ. جاقىن قۇربىلار سەكىلدى ارالاساتىن قىزدار دا از ەمەس. قۇرامانىڭ اعا باپكەرىمەن دە قارىم-قاتىناسىمىز جاقسارا ءتۇستى. ول كىسى قاتەسىن ءتۇسىندى, – دەيدى بوكسشى قىز.
شىناشاقتاي قىزدىڭ بوكسپەن اينالىسۋى دا قىزىق. اكەسى بەيبىت باپكەر رەتىندە كوپتەگەن دارىندى جاستاردى دايىنداعان. بىراق باپتاعان بالالارىنىڭ كوبىسى سوڭىنا دەيىن سپورتتى جالعاستىرماي, باسقا سالالارعا كەتىپ قالاتىن كورىنەدى. اكەسى ۇيىنە كەلگەندە ەڭبەگىنىڭ زايا كەتكەنىن ايتىپ, ءوز رەنىشىن ءبىلدىرىپ وتىرادى ەكەن. بۇل جاعداي قىزىنا قاتتى اسەر ەتىپ, ورالداعى «دارىن» مەكتەبىندە ۇزدىك وقىپ, مۋزىكا جانە سۋرەت سالۋمەن اينالىسىپ جۇرگەن يششانوۆانىڭ اڭسارى ءبىرجولا بوكسقا اۋادى.
ول بوكستان بولەك, مۋزىكامەن دە اينالىسادى. قازاقتىڭ ۇلتتىق اسپابى دومبىرادا وينايدى. قازىرگى كەزدە قوبىزدى ۇيرەنىپ ءجۇر ەكەن. «مۋزىكادا دا, بوكستا دا ىرعاق دەگەن تۇسىنىك بار. مۇنى سەزىنە بىلسەڭ, جەتىستىككە جەتۋگە كوپ كومەگى تيەدى. سول سەبەپتى ماعان ونەر مەن سپورتتى بايلانىستىرۋ قيىن ەمەس. اسىرەسە, قازاقتىڭ كۇيلەرىن ورىنداعاندى جاقسى كورەمىن», – دەيدى ول. بوس ۋاقىتىندا كونكي تەپكەندى جاقسى كورەدى ەكەن. وزگە سپورت تۇرلەرىنەن ەركىن كۇرەس پەن گرەك-ريم كۇرەسىنە قىزىعاتىنىن ايتادى.
ن.يششانوۆا وسى ۋاقىتقا دەيىن ءتورت رەت ەل چەمپيوناتىن ۇتقان. ەل سپارتاكياداسىنىڭ جەڭىمپازى. ءۇش مارتە الەم چەمپيوناتىنا قاتىسىپ, ەكى رەت قولا جۇلدەگەر اتانعان. ۇلتتىق قۇرامادا 60 كيلوعا ونەر كورسەتەدى. بۇل كۇندەرى ورالدان اتىراۋعا قونىس اۋدارعان بوكسشى قىز قازىرگى كەزدە حالەل دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ دەنە شىنىقتىرۋ فاكۋلتەتىنىڭ ەكىنشى كۋرسىندا وقيدى.
– الداعى 2017 جىلى كەزەكتى رەت قازاقستان چەمپيوناتىندا توپ جارۋدى كوزدەيمىن. سوسىن ازيا چەمپيوناتى بار. ودان بولەك, كوپتەگەن حالىقارالىق جارىستار وتەدى. سول جارىستاردان جۇلدە سالىپ, ەل مەرەيىن اسىرۋدى كوزدەيمىن, – دەپ نازىم يششانوۆا كەلەر جىلعا دا زور ۇمىتپەن قارايتىنىن اڭعارتتى.
ءبىز دە ءوز كەزەگىمىزدە سپورتشىعا ساتتىلىك تىلەپ, جاڭا جىلدا جاڭا تابىستارعا جەتە بەرۋىنە تىلەكتەستىگىمىزدى بىلدىردىك.
بەك تولەۋوۆ