وتكەن اپتانىڭ سوڭىندا قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆ تاشكەنتكە ساپار جاساپ, ونىڭ اياسىندا وزبەكستان پرەزيدەنتى شاۆكات ميرزيەەۆتىڭ قابىلداۋىندا بولدى جانە ءوزىنىڭ وزبەكستاندىق ارىپتەسى ابدۋلازيز كاميلوۆپەن كەلىسسوز جۇرگىزدى, دەپ حابارلادى قازاقستان رەسپۋبليكاسى سىرتقى ىستەر مينيسترلىگىنىڭ ءباسپاسوز قىزمەتى.
بۇل وزبەكستانداعى پرەزيدەنتتىك سايلاۋدان كەيىن وسىنداي جوعارى دەڭگەيدە بولعان العاشقى ەكىجاقتى قارىم-قاتىناس ەدى. كەزدەسۋلەردىڭ نەگىزگى تاقىرىبى – ەكىجاقتى قارىم-قاتىناستاردى بەلسەندى ەتە ءتۇسۋ, ورتالىق ازيا وڭىرىندە تۇراقتىلىق پەن قاۋىپسىزدىككە قاتەر توندىرەتىن ءىس-قيمىلدارعا بىرلەسىپ قارسى تۇرۋ بولدى. بۇل ارادا, ارينە, قازاقستاننىڭ 2017-2018 جىلدارى بۇۇ قاۋىپسىزدىك كەڭەسىنە مۇشەلىگىمەن بايلانىستى پايدا بولاتىن مۇمكىندىكتەردى ۇتىمدى ىسكە قوسۋ جايىنا دا باسا نازار اۋدارىلدى.
پرەزيدەنت ش.ميرزيەەۆپەن كەزدەسۋى كەزىندە قازاقستاندىق مينيستر وزبەكستان باسشىسىن قازاقستان پرەزيدەنتى نۇرسۇلتان نازارباەۆتىڭ اتىنان جاقىندا بولىپ وتكەن سايلاۋداعى تالاسسىز جەڭىسىمەن قۇتتىقتادى جانە ەلباسىنىڭ ىستىق سالەمى مەن ىزگى نيەت, تىلەكتەرىن جەتكىزدى.
ە.ىدىرىسوۆ, سونداي-اق, قازاقستان باسشىسىنىڭ ەلىمىزدىڭ بۇۇ قاۋىپسىزدىك كەڭەسىنە تۇراقتى ەمەس مۇشە بولىپ سايلانۋى شەڭبەرىندە بىرلەسىپ جۇمىس ىستەۋ جونىندەگى ۇسىنىستار جازىلعان جەكە جولداۋىن تاپسىردى.
ش.ميرزيەەۆتىڭ سوزىنە قاراعاندا, تاشكەنت قازاقستاننىڭ بۇۇ قاۋىپسىزدىك كەڭەسىنە تۇراقتى ەمەس مۇشە بولىپ سايلانۋىن ءبۇكىل ءوڭىردىڭ تابىسى رەتىندە قاراستىرادى, سوعان وراي, وزبەك تاراپى ورتالىق ازيا تاقىرىبىن وسى جاھاندىق-ساياسي ورگاننىڭ كۇن تارتىبىنە ىلگەرىلەتۋ ءۇشىن بىرلەسىپ جۇمىس ىستەۋگە دايىن ەكەنىن ءبىلدىرەدى. وزبەكستان پرەزيدەنتىنىڭ ايتۋىنشا, قاۋىپسىزدىكتىڭ وتكىر سىن-قاتەرلەرى قاتارىندا اۋعانستاننان تۋىندايتىن ماسەلەلەر دە بار.
وزبەكستان پرەزيدەنتى يادرولىق قارۋسىزدانۋ مەن تاراتپاۋدىڭ جاھاندىق ۇدەرىستەرى مەن ورتالىق ازيانى يادرولىق قارۋدان ازات ايماق دەپ جاريالاۋدا ءوڭىردىڭ بارلىق ەلدەرىنىڭ قولداۋىمەن جانە قاتىسۋىمەن جۇزەگە اسىرىلعان بۇل ىسكە نۇرسۇلتان نازارباەۆتىڭ ءۇلكەن ۇلەس قوسقانىن اتاپ كورسەتتى.
ءوز كەزەگىندە, ە.ىدىرىسوۆ ءوزبەكستان باسشىسى باستاماشىلىق تانىتقان, ەلدى الەۋمەتتىك-ەكونوميكالىق جانە ساياسي دامىتۋعا باعىتتالعان رەفورمالاردى جوعارى باعالادى. ويتكەنى, رەفورمالار قاراپايىم ادامداردىڭ ءومىرلىك قاجەتتىلىكتەرىن قامتاماسىز ەتۋدى كوزدەيدى, سونداي-اق, «حالىقپەن جانە ادام مۇددەسىمەن ۇنقاتىسۋ» باعدارلاماسىندا كورىنىس تاپقان.
«باۋىرلاس ەلدەگى بيزنەس ورتانى تۇبەگەيلى جاقسارتۋ مەن تىكەلەي شەتەل ينۆەستيتسيالارى ءۇشىن تارتىمدى احۋال قالىپتاستىرۋ ءجونىندەگى قادامدار دا نازار اۋدارارلىقتاي», – دەپ اتاپ ءوتتى قازاقستاندىق ديپلومات.
ە.ىدىرىسوۆ سوڭعى كەزدەرى استانا مەن تاشكەنتتىڭ ەكى ەلدىڭ ەكونوميكالىق ءوزارا ءىس-قيمىلىن بەلسەندى ەتە ءتۇسۋ ءۇشىن وڭتايلى جاعداي قالىپتاستىرۋ جونىندەگى ناقتى قادامدارىن قۇپتايتىنىن ءبىلدىردى. وسى ورايدا, قازاق جانە وزبەك كاسىپكەرلەرى اراسىندا ساۋدا, ونەركاسىپ جانە اۋىل شارۋاشىلىعى ءوندىرىسى, لوگيستيكا سالالارىنداعى ءبىرلەسكەن جوبالاردى جۇزەگە اسىرۋدا تىعىز بايلانىستار ورناعانى دا نازاردان تىس قالعان جوق.
ە.ىدىرىسوۆ, سونداي-اق, اقوردانىڭ وزبەكستان پرەزيدەنتىن مەملەكەتتىك ساپارمەن استاناعا شاقىرۋىن قۋاتتادى. ش.ميرزيەەۆ شاقىرۋعا ريزاشىلىعىن ءبىلدىرىپ, تاياۋداعى ىڭعايلى مەرزىمدە بۇل مۇمكىندىكتى پايدالانۋ نيەتى بار ەكەنىن ايتتى جانە ءوزىنىڭ قازاقستانمەن باۋىرلاستىق قارىم-قاتىناستاردى نىعايتۋ باعىتىن ۇستاناتىنىن كولدەنەڭ تارتتى.
وزبەكستان سىرتقى ىستەر مينيسترلىگىندە بولعان كەلىسسوزدەر كەزىندە ىنتىماقتاستىقتىڭ كوپتەگەن باعىتتارىندا ايتارلىقتاي جاندانۋ بايقالاتىنى قاناعات سەزىمىمەن اتاپ ءوتىلدى. ويتكەنى, ەلدەر اراسىندا ءوزارا قۇرمەت, سەنىم مەن ءتۇسىنىستىك ارتقان سايىن كەز كەلگەن كۇردەلى ماسەلەلەردى شەشۋ سونشالىقتى قيىندىق تۋعىزبايدى.
تاراپتار, سونداي-اق, شەكارالىق جانە وڭىرارالىق ىنتىماقتاستىق سالاسىنداعى بىرلەسكەن جوبالاردى جۇزەگە اسىرۋدىڭ پەرسپەكتيۆالارىن تالقىلادى.
ەكى ەل سىرتقى ساياسات ۆەدومستۆولارىنىڭ باسشىلارى استانا مەن تاشكەنتتىڭ ەكىجاقتى قارىم-قاتىناسىنداعى ىلگەرىلەۋشىلىكتەر بۇكىل ورتالىق ازياداعى وڭىرلىك ىنتىماقتاستىقتى كەشەندى تۇردە جولعا قويۋ ءۇشىن بەرىك نەگىز قالاۋى ءتيىس ەكەنىن اتاپ ءوتتى.
ە.ىدىرىسوۆ ءوزىنىڭ وزبەكستاندىق ارىپتەسىنە قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانۋ ناۋقانى كەزىندە تۋىسقاندىق قولداۋ كورسەتكەنى ءۇشىن ريزاشىلىعىن ءبىلدىردى جانە وسى جاۋاپتى لاۋازىمدا ءبىزدىڭ ديپلوماتيامىزدىڭ الداعى جۇمىسىنداعى نەگىزگى باسىمدىقتارى تۋرالى حاباردار ەتتى.
استانانىڭ دا تاشكەنت سەكىلدى اۋعانستاندا ۇزاق مەرزىمدى تۇراقتىلىق قالىپتاسۋىنا مۇددەلى ەكەنى ەرەكشە اتالدى. وسىعان بايلانىستى استانانىڭ اتالعان ەلدىڭ بەيبىت ءومىر, الەۋمەتتىك-ەكونوميكالىق دامۋى, ۇلتتىق ءبىلىم بەرۋ جۇيەسىنىڭ الەۋەتىن ارتتىرۋ ءۇشىن ينفراقۇرىلىمداردى قالپىنا كەلتىرۋدە ءارى قاراي دا كومەكتەسۋ نيەتى بار ەكەنى كولدەنەڭ تارتىلدى.
تۇتاستاي العاندا, تاشكەنتتەگى كەلىسسوزدەر دوستىق, ىسكەرلىك راۋىشتە ءوتىپ, ورتالىق ازيا وڭىرىندەگى ەكى اسا ءىرى مەملەكەت اراسىنداعى ارىپتەستىك قارىم-قاتىناستاردى ءوزارا قۇرمەت تۇرعىسىنان بەكىتۋگە مۇمكىندىك بەردى.