جاقسىلىق ۇشكەمپىروۆ, گرەك-ريم كۇرەسىنەن وليمپيادا جانە الەم چەمپيونى:
– تۋريزم جانە سپورت مينيسترلىگى ۇيىمداستىرىپ وتىرعان بۇل شارا وتە قۇپتارلىق باستاما. بۇگىندە ەگەمەن ەل بولعانىمىزعا 20 جىل تولدى. بۇل ءبىزدىڭ ەل بولىپ, ءبىر بەلەستى باعىندىرىپ, جاڭاشا قىرىمىزدان تانىلۋىمىزدىڭ جولى ىسپەتتەس. سونىڭ دالەلى رەتىندە ۇيىمداستىرىلىپ وتىرعان سپورت فورۋمىنىڭ ماقساتى – سپورت سالاسىنا جاڭادان كەلىپ جاتقان تەوريالاردى, يننوۆاتسيالىق تەحنولوگيالاردى تاجىريبەگە ەنگىزۋ, ولاردى ەجەلگى سپورت تۇرلەرىمەن ساباقتاستىرا وتىرىپ, ودان ءارى دامىتۋ. سەبەبى, ءححى عاسىر جاڭا تەحنولوگيالار عاسىرى ەكەنى بارشاعا ءمالىم. ونى وسكەلەڭ ۇرپاق ۇلتتىق ءداستۇرىمىزبەن بىرگە بايلانىستىرىپ وتىرۋدى ادەتكە اينالدىرۋى شارت. دامۋشى ەل رەتىندە سپورتقا دا ەرەكشە سەرپىن بەرىپ, ونى ءتۇرلى جاعدايدا قۇبىلتىپ, سول ارقىلى تاۋەلسىز ەلىمىزدىڭ جەتىستىگىن كورسەتە ءبىلۋ – بارشامىزعا مىندەت.
سپورت – ەجەلدەن كەلە جاتقان, تامىرىن تەرەڭگە جايعان سالا. بۇگىندە قاناتىن كەڭگە جايىپ, ءوزىنىڭ سان قىرلى تارماقتارىن الەمگە پاش ەتۋدە. الداعى ۋاقىتتا دا, شىراعى سونبەي, ودان ءارى دامي تۇسەتىنى ەش ءشۇباسىز. 2008 جىلى وتكەن بەيجىڭ وليمپياداسىندا ءبىزدىڭ سپورتشىلارىمىزدىڭ باسىمدىق تانىتقانى, بيىلعى جىلعى ءVىى قىسقى ازيا ويىندارىنداعى قازاقستان سپورتشىلارىنىڭ ەڭ بيىك ساتىدان كورىنۋى ارقىلى ەلىمىز الەمگە تانىلىپ جاتىر. بۇل – قۋانارلىق ءجايت. ەلباسىنىڭ باستاماسىمەن كوپتەگەن سپورت نىساندارى اشىلۋدا. دەمەك, ونىڭ بولاشاعىنان ۇلكەن ءۇمىت كۇتۋگە بولادى. بۇل رەتتە ءبىزدىڭ الدىمىزدا ۇلكەن مىندەت تۇر. ياعني, سول ارحيتەكتۋرا جاعىنان دامىعان ەلدەردەگى ءىرى نىساندارمەن يىق تەڭەستىرە الاتىن سپورتقا ارنالعان نىساندارىمىز, حالىقارالىق ارەنادان ويىپ تۇرىپ ورىن الاتىن سپورت سارايلارىنا لايىقتى باپكەرلەر مەن جاتتىقتىرۋشىلار, ساپالى سپورتشىلار دايىنداۋىمىز قاجەت. ۇستازدان شاكىرت وزادى دەمەكشى, ءبىزدىڭ سوڭىمىزدان ءوزىمىز سياقتى وليمپيادا چەمپيوندارىنىڭ كوپتەپ شىعاتىنىنا سەنىمىم مول.
رۋسلان ساميەۆ, اقتوبە وبلىسى, تەمىر اۋدانى №3 ورتا مەكتەبىنىڭ دەنە تاربيەسى مۇعالىمى, سپورت نۇسقاۋشىسى:
– بيىل تۇڭعىش رەت وتكىزىلىپ جاتقان سپورت فورۋمىنىڭ ماڭىزى وراسان زور. فورۋمعا جان-جاقتان قاتىسۋشىلار كەلىپ جاتىر. سپورتتىڭ دامۋى تۋرالى ۇلكەن ماسەلەلەر قوزعالدى. «ەل قايراتى» رەسپۋبليكالىق, اۋىلدىق دەنە تاربيەسى-سپورت قوعامى» قوعامدىق بىرلەستىگى قۇرىلىپ جاتىر. وسى ارقىلى ۇلكەن جەتىستىكتەرگە جەتەمىز دەپ ۇمىتتەنەمىز. بيلىك تاراپىنان قولداۋ بولىپ جاتسا, اۋىل سپورتى كوتەرىلۋى ءتيىس. ەلىمىزدىڭ سپورت دەڭگەيى, قۇدايعا شۇكىر, جوعارى قارقىنمەن دامىپ كەلەدى. اۋىلداعى جاستاردى سپورتقا تارتۋ ارقىلى كورسەتكىشتەرىمىزدى بۇدان دا جاقسارتامىز دەگەن ويىمىز بار. اۋىل سپورتىن كوتەرۋ بارىسىندا سپورت قۇرالدارى الىنىپ, سپورت الاڭدارى مەن جاتتىعۋ كەشەندەرى تالاپقا ساي سالىناتىن بولسا, اۋىلداعى بالالار ءۇشىن ۇلكەن تالپىنىس بولار ەدى. ەلىمىز بويىنشا ۇلكەن سپورتتى قارجىلاندىرۋ ماسەلەلەرى دۇرىس جولعا قويىلعان, ال اۋىلدىڭ سپورتىندا قاراجات جەتىسپەۋشىلىگى بايقالادى. بىراق, وسى جولى ءوتكىزىلگەن فورۋمنان كەيىن بۇل ولقىلىقتاردىڭ دا ورنى تولار.
مايرا يساەۆا, قاراعاندى وبلىسى تۋريزم, دەنە شىنىقتىرۋ جانە سپورت باسقارماسىنىڭ ءبولىم باستىعى:
– قاراعاندى وبلىسى بويىنشا بۇگىنگى تاڭدا 40-قا جۋىق بالالار سپورت مەكتەبى, وبلىستىق ينتەرناتتار, جوعارى دەڭگەيلى سپورت كەشەندەرى بار. وسىلاردىڭ بارىندە 24 644 وقۋشى سپورتتىق تاربيە الادى. سونىمەن قاتار, 1500-دەن استام بالا «قازاقمىس»ۇك» اق-تىڭ دەمەۋشىلىگىمەن اشىلعان جەكە مەكتەپتەردە ءبىلىم الۋدا. بيۋدجەتتىڭ جىل سايىنعى كوبەيۋىنە بايلانىستى سپورت مەكتەپتەرىندەگى سايىستار سانى دا ارتىپ كەلەدى. سوڭعى 5 جىل ىشىندە سپورتتىق ءىس-شارالاردىڭ كورسەتكىشتەرى ەداۋىر دەڭگەيگە كوتەرىلدى. الەمدىك جەڭىمپازدار, ازيا جەڭىمپازدارى بىزدەن شىعىپ جاتىر. بۇل – ەلىمىز ءۇشىن ۇلكەن ماقتانىش. سپورت مەكتەبىنە جىل سايىن كەلەتىن بالالاردىڭ ساندارىنان-اق ولاردىڭ سپورتقا دەگەن قىزىعۋشىلىقتارىن انىق بايقايمىز. بارلىق مەكتەپتەردە سپورتتىڭ 63 تۇرىنەن, ال ونىڭ ىشىندە 37 وليمپيادالىق ويىن ءتۇرلەرىنەن بالالار ساباق الادى. وبلىستىق سپورت مەكتەپتەرىندەگى بالالاردىڭ بارلىعى تەگىن وقيدى. ەڭ باستىسى, ولاردىڭ سپورتقا دەگەن ىنتالارى بولسا جەتكىلىكتى, قالعان جاعدايدىڭ ءبارىن ءوزىمىز جانە دەمەۋشىلەر تاراپىنان قاناعاتتاندىرۋعا تىرىسامىز. كوپتەگەن وبلىستار وزگە وبلىستاردىڭ تالانتتى جاستارىن وزدەرىنە قاراجات كوزدەرىمەن شاقىرىپ جاتادى. ال بىزدە ولاي ەمەس. بارلىق تالانتتار تۇگەلدەي ءوزىمىزدىڭ وبلىسىمىزدان شىققاندار.