جۇمىسشى ماماندارى قات
ءىرى ءوندىرىس وشاقتارى شوعىرلانعان تەمىرتاۋداعى كاسىپورىندار جۇمىس قولىنا اسا ءزارۋ. زەينەتكەرلىككە شىعۋشىلاردىڭ ورنىن تولىقتىرۋشىلار از. جاقىندا وتكەن بوس ورىندار ءجارمەڭكەسىنە 16 عانا جۇمىس ىزدەۋشى كەلدى.
وسى جايعا بايلانىستى «ەگەمەن قازاقستاننىڭ» قاراعاندى وبلىسىنداعى ءتىلشىسى ايقىن نەسىپباي «قازاقمەحمونتاج 2» جشس كادرلار ءبولىمىنىڭ باستىعى ەلەنا كالينوۆسكيحكە:
– ءسىز نە دەيسىز؟
– ءيا, ءبىز اتالعان ءجارمەڭكەگە ۇلكەن ءۇمىت ارتقان ەدىك. ماسەلەن, كاسىپورنىمىزعا ءبۇگىنگى كۇندە 80 مونتاجشى, 40 ەلەكترمەن دانەكەرلەۋشى, 20 سلەسار قۇراستىرۋشى كەرەك. الدىن الا جارنامالار, حابارلاندىرۋلار ارقىلى قۇلاقتانعان جۇرتتىڭ جۇمىسسىز جۇرگەندەرى ەڭبەككە تارتىلۋعا تىلەك ەتىپ كەلەر دەر ويلاعانبىز. وكىنىشكە قاراي, ولاي بولمادى. 6 ادام عانا ءوتىنىش ءبىلدىرىپ كەلدى. «ارناۋلىونەركاسىپقۇرىلىس», «اۆانگاردقۇرىلىس», «بەتونقۇرىلىس» سياقتى» كاسىپورىنداردىڭ وكىلدەرى تىپتەن ەشكىمدى قابىلداي الماي, بوس قايتتى.
قالاداعى قاي وندىرىسكە دە, قۇرىلىس ۇيىمىنا دا جۇمىسشىلار تاپشىلىعى ماسەلەسى قيىندىق كەلتىرىپ وتىر. اسىرەسە, جاستار جاعىنىڭ جوعارىدا اتالعان كاسىپتەردى مەڭگەرۋگە قۇشتارسىزدىعى الاڭداتادى. شىندىعىن ايتقاندا, قاي-قايسىسىنا بۇعان جول اشىق. 13 جانە 24 كاسىپتىك ليتسەيلەردە قالاۋلى ماماندىق بويىنشا تەگىن وقۋعا بولادى. مۇنىڭ ۇستىنە 12 مىڭ 188 تەڭگە شاكىرتاقى ءتولەنەدى. بىراق سوعان قاراماستان وندىرىستە ەڭبەك ەتۋگە ۇمتىلۋشىلار وتە از. سوندىقتان كوپ رەتتە اۋىل جاستارى ەسەبىنەن تارتىلىپ كەلەدى. الايدا بۇلاي بولا بەرسە ەگىن ەگەتىن, مال باعاتىندار ازايادى.
وسى جايعا بايلانىستى قالالىق مەكتەپتەردە وقۋشىلارعا كاسىپتىك باعدار بەرۋ ءتاربيەسىن مىقتاپ قولعا الۋ كەرەكتىگى ۋاقىت ۇسىنىپ وتىرعان تالاپ. جۇمىسشى ماماندىعى بەدەلى كوتەرىلۋى, ونى قالاۋشىلارعا قولداۋ جاسالۋى قاجەت. جالپى, بۇل باعىتتا مەملەكەتتىك دەڭگەيدە ءتيىستى باعدارلاما بەلگىلەنسە ارتىق تا بولماس ەدى. قازىرگى زامان تالاپتارىنا ساي بىلىكتى, شەبەر جۇمىسشىلاردى كوپتەپ دايارلاۋ وركەندەۋلى وندىرىسكە قور كومەك.
قاراعاندى وبلىسى.